باتىس قازاقستان وبلىسىندا «اۆتوبۋس» اتتى جەدەل-الدىن الۋ شارالارى ءوتىپ, قوعامدىق جولاۋشىلار كولىگىن باسقارىپ كەلە جاتىپ تەلەفونمەن سويلەسكەنى ءۇشىن 115 جۇرگىزۋشىگە ايىپپۇل سالىندى.
«جەلتوقسان ايىنىڭ باسىندا وتكەن اپتالىق شارانىڭ ماقساتى – قوعامدىق كولىك جۇرگىزۋشىلەرىنىڭ جاۋاپكەرشىلىگىن پىسىقتاۋ, جول ءجۇرۋ ەرەجەسى ساقتالۋىن قامتاماسىز ەتۋ» دەيدى باتىس قازاقستان وبلىستىق پوليتسيا دەپارتامەنتى ءباسپاسوز قىزمەتى.
جەرگىلىكتى بيلىك ورىندارىمەن بىرلەسە رەيد وتكىزگەن 4 كۇن ىشىندە 400-دەن اسا قۇقىقبۇزۋشىلىق انىقتالىپ, حاتتاما تولتىرىلىپتى. ماسەلەن, 68 جۇرگىزۋشى جىلدامدىقتى رۇقسات ەتىلگەن مولشەردەن اسىرسا, كولىك مانەۆرى كەزىندە 133 مارتە ەرەجە بۇزىلعان. رولدە كەلە جاتىپ تەلەفون پايدالانعانى ءۇشىن 115 جۇرگىزۋشى, كولىگىن ۋاقىتىلى تەحنيكالىق بايقاۋدان وتكىزبەگەنى ءۇشىن 43 جۇرگىزۋشى ايىپتى بولدى. بۇدان بولەك 71 قۇقىقبۇزۋشىلىق انىقتالعان.
قازىر قىس, قالاداعى كولىك قوزعالىسى قيىندادى. ساقتىقتى كۇشەيتپەسە بولمايدى. سونىڭ ىشىندە قوعامدىق كولىك جۇرگىزۋشىلەرى مەن جولاۋشى تاسىمالىمەن اينالىساتىن مەكەمەلەردىڭ جاۋاپكەرشىلىگى جوعارى بولۋى ءتيىس. رەيد كەزىندە انىقتالعان قۇقىقبۇزۋشىلىقتار ءۇشىن ورال قالاسىنداعى اۆتوبۋس پاركتەرىنىڭ لاۋازىمدى 7 قىزمەتكەرى دە اكىمشىلىك جاۋاپقا تارتىلعان.