سىرتقى ىستەر مينيسترلىگىندە قازاقستان-پەرۋ ساياسي كونسۋلتاتسيالارى ءوتتى. تاراپتار 2017 جىلعى قاراشادا ليما قالاسىندا قول قويىلعان قر ءسىم مەن پەرۋ ءسىم اراسىنداعى ساياسي كونسۋلتاتسيالاردىڭ تەتىگىن ورناتۋ جونىندەگى ءوزارا تۇسىنىستىك تۋرالى مەموراندۋمعا سايكەس ەكى ەلدىڭ ساياسي ۆەدومستۆولارىنىڭ اراسىنداعى ىنتىماقتاستىقتى نىعايتۋدى جانە ديالوگتىڭ قارىشتى دامۋىن قولدادى, دەپ حابارلايدى ءسىم ءباسپاسوز قىزمەتى.
كونسۋلتاتسيا بارىسىندا ەكى جاقتى جانە كوپ جاقتى ارىپتەستىك تالقىلاندى, ونىڭ ىشىندە قازاقستان مەن پەرۋ اراسىنداعى ىنتىماقتاستىقتىڭ شارت-قۇقىقتىق بازاسىن كەڭەيتۋ, ۆيزالىق رەجيمدى جەڭىلدەتۋ, ساۋدا-ەكونوميكالىق قاتىناستاردى, ءبىلىم جانە مادەني-گۋمانيتارلىق بايلانىستاردى بەلسەندەتۋ.
پەرۋ سىرتقى ىستەر مينيسترلىگىنىڭ ازيا جانە وكەانيا ىستەرى جونىندەگى باس ديرەكتورى ەلارد ەسكالا پەرۋدىڭ قازاقستانمەن ارىپتەستىگىنىڭ ماڭىزدىلىعىن اتاپ ءوتىپ, استانا پەرۋ ءۇشىن ورتالىق ازيا وڭىرىمەن قاتىناستاردى جىلجىتۋعا حاب بولاتىندىعىنا ءۇمىت ءبىلدىردى.
ساۋدا-ەكونوميكالىق قاتىناستاردىڭ جانداندىرۋ ماقساتىندا قر سىرتقى ىستەر مينيسترلىگى امەريكا دەپارتامەنتىنىڭ ديرەكتورى بولات سۇگىرباەۆ ەكى ەلدىڭ بيزنەس قوعامداستىقتار وكىلدەرىنىڭ اراسىنداعى ارىپتەستىگىن ىسكەرلىك ميسسيالارمەن الماسۋ ارقىلى جانداندىرۋعا شاقىردى. سونداي-اق ەۋرازيالىق ەكونوميكالىق وداق پەن تىنىق مۇحيت اليانسى ايماقتىق ساۋدا بلوكتارى اراسىنداعى بايلانىستاردى دامىتۋدىڭ كەلەشەگى اتالىپ ءوتىلدى.
كونسۋلتاتسيالار بارىسىندا «قازاقستان عارىش ساپارى» ۇك» اق مەن پەرۋ عارىش اگەنتتىگىنىڭ اراسىندا جانە قر پرەزيدەنتىنىڭ جانىنداعى مەملەكەتتىك باسقارۋ اكادەمياسى مەن پەرۋدىڭ ديپلوماتيالىق اكادەمياسى اراسىندا ءوزارا تۇسىنىستىك تۋرالى مەموراندۋمدارعا قول قويىلدى.
كەزدەسۋدىڭ قورىتىندىسى بويىنشا تاراپتار قازاقستان-پەرۋ ساياسي كونسۋلتاتسيالاردىڭ كەزەكتى وتىرىسىن 2019 جىلى ليما قالاسىندا وتكىزۋگە كەلىستى.