ب. ساعىنتاەۆ WorldSkills Kazakhstan چەمپيوناتىنىڭ جەڭىمپازدارىن ماراپاتتادى

ب. ساعىنتاەۆ ەلىمىزدىڭ بارلىق وڭىرلەرىنەن كەلگەن كوللەدجدەردىڭ ستۋدەنتتەرىنە سايىسقا قاتىسقاندارى ءۇشىن العىس ءبىلدىرىپ, بارلىق ۇيىمداستىرۋشىلاردى, دەمەۋشىلەر مەن قوناقتاردى رەسپۋبليكالىق چەمپيوناتتىڭ اياقتالۋىمەن قۇتتىقتادى. پرەمەر-مينيستر «اتامەكەن»  ۇلتتىق كاسىپكەرلەر پالاتاسىنىڭ جۋىردا وتكەن كەڭەيتىلگەن وتىرىسىندا بيزنەس وكىلدەرى شاقىرۋدى قابىل الىپ, كەلەسى جىلدان باستاپ WorldSkills Kazakhstan قاۋىمداستىعىمەن بىلىكتى كادرلاردى دايارلاۋ بويىنشا بەلسەنە جۇمىس ىستەيتىنىن حابارلادى.

WorldSkills Kazakhstan چەمپيوناتىنىڭ باستى ماقساتى - جۇمىسشى كاسىپتەرىنىڭ ابىرويىن ارتتىرۋ, جاس جۇمىسكەرلەرگە قازىرگى ەڭبەك نارىعىندا سۇرانىسقا يە پراكتيكالىق داعدىلار مەن جوعارى بىلىكتىلىكتەردى الۋ مۇمكىندىگىن بەرۋ.

قازاقستاننىڭ «World Skills» قوزعالىسىنا 2014 جىلى قوسىلعانى اتاپ ءوتىلدى. سوعان قاراماستان, ايتۋعا تۇرارلىق ناتيجەلەر بار. ەگەر 2015 جىلى سان-پاولودا وتكەن WorldSkills Competition ءبىرىنشى الەم چەمپيوناتىندا قازاقستاندىق كوماندا 50-ءشى ورىندا بولسا, 2017 جىلى ابۋ-دابيدە وتكەن جارىستا 24-ءشى ورىندى يەلەندى. سونىمەن قوسا, ەلىمىزدە كاسىپتىك-تەحنيكالىق جانە جوعارى ءبىلىمنىڭ دامۋى, بۇل كورسەتكىشتەردى ودان ءارى جاقسارتۋ ءۇشىن پەرسپەكتيۆالار اشىپ وتىر.

ۇزدىكسىز وقىتۋ مەن جاڭا كاسىپتەردى يگەرۋ قاجەتتىگىنە ەرەكشە نازار اۋدارىلدى. بۇل جۇمىس ۇردىستەرىنىڭ تەحنولوگيالىق جاڭارۋىمەن بايلانىستى. وسىعان بايلانىستى, ۇكىمەت جۇمىس بەرۋشىلەرمەن, شەتەلدىك ساراپشىلارمەن بىرلەسىپ قۇبىلمالى ەڭبەك نارىعىندا وتاندىق كادرلاردىڭ باسەكەگە قابىلەتتىلىگىن ارتتىرۋ ءۇشىن كاسىپتىك-تەحنيكالىق ءبىلىم بەرۋ باعدارلاماسىن ودان ءارى جەتىلدىرۋ بويىنشا جۇيەلى جۇمىستار جۇرگىزىپ وتىر.

قازاقستان پرەمەر-ءمينيسترى بىرقاتار چەمپيونات قاتىسۋشىلارىنىڭ كورنەكتى جۇمىستارىن ايرىقشا اتاپ ءوتىپ, جەڭىمپازدارعا التى قۇزىرەت بويىنشا ماراپاتتار تاپسىردى:

بيزنەسكە ارنالعان IT جوبالار (3 ورىن - ي. ابدۋلاباەۆ, 2 ورىن - ي. چۋپرىنين, 1 ورىن - م. سوكولوۆسكي);

ەلەكترونيكا (3 ورىن - ا. پروسەتسكي, 2 ورىن - و. حاليموۆ, 1 ورىن - پ. فەتيسوۆ);

ۆەب-ديزاين (3 ورىن - ن. مينەەۆ, 2 ورىن - ا. مۋنكو, 1 ورىن - ي. سيمانوۆ);

گرافيكالىق ديزاين (3 ورىن - ف. ەۆدوكيموۆ, 2 ورىن - ي. مەدحاتوۆ, 1 ورىن - د. بولات);

كومپيۋتەرلىك قۇرىلىمداۋ تەحنولوگياسىن قولدانۋمەن CAD ينجەنەرلىك گرافيكاسى (3 ورىن - س. جايلاۋوۆ, 2 ورىن - و. شاتەرنيكوۆ, 1 ورىن - د. زورين);

ناۋبايحانا ءىسى (3 ورىن - ي. بورودۋلينا, 2 ورىن - ا. مارقاباي, 1 ورىن - ا. امانعوسوۆا).

ماراپاتتاۋ سالتاناتىنا سونىمەن قاتار پارلامەنت سەناتىنىڭ دەپۋتاتى ب. ءايتىموۆا, پارلامەنت ءماجىلىسىنىڭ دەپۋتاتى ج. نۇرمانبەتوۆا, پرەمەر-ءمينيستردىڭ ورىنباسارى ە. دوساەۆ, ءبىلىم جانە عىلىم ءمينيسترى ە. ساعاديەۆ, ەڭبەك جانە حالىقتى الەۋمەتتىك قورعاۋ ءمينيسترى م. ابىلقاسىموۆا جانە باسقالارى قاتىستى.

رەسپۋبليكالىق چەمپيوناتتىڭ جەڭىمپازدارى 2019 جىلى قازاندا وتەتىن حالىقارالىق چەمپيوناتتا قازاقستان اتىنان سايىسقا تۇسەتىن بولادى.

كەلەسى قۇزىرەتتەر بويىنشا جەڭىمپازدار ماراپاتتالدى:

«مەحاترونيكا» - ا. بەتتسولد, ي. رايسوۆ, ا. چۋكالوۆسكايا, و. ليزوگۋب, د. كارليۋكا, ب. فيليپوۆ;

«ستانوكتارداعى توكارلىق جۇمىستار» - ت. ورىنوۆ, ي. گەراسيموۆ, يۋ. ۆاراۆين;

«دانەكەرلەۋ تەحنولوگيالارى» - ج. ەليپباەۆ, م. ومار, م. گۋسەلنيكوۆ;

«پليتكامەن قاپتاۋ» س. دۇيسەنبەكوۆ, ا. بايالى; د. تلەباەۆ, ي. تۇرعىن.

«شاناق جوندەۋ» — ق. ەستاەۆ, ج. ومىرزاقوۆ, ت. ماحامبەتوۆ.

«سانتەحنيكا جانە جىلىتۋ» — د. يسكانداروۆ.

«ەلەكترومونتاج» — د. شارىپوۆ, ا. فرەي, ن. بەگالى.

«كىرپىش قالاۋ» — د. ارال, ن. امانجولوۆ, ە. ەرعالي.

«قۇرعاق قۇرىلىس جانە سىلاق جۇمىستارى» — ۆ. ۆەسەلوۆ, ا. وزەمسكي, ج. تاۋباي.

«سىلاۋ جانە دەكوراتيۆتىك جۇمىستار» — ا. سيسەنوۆ, س. وتەۋليەۆا, ب. قاجەنوۆ.

ء«موبيلدى روبوتوتەحنيكا» — ا. پومورزين, ۆ. ليۋبەنكو, ا. بەيسەنباي, ب. بەكەتوۆ, ن. بۋرا, ە. وحريمەنكو.

«شاشتاراز ونەرى» — ن. نۇرمۇحانوۆا, ل. ۋپوروۆا, و. ارتىقباي.

«ديزاين جانە كيىمدى مودەلدەۋ» — ج. ماكسۋت, ن. تيتەنكو, ا. ءمۇسلىم-بي.

«كونديتەرلىك ءىس» — ك. قابيەۆا, ە. بايمەتوۆ, ت. پرۋساكوۆا.

«جەڭىل اۆتوكولىكتەردى جوندەۋ جانە قىزمەت كورسەتۋ» — ك. بۋلات, ە. بەكتان, و. مركيم.

«اسپاز ءىسى» — س. توكتارقانوۆ, ا. سۆەچكار, ا. اسىلبەكوۆ, يۋ. گاپونوۆ, ب. جاندار.

«مەيرامحانا سەرۆيسى» — ا. سارباسوۆ, ە. پيدجاكوۆا, ا. پەرپەليۋكوۆ.

«سۋىتۋ جانە جەلدەتۋ تەحنيكاسىنا قىزمەت كورسەتۋ» — ا. ميناەۆ.

«جەلىلىك جانە جۇيەلىك باسقارۋ» — ا. ستەپانيۋك, گ. لەپەتين, ا. شولوح, ر. انۋاربەكوۆ, ت. باتالينا, ا. رۋدياكوۆ.

ء«ۆيزۋالدى مەرچەندايزينگ جانە ۆيترينيستيكا» — ت. انتونوۆا.

«وتەل-رەسەپشيونيست» — سەرۆانا سانايلوۆا.

«اۋىل شارۋاشىلىعى ماشينالارى مەن تراكتور جوندەۋشى» — ن. شىنىبەك.

«ديزەلدى قوزعالتقىشتاردى جوندەۋ جانە قىزمەت كورسەتۋ» — ك. وگنەۆ.

«استىق پەن ونىڭ وڭدەلگەن ونىمدەرىنىڭ ساپاسىن انىقتاۋ» — گ. ەريشەۆا.

ءىس-شارا الاڭىندا قر ينۆەستيتسيالار جانە دامۋ ءبىرىنشى ۆيتسە-ءمينيسترى رومان سكليار جاڭا ونەركاسىپتىك رەۆوليۋتسيا جاعدايلارىندا ءبىر ماماندىقتى عانا ەمەس, ارالاس كاسىپتەردى, سونىمەن قاتار جاڭا تەحنولوگيالارمەن جۇمىس ىستەۋ داعدىلارىن وقىپ-ۇيرەنۋ اسا قاجەتتىگىن اتاپ ءوتتى.

«ارينە, قازاقستاندا جۇمىسشى ماماندىقتار قازىر اسا قاجەت. ەڭبەك جولىن مەتاللۋرگ رەتىندە باستاپ, جوعارى جەتىستىكتەرگە قول جەتكىزگەن ءوز تاجىريبەسىن مىسالعا كەلتىرە وتىرىپ, مەملەكەت باسشىسى تۇڭعىش پرەزيدەنت, جاڭا مەملەكەتتىڭ قۇرۋشىسى بولعانىن اتاپ ءوتتى. ول ءوز ۇلگىسىن كورسەتتى. جاستار مۇنى وتە جاعىمدى قابىلدايدى جانە ۋاقىت لەبى بىرنەشە ماماندىقتى يگەرۋ قاجەتتىگىن تالاپ ەتىپ وتىر. قازىر بۇرىنعى جىلدارداعىداي, ءبىر ماماندىقتى يگەرۋ ءومىر بويى جەتەدى دەۋدىڭ قاجەتى جوق. ارينە, كەي جاعدايدلاردا بۇل دۇرىس تا بولار, بىراق قازىر جاستار جاڭا ماماندىقتاردى يگەرىپ, بۇكىل ءومىر بويى وقىعىسى, ءوز كاسىبى مەن مۇمكىن, وعان سالالاس كاسىپتەردەردىڭ جاڭا مۇمكىندىكتەرىن مەڭگەرۋدى قالايدى. قازىر بايقاپ وتىرعانىمىزداي, ونەركاسىپكە جاڭا ماماندىقتار كەرەك: تسيفرلاندىرۋ مەن ونەركاسىپتىك كاسىپورىندار دامىپ جاتىر, اۋىل شارۋاشىلىعى كاسىپورىندارى دا, باسقا دا كولىك-لوگيستيكالىق كەشەندەر دە جاڭا كاسىپتەردى يگەرۋگە ۇندەپ وتىر. جاستاردىڭ ماقساتى ايقىن, ارينە, مۇنداي بايقاۋلار ءوزىنىڭ بولاشاق ماماندىعىن ءالى تاڭداماعانداردى جىگەرلەندىرەدى», — دەدى ر. سكليار.

ءوز كەزەگىندە, شارانى ۇيىمداستىرۋشىلار, وعان قاتىسۋشىلار جانە ساراپشىلار PrimeMinister.kz تىلشىلەرىنە بايقاۋدىڭ قانداي دەڭگەيدە وتكەنىن ايتىپ بەردى جانە مۇنداي چەمپيوناتتاردىڭ كادرلار دايارلاۋ ساپاسىن ارتتىرۋ ءۇشىن ماڭىزدىلىعىن اتاپ ءوتتى.

قاراعاندى كولىك-تەحنولوگيالىق كوللەدجىنىڭ وقىتۋشىسى, ساراپشى اقبار تاشەن «جەڭىل اۆتوموبيلدەر» قۇزىرەتىندە بايقاۋعا قاتىسۋشىلار اۋىسپالى بەرىلىس قورابىن قۇراستىرعانىن ايتتى. ونىڭ ايتۋىنشا, بۇل وتە قيىن. بىراق, قاتىسۋشىلار ءوز ءىسىن جاقسى بىلەدى, قازىرگى تەحنيكالاردى جاقسى يگەرگەن.

«بۇل چەمپيوناتتى وتكىزۋ — مىندەتتى تۇردە جالعاستىرۋ قاجەت ءارى ماڭىزدى ءىس. جاستاردى وقىتىپ, ولاردىڭ داعدىلارىن جەتىلدىرۋ - بۇل ۇلكەن جۇمىس. چەمپيونات وتكىزىلگەن ءتورت جىلدان بەرى قازاقستاندا اسا اۋقىمدى جۇمىستار اتقارىلعان. ءبىز جوعارى ناتيجەلەرگە قول جەتكىزدىك, بىراق ءالى دە ىستەلۋى كەرەك ىستەر بار, شەبەرلىكتى شىڭداۋ قاجەت. باسقا ەلدەردىڭ, ازيا جانە ەۋروپا ەلدەرىنىڭ تاجىريبەسىنەن ۇيرەنۋ كەرەك. «جەڭىل اۆتوموبيلدەر» قۇزىرەتىندە بايقاۋعا قاتىسۋشىلار اۋىسپالى بەرىلىس قورابىن قۇراستىردى. بۇل وتە قيىن. بىراق, قاتىسۋشىلار ءوز ءىسىن جاقسى بىلەدى, قازىرگى تەحنيكالاردى جاقسى يگەرگەن», — دەدى ا. تاشەن.

الماتى قالاسىنان كەلگەن تەحنيكالىق دەلەگات قۋاتبەك ءابىلدينوۆ بايقاۋدىڭ ۇيىمداستىرۋشىلىق بولىگى قالاي قالىپتاستىرىلعانىن ايتتى. ول قازاقستاندىق چەمپيوناتتىڭ ەۋروپالىق ستاندارتتار دەڭگەيىندە وتكەنىن اتاپ ءوتتى.

«بۇل بايقاۋدا ءبىز تەحنيكالىق ماسەلەلەردى: راسىمدەردىڭ ساقتالۋىن, ساراپشىلار جۇمىسىن, الاڭداعى جۇمىستى ۇيىمداستىرۋمەن اينالىستىق. ءبىزدىڭ پىكىرىمىزشە, چەمپيونات وتە جوعارى دەڭگەيدە ءوتتى. ەگەر بۋداپەشتە وتكەن ەۋروپالىق چەمپيوناتپەن سالىستىرساق, وندا ءبىزدىڭ چەمپيونات شامامەن سونداي دەڭگەيدە ءوتتى. قاتىسۋشىلارعا حالىقارالىق ستاندارتتار بويىنشا تالاپتار قويىلدى. باعدارلاما سونداي-اق ەۋروپا چەمپيوناتى پەن ابۋ-دابيدە وتكەن الەم چەمپيوناتىنا ساي كەلدى. تاپسىرمالاردىڭ ءبىر بولىگى تمد چەمپيوناتىنىڭ تاپسىرمالارىنا ۇقساس بولدى. الەم چەمپيوناتتارىنىڭ تاجىريبەسىندە تەحنيكالىق قۇزىرەتتەر بويىنشا تاپسىرمالاردىڭ تولىق ورنىدالۋى سيرەك كەزدەسەدى. سەبەبى, ولار كۇردەلى. ءبىزدىڭ چەمپيوناتتا كوپتەگەن قاتىسۋشىلار ءوز تاپسىرمالارىن تولىق اياقتاي العانىنا مەن تاڭقالدىم. بۇل تۇستا قاتىسۋشىلاردىڭ وڭىرلەردە پسيحولوگيالىق دايىندىقتان ءوتۋى ۇلكەن ءرول وينادى دەپ ويلايمىن. چەمپيوناتتا مەنى تاڭقالدىرعان تاعى ءبىر جايت, قاتىسۋشىلاردىڭ ءبىر-بىرىنە قولداۋ كورسەتۋى, ءبىر-بىرىنە باسەكەلەس نەمەسە قارسىلاس دەپ قاراماۋى بولدى. ولار ارالاسىپ, تاجىريبەلەرىمەن ءبولىسىپ, بىلمەگەندەرىن ءبىر-بىرىنە كورسەتىپ جاتتى», — دەدى ق. ءابىلدينوۆ.

تورەشى, تۇركىستان وبلىسىنان كەلگەن تەحنيكالىق دەلەگات ايدوس اپپازوۆ قازاقستاندا كاسىپتىك-تەحنيكالىق ءبىلىم بەرۋ دەڭگەيى كوتەرىلىپ كەلە جاتقانىن ايتتى.

«WorldSkills Kazakhstan جوباسى قازاقستاننىڭ كاسىپتىك-تەحنيكالىق ءبىلىمىنىڭ ءيميدجىن كوتەرۋگە باعىتتالعان. مىنە, ءتورتىنشى جىل ءبىز قازاقستاننىڭ تۇكپىر-تۇكپىرىنەن كەلگەن كوللەدجدەردىڭ شاكىرتتەرىنىڭ وسىنداي الاڭدا ءوز شەبەرلىكتەرىن قالاي كورسەتىپ جۇرگەنىنە كۋا بولىپ ءجۇرمىز. بۇل بولاشاقتا حالىقارالىق جارىستارعا قاتىسۋعا مۇمكىندىك بەرەدى. مەن ەكى قۇزىرەتكە تورەشى بولدىم: مەحاترونيكا جانە ەلەكترومونتاج. «ەلەكترومونتاج» قۇزىرەتىندە قاتىسۋشىلار كوپ بولدى دا, بىزگە تورەلىك ەتۋ ءبىراز قيىنعا ءتۇستى. سونىمەن قاتار, ەلەكترومونتاجدا پريبوردىڭ جۇمىسىن رەتتەيتىن ۇساق بولشەكتەر وتە كوپ. بىراق ءبىزدىڭ بالالار ونى دا يگەردى. «مەحاترونيكا» قۇزىرەتىندە قاسىتۋشىلار كومپيۋتەرلىك قۇرىلعىنىڭ كومەگىمەن جۇمىس ىستەيتىن تۇتاس ستانتسيا قۇراۋى ءتيىس ەدى. بۇل اسا قىزىقتى بولدى. كاسىپتىپ-تەحنيكالىق ءبىلىم دەڭگەيى كوتەرىلىپ كەلەدى, جابدىقتار دا زامانعا ساي, بالالار حالىقارالىق ستاندارتتارعا سايكەس دايىندالعان», — دەپ سانايدى ا. اپپازوۆ.

ساراپشى, كەنتاۋ پوليتەحنيكالىق كوللەدجىنىڭ ارنايى پاندەر بويىنشا وقىتۋشىسى نۇرجان سىزدىقوۆ مەملەكەت تاراپىنان تەحنيكالىق ماماندىقتارعا ءتۇسىپ جاتقان ستۋدەنتتەرگە كورسەتىلىپ وتىرعان قولداۋدىڭ ماڭىزدىلىعىن اتاپ ءوتتى. وقىتۋشىنىڭ ايتۋىنشا, جاستار مۇنى سەزىنىپ وتىر.

«ەلەكترومونتاج, ەلەكترونيكا جانە روبوتوتەحنيكا مودۋلدەرى بويىنشا ستۋدەنتتەردى دايارلاۋ كەزىندە جاۋاپكەرشىلىكى سەزىلەدى, سەبەبى ستۋدەنتتەرگە الەمدىك ستاندارتتاردىڭ تالاپتارىنا ساي ءبىلىم بەرۋ كەرەك. ءبىز حالىقارالىق ستاندارتتاردى ۇستانۋعا تىرىسامىز. بۇگىندە ستۋدەنتتەردىڭ دەڭگەيى ءبىرشاما كوتەرىلىپ كەلەدى, ال وقۋدى بىتىرگەن سوڭ ولار ءوز ءىسىنىڭ ناعىز شەبەرى بولادى. WorldSkills Kazakhstan ستۋدەنتتەر ءۇشىن ءوز بىلىمدەرىن تەكسەرۋدىڭ ەڭ جوعارعى دەڭگەيى بولىپ تابىلادى, ءبىز ءۇشىن دە بۇل باعالاۋ شىعارى, سەبەبى, وقىتۋ كەزىندە ولارمەن بىرگە ءبىز دە ۇيرەنەمىز. بىزدە ءدۋالدى وقىتۋ جۇيەسى بار, ستۋدەنتتەردىڭ 60%-دان استامى زاۋىتتار مەن ونەركاسىپتىك كاسىپورىنداردا تاعىلىمدامادان وتەدى, دەمەك, ءوز داعدىلارىن ەداۋىر ارتتىرادى. ءبىزدىڭ ستۋدەنتتەر 3 كۋرستان باستاپ وقي ءجۇرىپ جۇمىس ىستەي باستايدى. بۇگىندە ينجەنەرلىك ماماندىقتاردىڭ مارتەبەسى ايتارلىقتاي جوعارى كوتەرىلگەنىن سەنىمدى تۇردە ايتۋعا بولادى, ستۋدەنتتەردىڭ باسىم بولىگى وسىنداي كاسىپتەردى تاڭداۋدا, سەبەبى, ەلىمىزدە وعان سۇرانىس بار, وزەكتىلىگى سەزىلۋدە, مەملەكتەتىڭ قولداۋى دا زور, جالاقىسى دا بۇرىنعىدان جوعارلادى», — دەدى ن. سىزدىقوۆ

«بيزنەسكە ارنالعان ات-جوبالار» قۇزىرەتىنىڭ كۇمىس جۇلدەگەرى يليا چۋپرىنين ءوز كەزەگىندە چەمپيوناتتىڭ قالاي وتكەنىن جانە قاتىسۋشىلارعا قانداي تاپسىرمالار بەرىلگەنىن ايتىپ بەردى.

«بايقاۋ اياسىندا ءبىز اۋەجاي جاساپ, اۋەجاي جۇمىسىن تولىق اۆتوماتتاندىردىق, ياعني, بىزگە قولدانۋشىلاردى, تاپسىرىستاردى, بورتسەرىكتەر ءۇشىن ەسەپتەردى جانە ءاربىر ۇشۋعا قانشا رەسۋرس كەتۋى مۇمكىن ەكەنىن قابىلداۋ كەرەك بولدى. سونىمەن قاتار ءبىز قوسىمشا قىزمەتتەر مەن رەيستەردى رەزەرۆتەۋ ءۇشىن موبيلدىك قوسمىشا جاسادىق. جوبالار پايدالانىلا الادى, ولاردى تولىق اياقتاۋ قاجەت. بىزگە 3 ساعاتقا 6 تاپسىرما بەرىلدى. جىلدام جۇمىس ىستەدىك. 10 ادام بولدىق, باعدارلامالاۋ تىلىندە جۇمىس ىستەدىك. قازىر ستۋدەنتتەر بۇل ماماندىقتا وقۋدى باتىل تاڭداي الادى, ويتكەنى مەملەكەت باعدارلامانى اۋىستىردى. ءبىز ەسكى ستاندارتتاردان باس تارتىپ, جاڭا پاندەردى تەرەڭىرەك ءارى ساپالى وقيمىز. ماعان ءبارى ۇنايدى», — دەدى ي. چۋپرىنين.

«بيزنەسكە ارنالعان ات-جوبالار» قۇزىرەتىنىڭ تاعى ءبىر قاسىتۋشىسى, قوستاناي ق. يندۋستريالىق-پوليتەحنيكالىق كوللەدجدىڭ 2 كۋرسىنىڭ ستۋدەنتى ارتەم كوسارەنكو بايقاۋ تاپسىرمالارى نارىقتىڭ جاڭا سۇرانىستارىنا ساي كەلگەنىن ايتتى, بۇل چەمپيوناتتى كادرلار دايارلاۋ تۇرعىسىنان اسا پايدالى ەتتى.

«قازىر مەن ەسەپتەۋ تەحنيكاسى جانە باعدارلامالىق قامتۋ بويىنشا وقىپ جاتىرمىن. بايقاۋدا ءبىزدىڭ تاپسىرمامىز ويداعى تاپسىرىس بەرۋشىنىڭ تاپسىرىسىن ورىنداۋ بولدى, تاپسىرىس بەرۋشى فيرما, اۋە كومپانياسى ەدى, بىزگە ۇشۋ, قونۋ پروتسەستەرىن, بيلەت ساتىپ الۋ پروتسەسىن اتۆوماتتاندىرۋ كەرەك بولدى. تەحنيكتەر مەن پروگرامميستەر 21 عاسىردا, جاڭا تەحنولوگيالار عاسىرىندا قاشاندا سۇرانىسقا يە بولادى», — دەدى ءوز ارىپتەسىن قولداعان ا. كوسارەنكو.

كادرلاردى, ء ارى وسىنداي الاڭداردا دايارلاۋدىڭ ماڭىزدىلىعى تۋرالى «ستانوكتارداعى توكارلىق جۇمىستار» قۇزىرەتى بويىنشا جۇلدەگەر تەمىرحان ورىنوۆ ايتىپ بەردى.

«مەن بۇل ماماندىقت ول ءبىزدىڭ ۋاقىتىمىزدا سۇرانىسقا يە بولعان سوڭ تاڭدادىم. بۇل داعدىلاردى يگەرگەن سوڭ ءوز قالاۋىڭا ساي كەلەتىن جۇمىستى تابۋعا بولادى, ونىڭ ۇستىنە, قازىر ءبارىنىڭ اۆتوماتتاندىرىلعان فورماتقا كوشىپ جاتقانى ۇنايدى, سەبەبى بۇل جۇمىستى ەداۋىر جەڭىلدەتەدى. مۇنداي ماماندىقتار وتە كەرەك, مەن جاستارعا تاڭداعان جۇمىسشى كاسىبىندە قولداۋ كورسەتۋ دۇرىس دەپ سانايمىن. بولاشاقتا بۇل ەل دامۋىنا وڭ اسەرىن تيگىزەتىن بولادى», — دەپ ءوز پىكىرىن ءبىلدىردى ت. ورىنوۆ.

جامبىل وبلىسىنان كەلگەن قاتىسۋشى تالعات ماحامبەتوۆ «شاناق جۇمىستارى» قۇزىرەتىندە قاتىسۋى تۋرالى ايتىپ بەردى جانە قازاقستاندا وسى جۇمىسشى ماماندىعىنىڭ دامۋ پەرسپەكتيۆالارى تۋرالى ويىن جەتكىزدى.

«مۇندا 30 كاسىپ ءتۇرى مەن 350 قاتىسۋشى بولدى. مەنىڭ كاسىبىم اۆتو ىسىمەن بايلانىستى. بىزدە بايقاۋدا 7 وبلىستان 7 قاتىسۋشى بولدى. قازىر بۇل ماماندىق جوق, بىراق بۇل ماماندىق وتە قاجەت. بۇل كاسىم «شاناق جۇمىستارىن سىرلاۋ» دەپ اتالادى, ول تەك سوڭعى جىلدارى ەنە باستادى. بۇرىن مۇنداي كىسىپ تۋرالى ەشكىم بىلمەيتىن, ەگەر بۇل كاسىپ ستۋدەنتتەردىڭ قىزىعۋشىلىعىن تۋدىرسا, مەن قۋانار ەەدىم, سەبەبى, نارىقتا مۇنداي ماماندار جوقتىڭ قاسى. ول نارىق بوس ءارى اشىق دەۋگە بولادى, ونىڭ ۇستىنە, قازىر دامۋ ءۇشىن, ءتىپتى, ءوز ىسىڭمەن اينالىسۋ ءۇشىن بارلىق جاعداي بار», — دەدى ت. ماحامبەتوۆ.

«اسپاز ءىسى» قۇزىرەتى بويىنشا التىن مەدال يەگەرى اەليتا امانعوسوۆا بايقاۋ اياسىندا قازاقستاننىڭ ءتۇرلى وبلىستارىنان كەلگەن 14 ادام 3 كۇن بويى ءتۇرلى تاعامدار ازىرلەگەنىن اياتتى, ولاردىڭ ىشىندە نان ونىمدەرى مەن قامىر ازىرلەۋدىڭ كۇردەلىرەك تەحنيكالارى بولدى.

بايقاۋ تۋرالى ءوز اسەرلەرىمەن جۇلدەگەر, «ديزاين جانە كيىمدى مودەلدەۋ» قۇزىرەتى بويىنشا التىن مەدال يەگەرى اراي ءمۇسىلىم-بي دە ءبولىستى .

«مەن الماتى قالاسىنداعى ءسان جانە ديزاين كوللەدجىندە كيىم ديزاينەرى قۇزىرەتى بويىنشا وقيمىن. ءبىز 14 قاتىسۋشى بولدىق جانە بارلىعى دا جەڭىمپاز بولۋعا لايىقتى بولدى. جارىس كەزىندە كويلەك تىگۋ كەرەك بولدى, بىراق ونىڭ تەحنولوگيالىق جانە كونسترۋكتسيالىق قيىندىقتارى بار ەدى. بۇل ماماندىق قازاقستاندا اسا قاجەت, ءبىزدىڭ ەلىمىزگە حالىقارالىق نارىقتارعا شىعۋ كەرەك, بۇل ءۇشىن بارلىق جاعدايلار بار. تەك سونى بارىنشا قالاپ, وقۋ كەرەك. بۇل قيىن ەمەس», — دەدى ا. ءمۇسىلىم-بي.

«ديزاين جانە كيىمدى مودەلدەۋ» قۇزىرەتى بويىنشا چەمپيوناتتىڭ تاعى ءبىر قاتىسۋشىسى جانايىم ماقسۇت WorldSkills Kazakhstan جاستار ءۇشىن زور مۇمكىندىكتەر اشاتىنىن ايتتى.

«ماعان ءوز كاسىبىم وتە ۇنايدى, بالا كەزىمنەن تىگۋدى ۇناتاتىن ەدىم. ءبىرىنشى مودۋلدە ءبىز ەسكيزدەرىن سالدىق, ەكىنشىسىندە - كويلەك تىكتىك, ءۇشىنشى مودۋلدە - بۇرمەلەدىك. قازاقستاندىق جاستاردىڭ مۇنداي, شىنىمەن دە قاجەتتى ءارى سۇرانىسقا يە كاسىپتەرگە تەگىن وقي الاتىنى كەرەمەت. مەن بۇل جوباعا قاتىسقانىما اسا قۋانىشتىمىن. WorldSkills شىنىمەن دە جاستار ءۇشىن زور مۇمكىندىكتەر اشادى», — دەدى ج. ماقۇست.

سەمەي قالاسىنان كەلگەن قاتىسۋشىلاردىڭ ءبىرى ءانۋار سارباسوۆ چەمپيوناتتىڭ قىزمەت كورسەتۋ سالاسىنداعى الەمدىك ستاندارتتاردى زەردەلەپ, ءوز داعدىلارىنىڭ ساپاسىن كوتەرۋگە مۇمكىندىك بەرەتىنىن ايتتى, بۇل ەڭبەك نارىعىنداعى مۇمكىندىكتەردى مولايتادى.

«قازىر قازاقستاندا مەيرامحانا سەرۆيسى دامىپ جاتىر جانە جەتكىلىكتى سۇرانىسقا يە…. بولاشاقتا ءوز مەكەمەمدى اشقىم كەلەدى. بىزدە وتە كوپ مودۋل بولدى, نەگىزىنەن, ول داياشى, باريست جانە بارمەن. مەن بۇل داعدىلاردىڭ ءبارىن كورسەتتىم. مەن ەۋروپالىق سەرۆيس داعدىلارىنىڭ ءبىر بولىگىن, سونداي-اق WorldSkills ستاندارتتارىن, الەمدىك ستاندارتتاردى الدىم. بىزگە ءبارىن وقىتادى. مەن ەكى جىل دايىندالدىم», — دەدى ءا. سارباسوۆ.

30 ءتۇرلى جابدىقتالعان سەكتورلارى بار الاڭداردى جاساۋ جۇمىس ىستەپ تۇرعان بيزنەستىڭ قولداۋىنىڭ ارقاسىندا مۇمكىن بولعانىن ايتا كەتكەن ءجون. Knauf كومپانياسىنىڭ وقۋ ورتالىعىنىڭ باسشىسى ولەگ سوتنيكوۆ كاسىپورىننىڭ ساراپشىلىق, تەحنيكالىق قولداۋ كورسەتەتىنىن جانە 2016 جىلدان بەرى WorldSkills Kazakhstan جوباسىن رەسمي جەتكىزۋشى بولىپ تابىلاتىنىن ايتتى. ول چەمپيوناتقا ماتەريالدار ۇسىنادى.  

ء«بىرىنشى كەزەڭ قۇرعاق قۇرىلىس بويىنشا جاڭا ماماندىقتى ەنگىزۋ بولدى. وقۋ ورتالىقتارىمەن بەلسەندى جۇمىستار جۇرگىزىلىپ جاتىر. كومپانيا قازاقستانداعى وقۋ ورىندارىنىڭ بازاسىندا استانا, الماتى, قوستانايدا رەسۋرستىق ورتالىقتار قۇردى. سونىمەن قاتار جاڭا بىلىمدەر مەن تەحنولوگيالاردى يگەرۋگە نيەتتى وقۋ ورىندارىمەن جۇمىستار جۇرگىزىلىپ جاتىر. ءبىزدىڭ كومپانيا ەڭ باسىنان, 2015 ج. بەرى چەمپيوناتتى وتكىزۋگە بەلسەنە اتسالىسىپ كەلە جاتىر. 2018 ج. ءبىز قاتىسۋشىلاردىڭ دەڭگەيى الدقايدا جوعارى ەكەنىن كورىپ وتىرمىز. وقۋ ورىندارى قاجەتتى بىلىمدەر مەن قۇزىرەتتەر الىپ, لايىقتى ونەر كورسەتە الادى. كەلەسى جىلى قازاندا ءبىز العاشقى ۇشتىكتىڭ قاتارىنان كورىنەمىز دەپ ۇمىتتەنەمىن», — دەدى و. سوتنيكوۆ.

FEST Group نەمىس كومپانياسىنىڭ ورتالىق ازياداعى وقۋ بولىمشەسىنىڭ ديرەكتورى ستانيسلاۆ كۋسكوۆ ءوز كەزەگىندە چەمپيونات قاتىسۋشىلارىنا قانداي پەرسپەكتيۆالار اشىلىپ وتىرعانىن ايتىپ بەردى. كومپانيا سوڭعى ءۇش جىلدان بەرى «مەحاترونيكا» قۇزىرەتى بويىنشا WorldSkills Kazakhstan قاۋىمداستىعىمەن بەلسەندى ىنتىماقتاستىق ورناتقان.

ء«بىرىنشى كەزەكتە, ءبىز KAZ Minerals, قازمىرىش, قازاقمىس ءتارىزدى ونەركاسىپتىك كاسىپورىندارمەن اۆتوماتتاندىرۋ سالاسىندا جۇمىس ىستەيمىز. ءبىز كاسىپورىنداردا بىلىكتى ماماندار حالىقارالىق دەڭگەيدە بولۋى كەرەكتىگىن تۇسىنەمىز, جانە بۇل جاعدايدا جارىستىڭ دەمەۋشىسى بولا وتىرىپ, ءبىز جابدىقتاردى دا, حالىقارالىق سەرتيفيكاتى بار باس ساراپشى كومەگىن دە ۇسىنامىز. ءبىز شتاتقا مەحاترونيكا بويىنشا جۇمىسكەرلەر الامىز, بۇگىن ءبىز بالالاردى بايىپتادىق. بىراق ءبىز مۇنداي بالالاردى ونەركاسىپ ءۇىشن دايىندايمىز. ءبىز ءبىرىنشى كەزەكتە, بالالاردى دايىندايمىز, ولار ءۇشىن وسى كومپانيالاردا جۇمىس ىستەۋ الەۋەتى زور. ولار ەرتەڭ كاسىپورىندارعا بارادى جانە حالىقارالىق دەڭگەيدەگى ماماندار بولادى», — دەدى س. كۋسكوۆ.