بۇگىن شىمكەنتتە قالالىق قازاقستان حالقى اسسامبلەياسى, «نۇر وتان» پارتياسى قالالىق فيليالى جانە تۇرىك ەتنومادەني بىرلەستىگى قر تاۋەلسىزدىك كۇنىنە وراي «ەتنوسارالىق كەلىسىم – تۇراقتىلىق نەگىزى» تاقىرىبىندا جيىن وتكىزدى.
ءىس-شارادا تاۋەلسىزدىك جىلدارى قول جەتكىزگەن ۇلى جەتىستىكتەر جايى كەڭىنەن ءسوز بولدى. جيىندا شىمكەنت قالالىق تۇرىك ەتنومادەني بىرلەستىگىنىڭ توراعاسى لاتيفشا اسانوۆ وسى جىلدار ىشىندەگى باستى تابىسىمىز – قازاقستان حالقىنىڭ بىرتۇتاستىعى بولعانىن اتاپ ءوتتى.
- بيىل ءبىز – ەل تاۋەلسىزدىگىنىڭ 27 جىلىنا اياق باسقالى وتىرمىز. وسى جىلدارى اسسامبلەيا ەلىمىزدە بەيبىتشىلىك پەن مىزعىماس تاتۋلىقتى ورنىقتىرۋدا ءبىتىمى بولەك ينستيتۋت بولىپ قالىپتاسىپ, ەلىمىزدىڭ وركەندەۋىنە زور ۇلەس قوستى. بۇگىندە ميلليوننان استام تۇرعىنى بار شىمكەنت قالاسىن دامىتۋ ماقساتىندا اۋقىمدى جۇمىستار قولعا الىنىپ, جاڭا جوبالار ىسكە اسۋدا. وسى باعىتتاعى ينۆەستيتسيا تارتۋ مەن حالىققا قىزمەت كورسەتەتىن سالالاردا كاسىبى بار اسسامبلەيا مۇشەلەرى وسىنداي باستامالارعا بارىنشا جۇمىلىپ, ورتاق وتانىمىزدى كوركەيتۋگە لايىقتى ۇلەس قوسىپ كەلەدى, - دەدى تۇرىك ەتنومادەني بىرلەستىگىنىڭ باسشىسى.
مەرەكەلىك شارا اياسىندا «حالىقتىق برەند» تاقىرىبىندا جەرگىلىكتى تاۋار وندىرۋشىلەردىڭ كورمەسى ۇيىمداستىرىلدى. وعان كاسىپكەرلىكپەن اينالىسىپ جۇرگەن ءتۇرلى ەتنوس وكىلدەرى قاتىستى. كاسىپكەرلەر وزدەرى ءوندىرىپ جاتقان تاۋارلاردى جۇرتشىلىق نازارىنا ۇسىنىپ, بيزنەستەگى تاجىريبەلەرىمەن ءبولىستى.
كورمەدە كوپشىلىك زاماناۋي ۇلگىدەگى اياق كيىمنىڭ 200 ءتۇرلى مودەلىن وندىرەتىن «سپ «Lux SHOES» فابريكاسىنىڭ ونىمدەرىنە ەرەكشە قىزىعۋشىلىق تانىتتى. تۇركيا كاسىپكەرلەرىمەن بىرلەسە جۇمىس ىستەپ جاتقان شىمكەنتتىك كاسىپورىن ونىمدەرى تاياۋدا شەتەلگە دە ەكسپورتتالماق. فابريكا باسشىسى زاحيد ەرگاشەۆ وسىنداي بەرەكەلى باستامالار ەلىمىزدەگى تۇراقتىلىق پەن ەتنوسارالىق تاتۋلىقتىڭ جەمىسى دەپ سانايدى.
نۇرشات توكەن,
«ەگەمەن قازاقستان»