ەلوردا ەمحانالارىندا تىركەۋ ناۋقانى اياقتالدى

ناۋقان كەزىندە الماتى قالاسىنىڭ, شىمكەنت قالاسى مەن تۇركىستان وبلىسىنىڭ, قاراعاندى جانە الماتى وبلىستارىنىڭ, سونداي-اق استانا قالاسىنىڭ تۇرعىندارى بەلسەندىلىك تانىتقان. كامپانيا ناتيجەسى بۇل باستامانىڭ استانا, الماتى سەكىلدى ءىرى قالالار ءۇشىن عانا ەمەس, ايماقتار ءۇشىن دە ماڭىزدى ەكەنىن  كورسەتتى.  

قازىرگى ۋاقىتتا ەمحانانىڭ تىركەۋ بولىمدەرى ارقىلى تىركەلۋ توقتاتىلدى. ناۋقانعا قاتىسقان قازاقستاندىقتاردىڭ باسىم بولىگى ەمحاناعا وزدەرى بارىپ تىركەلسە, 13,5 مىڭعا جۋىعى ونلاين قىزمەتتى تاڭداعان (egov.kz پورتالى ارقىلى).

مسق استانا فيليالى ديرەكتورى نۇرلىبەك قابدىقاپاروۆتىڭ ايتۋىنشا, بۇگىنگى كۇنگە دەيىن استانا قالاسى بويىنشا ەمحاناعا تىركەۋ ناۋقانى كەزىندە 40248 ازامات تىركەلگەن, ولاردىڭ ىشىندە Egov.kz پورتالى ارقىلى تىركەلگەندەر دە بار. سونداي-اق 26487 تۇرعىن  مەديتسينالىق-سانيتارلىق العاشقى كومەك ۇيىمى مەن ماماندى ەركىن تاڭداۋ قۇقىعىن پايدالانعان. ال ناۋقان اياسىندا تىركەلگەن 13668 ادام – تۇراقتى نەمەسە ۋاقىتشا مەكەن-جايى, جۇمىسى, وقۋ ورنى وزگەرۋىنە بايلانىستى ەمحانالارىن اۋىستىرعان تۇلعالار. ناۋقان شەڭبەرىندە ەمحانالارعا تىركەلگەن ازاماتتارعا 2019 جىلدىڭ 1 قاڭتارىنان باستاپ قىزمەت كورسەتىلەدى. ازاماتتار تىكەلەي جۇگىنسە, ولاردى مساك ۇيىمدارىنا بەكىتكەن كەزدە بۇرىن بەكىتىلگەن مساك ۇيىمدارىنان ەسەپتەن شىعارۋ «بەكىتىلگەن حالىق تىركەلىمى» پورتالىنىڭ دەرەكقورى ارقىلى اۆتوماتتى تۇردە جۇزەگە اسىرىلادى.

بيىلعى تىركەۋ ناۋقانىنا 31 ەمدەۋ مەكەمەسى قاتىستى. تىركەلگەندەر سانى بويىنشا استانا قالاسىنداعى № 6, 10 جانە 4 ەمحانالار الدىڭعى ۇشتىكتە.

جالپى, تىركەۋ ناۋقانى – ەمحانا اۋىستىرۋدىڭ جالعىز جولى ەمەس. قازاقستاندىقتاردىڭ جىلىنا ءبىر رەت ەمحانا اۋىستىرۋعا مۇمكىندىگى بار. سونىمەن قاتار, قونىس اۋدارعاندا, ەمحانا جابىلىپ قالسا نەمەسە مسق-مەن كەلىسىمشارتتى بۇزسا, جاقىن ماڭنان جاڭا ەمحانا سالىنسا, ەمحانا قىزمەتىنە قاتىستى شىعىنداردى جاباتىن ەرىكتى مەديتسينالىق ساقتاندىرۋ كەلىسىمشارتىن بەكىتكەن جاعدايدا باسقا ەمحاناعا اۋىسۋعا بولادى.

«الەۋمەتتىك مەديتسينالىق ساقتاندىرۋ قورى» كەاق-مەن كەلىسىمشارتقا وتىرعان مەديتسينا ۇيىمدارىنىڭ تولىق ءتىزىمىن مەديتسينالىق ساقتاندىرۋ قورىنىڭ fms.kz سايتىنان تابۋعا بولادى. ولار كەپىلدەندىرىلگەن تەگىن مەديتسينالىق كومەك شەڭبەرىندە حالىققا قىزمەت كورسەتپەك.