تۋعان جەردى تۇلەتۋ, ءسانى مەن سالتاناتىن ارتتىرىپ, ادامداردىڭ الاڭسىز كۇن كەشۋىنە جاعداي جاساۋ − ەر-ازاماتتاردىڭ بورىشى. وبلىستا مۇنداي جاقسى مىسالدار جەتكىلىكتى. تاياۋدا وبلىس ورتالىعىنداعى «دوستىق» ۇيىندە قازاقستان حالقى اسسامبلەياسىنىڭ اقمولا وبلىستىق بولىمشەسىنىڭ ۇيىمداستىرۋىمەن ەل جايىن ويلاعان جومارت جۇرەكتى جانداردى ماراپاتتاۋدىڭ ءساتى ءتۇستى.
كىندىك قانى تامعان اتا جۇرتتىڭ اجارى مەن بازارى ورتايماۋى كەرەكتىگى تۋرالى ەلباسى نۇرسۇلتان نازارباەۆ «رۋحاني جاڭعىرۋ» باعدارلاماسىندا دا جان-جاقتى ايتقان بولاتىن. تۋعان ولكەسىن تۇلەتىپ, ءوڭىر ءومىرىن جاقسارتۋعا اتسالىسۋشىلار وسى باعدارلامادان كەيىن تىڭ سەرپىنمەن ءوز ۇلەستەرىن قوسا باستادى. «جومارت جۇرەك» بايقاۋى − ەلىم دەپ ەمىرەنگەن ازاماتتاردىڭ ەل دامۋىنا قوسقان ۇلەسىن سارالاپ, سالماقتاۋعا باعىتتالعان ماڭىزدى جوبالاردىڭ ءبىرى. بۇل كەشتە ەل بولاشاعىنا بەيجاي قاراي المايتىن ازاماتتاردىڭ اتقارعان ەڭبەكتەرى جالپاق جۇرتقا ايگىلى بولدى.
– سوڭعى ەكى جىلدىڭ ىشىندە وبلىستا جالپى قۇنى 5,5 ميلليارد تەڭگەنى قۇرايتىن 96 الەۋمەتتىك جوبا جۇزەگە اسىرىلدى, – دەدى وبلىس اكىمىنىڭ ورىنباسارى اينا ءمىسىرالىموۆا قۇتتىقتاۋ سوزىندە, – ولاردىڭ باسىم بولىگى ءبىلىم, مادەنيەت, سپورت سالالارى. ءبىر عانا تسەلينوگراد اۋدانىنىڭ وزىندە جالپى قۇنى 500 ميلليون تەڭگەنى قۇرايتىن 9 جوبا ىسكە اسىرىلدى.
سالتاناتتى شارادا «جىل مەتسەناتى» اتالىمى بويىنشا ساندىقتاۋ اۋدانىنىڭ «سۆوبودنوە» سەرىكتەستىگىنىڭ ديرەكتورى الەكساندر زاكۋسيلوۆ, ەسىل اۋدانى «زارەچنىي» سەرىكتەستىگىنىڭ ديرەكتورى ءۋاليحان ءارىپوۆ, «تۋعان ولكە» اتالىمى بويىنشا قورعالجىن اۋدانىنان جەكە كاسىپكەر قۇرالاي تۇسىپبەكوۆا مەن «گرۋپپا كومپاني...» سەرىكتەستىگى ديرەكتورلار كەڭەسىنىڭ جەتەكشىسى ارداق بالتابەكوۆ جانە تسەلينوگراد اۋدانى «كوكشە جەمچۋگ» سەرىكتەستىگى باسشىسىنىڭ ورىنباسارى قانات جاكەنوۆ, تسەلينوگراد اۋدانىنان ىسكەر ازامات باۋىرجان يساباەۆ پەن «ساندىقتاۋ» سەرىكتەستىگىنىڭ ديرەكتورى جامۋل مۋسحانوۆ ماراپاتتالدى. تسەلينوگراد, ساندىقتاۋ اۋدانىنىڭ اكىمدىكتەرى «تۋعان جەر» باعدارلاماسى بويىنشا ۇزدىكتەر قاتارىنان كورىندى.
بايقال ءبايادىل,
«ەگەمەن قازاقستان»
اقمولا وبلىسى