وڭىرلىك تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىعىن قورعاۋ دەپارتامەنتىنىڭ حابارىنشا, ەلەكتر ەنەرگياسىن تاسىمالدايتىن «پاۆلودار ەلەكتر قۋاتىن تاراتۋ جەلىلەرى كومپانياسى» اق تاريفتەرىن 10 پايىزعا ارزانداتقان.
ەلباسى جولداۋ بارىسىندا ەلىمىزدەگى ەلەكتر قۋاتىن وندىرەتڭن ستانسالارعا تاريفتەردى تومەندەتۋ جايىندا تاپسىرما بەرگەنى بەلگىلى.
ەلەكتر قۋاتىنىڭ ارزانداۋى-ستانسالاداردىڭ قۋاتتى بوساتۋ تاريفىنە تىكەلەي بايلانىستى. ناتيجەسىندە, بيىل ءتورتىنشى توقساندا ەلەكتر قۋاتىنىڭ ءتاريفى 1 كۆت/ساع ەلەكتر قۋاتىنىڭ قۇنى 10,5 تەڭگەدەن 9,8 پايىزعا تومەندەگەن.
سونىمەن بىرگە, جىلۋ باعاسى ءۇشىن دە مونوپوليستەر ءتاريفتى 2,6 پايىزعا ازايتتى. وبلىس ورتالىعىنداعى «ەلەكتر قۋاتىن تاراتۋ كومپانياسى» اق-تا ءتاريفتىڭ وسىمىنەن الىنعان قارجىنى ماقساتتى جۇمساپ, بيىل 2 ملرد. 606 ميلليون تەڭگەنىڭ جوبالارى جوسپارلانىپ, ىسكە اسىرىلعان.
كاسىپورىنداعى بارلىق جۇمىس نەگىزگى قۇرىلعىلاردىڭ توزۋىن تومەندەتىپ, ەلەكتر قۋاتىن جوعالتۋ كورسەتكىشتەرىن كەمىتۋگە, قۇرال-جابدىقتاردىڭ ۇزدىكسىز جۇمىسىن ارتتىرۋعا باعىتتالعان.
2015-2018 جىلدار ارالىعىندا جەكە جانە زاڭدى تۇلعالارعا 11 مىڭ 71 تەحنيكالىق قۇجات بەرىلگەن. قوسىمشا 1547, 5 مۆت قۋات بەرىلۋدە. ەلەكتر قۋاتىن تۇتىنۋشىلار جىل سايىن وسۋدە.
ال, قالالىق پروكۋراتۋرا تاريفتەردى قالىپتاستىرۋ زاڭدىلىقتارىنا جۇرگىزگەن تەكسەرىستەر بارىسىندا بىرقاتار كەمشىلىكتەردى انىقتاپتى.
بىراق, بۇل كەمشىلىكتى كاسىپورىن باسشىلارى زاڭسىز ارەكەت دەپ سانامايدى. مونوپوليالار تۋرالى زاڭدا, نورماتيۆتىك اكتىلەردە «جوسپارلانعان كولەمدى كوبەيتۋ زاڭبۇزۋشىلىق» دەپ جازىلماعان.
ويتكەنى, ۇلعايتىلعان كولەم جونىندە اقپارات جىل سايىن تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىعىن قورعاۋ دەپارتامەنتىنە جىبەرىلەدى.
فاريدا بىقاي,
«ەگەمەن قازاقستان»
پاۆلودار