وڭىردە ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا ايتىلعان مىندەتتەر جۇزەگە اسىرىلا باستادى. جەلتوقسان ايىنان باستاپ جىلۋ بەرۋ قىزمەتىنىڭ تاريفتەرى 37 پروتسەنتكە ارزانداماق.
قالانىڭ باسىم بولىگىن جىلۋمەن قامتىپ وتىرعان «كوكشەتاۋ جىلۋ» كومپانياسى تۇتىنۋشىلارعا ءبىرشاما جەڭىلدەتىلگەن تاريف ۇسىنىپ وتىر. بۇل جاڭالىقتى ەستىپ قۇلاقتانعان قالا تۇرعىندارى ەلباسى جولداۋىنىڭ شاراپاتىن سەزىندى. الداعى ۋاقىتتا جىلۋ ولشەۋىش قۇرىلعىلارى بار جەكە تۇلعالار 1 گيگاكاللوري ءۇشىن بۇرىنعى 2101 تەڭگەنىڭ ورنىنا 1329 تەڭگە تولەيتىن بولادى. ايىرماسى ايتا قالارلىقتاي. ال, مۇنداي قۇرىلعىلارى جوق قالا تۇرعىندارى ءۇشىن دە بۇرىنعى تولەم مولشەرى تومەندەيدى. ياعني, بۇرىن ورتا ەسەپپەن تولەماقى ورتا ەسەپپەن 4520 تەڭگەنى قۇراسا, بۇدان بىلاي 2858 تەڭگەگە دەيىن ارزانداماق.
–زاڭدى تۇلعالار ءۇشىن جىلۋ ولشەگىش قۇرىلعىسى بويىنشا تاريف كولەمى 5244 تەڭگەدەن 3316 تەڭگەگە دەيىن تومەندەيدى. بۇل دەگەنىڭىز 36,7 پروتسەنتكە ارزان,–دەيدى تابيعي مونوپوليالاردى رەتتەۋ كوميتەتى اقمولا وبلىستىق دەپارتامەنتى باسشىسىنىڭ ورىنباسارى اسەت قۇراشەۆ,–ال, قۇرىلعى ورناتپاعان زاڭدى تۇلعالار ءۇشىن جىلۋ باعاسى 9395 تەڭگەدەن 5941 تەڭگەگە دەيىن ارزاندايدى. مىنە, وسىلايشا ەلباسى جولداۋىندا بەلگىلەنگەن مىندەتتەر جۇزەگە اسىرىلۋدا.
جىلۋمەن بىرگە ىستىق سۋدىڭ باعاسى دا ارزانداماق. ولشەم قۇرىلعىسى بار تۇرعىندار 1 كۋب.مەتر ىستىق سۋ ءۇشىن 142 تەڭگە, ال, قۇرىلعى ورناتپاق پاتەر يەلەرى 450 تەڭگە تولەماقى تولەيدى. جاڭا تاريفتەر ۇستىمىزدەگى جىلدىڭ 1 جەلتوقسانىنان باستاپ قولدانىسقا ەنەتىن بولادى.
بايقال ءبايادىل,
«ەگەمەن قازاقستان»
اقمولا وبلىسى