بۇگىن «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ اقمولا وبلىسىنىڭ تسەلينوگراد اۋدانىنا قاراستى اقمول اۋىلىنا ارنايى بارىپ, جەرگىلىكتى اۋىل شارۋاشىلىعى قىزمەتكەرلەرىمەن كەزدەستى. ولاردى الدا كەلە جاتقان كاسىبي مەرەكەلەرىمەن قۇتتىقتاپ, وسى سالادا تابىستى جۇمىس ىستەپ تۇرعان «شاڭىراق» سەرىكتەستىگىنىڭ جۇمىسىمەن تانىستى.
جالپى اۋىل شارۋاشىلىعىنىڭ ەلىمىزدىڭ ەكونوميكاسىندا الار ورنى ەرەكشە. سول سەبەپتى دە ەلباسى بۇل سالانى ۇدايى باستى نازاردا ۇستاپ, ونىڭ جان-جاقتى دامۋىنا بارلىق جاعدايدى جاساپ كەلەدى. «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن» ارتتىرۋ اتتى جولداۋىندا دا مەملەكەت باسشىسى اگروونەركاسىپ كەشەنىنىڭ الەۋەتىن تولىق ىسكە اسىرۋدى الدىمىزعا مىندەت ەتىپ قويدى. سونىڭ ىشىندە ەڭبەك ونىمدىلىگىن جانە قايتا وندەلگەن اۋىل شارۋاشىلىعى ءونىمىنىڭ ەكسپورتىن 2022 جىلعا قاراي 2,5 ەسە كوبەيتۋدى جانە الداعى ءۇش جىل ىشىندە اتالعان سالانى دامىتۋعا جىل سايىن قوسىمشا كەمىندە 100 ميلليارد تەڭگە قاراستىرۋدى تاپسىردى. وسى ماقساتتاردىڭ ناتيجەلى جۇزەگە اسىرىلۋىنا «نۇر وتان» پارتياسى دا تىكەلەي مۇددەلى.
اقمول اۋىلىنا ارنايى كەلگەن ماۋلەن اشىمباەۆ «شاڭىراق» باسقارۋشى كومپانياسىنا قاراستى جۇمىرتقا قورابىن دايىندايتىن تسەحتىڭ, قۇس ەتىن وندىرەتىن زاۋىتتىڭ جانە شۇجىق شىعاراتىن كاسىپورىننىڭ جۇمىسىمەن تانىستى. بۇل ءوندىرىس وشاقتارىنىڭ بارلىعى دا زامان تالاپتارىنا ساي جاڭا, تسيفرلى تەحنولوگيالارمەن جابدىقتالىپ, تابيعي تازا, ساپالى ءونىم شىعارىپ وتىر. كاسىپورىننىڭ ونىمدەرى استانا قالاسى جانە اقمولا وبلىسىمەن بىرگە اقتوبە, قوستاناي, قاراعاندى, باتىس قازاقستان, سولتۇستىك قازاقستان وبلىستارى مەن الماتى, شىمكەنت قالالارىنا جەتكىزىلەدى. ءتىپتى الىس-جاقىن شەتەلدەرگە دە ەكسپورتالاتىنىن اتاپ وتكەن ءجون.
«نۇر وتان» پارتياسى توراعاسىنىڭ ءبىرىنشى ورىنباسارى كاسىپورىن قىزمەتكەرلەرىمەن كەزدەسىپ, ولاردى اۋىل شارۋاشىلىعى قىزمەتكەرلەرى كۇنىمەن قۇتتىقتادى. سونداي-اق ول جولداۋدا ايتىلعان اۋىل شارۋاشىلىعىن دامىتۋعا قاتىستى باسىمدىقتاردىڭ ماڭىزىنا توقتالىپ ءوتتى.
– بۇگىندە ەلباسىنىڭ باستاماسىمەن اۋىل شارۋاشىلىعىنا ەرەكشە كوڭىل ءبولىنىپ, اۋقىمدى جۇمىستار اتقارىلۋدا. مەملەكەت باسشىسى جاڭا جولداۋىندا دا وسى سالاعا تسيفرلى تەحنولوگيالاردى ەنگىزىپ, بىلىكتى ماماندار تارتۋدى جانە قوماقتى قارجى ءبولۋدى تاپسىردى. بۇل باستامالار اۋىل شارۋاشىلىعىن جاڭا دەڭگەيگە كوتەرىپ, ەكونوميكامىزدىڭ دامۋىنداعى نەگىزگى سالا رەتىندە قالىپتاسۋىنا مول مۇمكىندىك بەرەدى. وسىلايشا مەملەكەت باسشىسى قازاقستاننىڭ الەمگە تەك شيكىزاتتار مەن مينەرالدى رەسۋرستار ەكسپورتتايتىن ەل رەتىندە عانا ەمەس, سونداي-اق ساپالى, تابيعي تازا, دايىن اۋىل شارۋاشىلىعى ونىمدەرىن دە شىعاراتىن مەملەكەت رەتىندە دە تانىلۋىن قامتاماسىز ەتۋدى الدىمىزعا ماقسات ەتىپ قويدى. بۇل – ءبىزدى باسەكەگە قابىلەتتى, دامىعان 30 ەلدىڭ قاتارىنا باستايتىن ماڭىزدى قادام, – دەدى ماۋلەن اشىمباەۆ.
سونىمەن قاتار پارتيا توراعاسىنىڭ ءبىرىنشى ورىنباسارى وسىنداي يگى ىستەردى جۇزەگە اسىرۋدا پارتيا فيليالدارى مەن باستاۋىش ۇيىمدارى بەلسەندى جۇمىس ىستەيتىنىن جەتكىزدى.
– ەلباسىنىڭ سەنىمدى تىرەگى جانە ەلىمىزدىڭ جەتەكشى ساياسي كۇشى رەتىندە «نۇر وتان» پارتياسى اۋىل شارۋاشىلىعىن قولداۋعا باعىتتالعان بارلىق باستامانى جۇزەگە اسىرۋعا اتسالىسىپ, وسى سالاداعى جۇمىستاردى قوعامدىق باقىلاۋعا الادى. وسىلايشا نۇروتاندىقتار پرەزيدەنتىمىزدىڭ بارلىق ستراتەگيالىق باعدارلاماسىن ورىنداۋعا ءوز ۇلەستەرىن قوسادى, – دەدى ماۋلەن اشىمباەۆ.
«شاڭىراق» سەرىكتەستىگى تاۋىق ەتى, شۇجىق جانە جۇمىرتقا ءوندىرىسى بويىنشا ەلىمىزدەگى الدىڭعى قاتارلى ءوندىرىس وشاقتارىنىڭ ءبىرى. كاسىپورىن باسشىسى دەنيس پلۋجنيكتىڭ ايتۋىنشا, مەكەمە استانا قالاسىن قۇس ەتى ونىمدەرىمەن قامتۋدا ماڭىزدى ءرول اتقارىپ وتىر. ءتىپتى ەلوردامىزداعى قۇس ەتىنەن تاعام دايىندايتىن الەمگە ايگىلى اسحانانىڭ ءوزى وسى «شاڭىراقتىڭ» ونىمدەرىن تۇتىنادى ەكەن. سونداي-اق كاسىپورىن باسشىسى مەكەمەنىڭ «نۇر وتان» پارتياسىمەن تىعىز بايلانىس ورناتقانىن دا اتاپ ءوتتى.
– كومپانيادا باستاۋىش پارتيا ۇيىمى جۇمىس ىستەيدى. بارلىق پارتيالىق ءىس-شارالارعا بەلسەنە قاتىسىپ تۇرامىز. بيىل پارتيا قىزمەتىن جاڭعىرتۋ اياسىندا قولعا الىنعان جاڭا جوبالاردى جۇزەگە اسىرۋعا دا ءوز ۇلەسىمىزدى قوستىق. سونىڭ ناتيجەسىندە اۋىلىمىزدا ءىت-سىنىپ اشىلىپ, جەرگىلىكتى بالالاردىڭ زاماناۋي ماماندىقتاردى يگەرۋىنە مۇمكىندىك تۋدى, – دەيدى دەنيس پلۋجنيك.
ساپار سوڭىندا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ كومپانيانىڭ بەلسەندى قىزمەتكەرلەرىنە پارتيا اتىنان العىس ءبىلدىرىپ, ارنايى ماراپاتتادى.