اق جايىقتىڭ جاستارىندا جىگەر كوپ

كەڭەيتىلگەن وتىرىستىڭ باستى تاقىرىبى – 2017-2020 جىلدارعا ارنالعان جاستاردى قولداۋ جونىندەگى جول كارتاسىنىڭ ورىندالۋ ماسەلەلەرى بولدى. جاستاردى جۇمىسپەن قامتۋ, ۆولونتەرلىك قوزعالىستى, digital باستامالاردى دامىتۋ, جاستار اراسىندا وتانسۇيگىشتىك پەن سالاۋاتتى ءومىر سالتىن ناسيحاتتاۋ سەكىلدى سان-سالالى تاقىرىپتى قامتىعان كەڭەس وتىرىسىنا قاتىسۋشىلار وتە بەلسەندىلىك تانىتتى. ولاردىڭ ءبارى دە «جاستاردىكى» دەپ ۇكى تاعىلعان الداعى جىلدان ەرەكشە ءۇمىت كۇتەدى.

باتىس قازاقستان وبلىسىنىڭ اكىمى التاي كولگىنوۆ ءوزى جۇرگىزىپ, بارلىق اۋدان, سالالىق باسقارما باسشىلارى تۇگەل قاتىسقان جيىندا ءتيىستى سالا جەتەكشىلەرىنىڭ وسى كەزگە دەيىن اتقارعان جۇمىستارىنىڭ بايانداماسى تىڭدالدى. جىل باسىنان قاراشا ايىنىڭ باسىنا دەيىن وڭىردە مەملەكەتتىك باعدارلامالار اياسىندا 10 مىڭنان استام جاس جۇمىسپەن قامتىلعان ەكەن. بۇعان قوسا وبلىستىڭ مەديتسينا, پەداگوگيكا, اۋىل شارۋاشىلىعى سالالارىنا قاجەتتى مامانداردى دايىنداۋ ءۇشىن جەرگىلىكتى بيۋدجەتتەن 100 ءبىلىم گرانتى بولىنگەن. قازىردىڭ وزىندە اق جايىق وڭىرىندە جاستارعا ارنالعان 8 كوۆوركينگ ورتالىعى اشىلعان, ونىڭ التاۋى – اۋدان-اۋىلداردا قىزمەت ەتىپ تۇر. «قولجەتىمدى سپورت» باعدارلاماسى اياسىندا 50-دەن اسا سپورت نىساندارى پايدالانۋعا بەرىلگەن.

باتىس قازاقستان وبلىستىق جاستار ساياساتى ماسەلەلەرى باسقارماسىنىڭ باسشىسى ايان ساقوشەۆتىڭ ايتۋىنشا, اق جايىق وڭىرىندە 136 مىڭنان استام جاس بار. ونىڭ 3,1 پايىزى ەش جەردە جۇمىس ىستەمەيدى. بىراق بۇل ەلىمىز بويىنشا جاقسى كورسەتكىش. جاستار اراسىنداعى جۇمىسسىزدىق سوڭعى ءۇش جىلدا ەكى ەسەگە دەيىن ازايعان. وڭىردە «باتىس قازاقستان وبلىسى جاستارىن دامىتۋدىڭ 2017-2020 جىلدارعا ارنالعان جول كارتاسى» جۇزەگە اسىرىلۋدا. جول كارتاسى جاستاردى جۇمىسپەن, ساپالى ءارى قولجەتىمدى بىلىممەن قامتۋ, جاستاردىڭ بوس ۋاقىتتارىن ءتيىمدى ۇيىمداستىرۋ, جەكە جانە كاسىبي تۇرعىدان وسۋگە جاعداي جاساۋ سىندى 4 نەگىزگى باعىتتان تۇرادى.

ايان ساقوشەۆ ءوز سوزىندە ورال قالاسىندا, بوكەي ورداسى, جاڭاقالا, زەلەنوۆ اۋداندارىندا جەرگىلىكتى اتقارۋشى بيلىك جاستاردىڭ بوس ۋاقىتىن ءتيىمدى ۇيىمداستىرۋ ماسەلەسىنە جەتكىلىكتى كوڭىل بولمەي وتىرعانىن ايتتى. جاستار اراسىندا جۇرگىزىلگەن ساۋالناما ناتيجەلەرى وسىنى كورسەتكەن. بۇل رەتتە قازتالوۆ اۋدانى وزگەلەرگە ۇلگى ەتۋگە تۇرارلىق: مۇندا جىل باسىنان بەرى جاستارعا ارنالعان جۇمىس جارمەڭكەسى 5 مارتە ۇيىمداستىرىلىپ, 250 جاس جۇمىس تاپقان. قازتالوۆ اۋدانىنىڭ اكىمى ابات شىنىبەكوۆ «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» اياسىندا سوڭعى ەكى جىل ىشىندە اۋدان جاستارى 91 ملن. تەڭگە نەسيە الىپ, ءوز ءىسىن باستاعانىن, 20 جۇمىس ورنىن اشقانىن جەتكىزدى. وسى ۋاقىت ىشىندە اۋدانعا «ديپلوممەن اۋىلعا» باعدارلاماسى بويىنشا 150 جاس مامان كەلىپتى. ونىڭ 90-ى – مۇعالىمدەر, 47-ءسى – مەديتسينا قىزمەتكەرى.

جالپى, جاستار اراسىندا كاسىپكەرلىكتى قولداۋ ماسەلەسى وڭىردە جاقسى جولعا قويىلعان. «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» اياسىندا وبلىستا 8,5 مىڭداي جاس جۇمىسپەن قامتۋ شارالارىنا تارتىلعان. ونىڭ 6,3 مىڭعا جۋىعى جۇمىسقا ورنالاستىرىلعان. «بيىلعى توعىز ايدا «باستاۋ بيزنەس» جوباسى بويىنشا كاسىپكەرلىك نەگىزدەرىنە وقۋعا 507 جاس جولدانىپ, 100 ادام نەسيە السا, 10-ىنا مەملەكەتتىك گرانت بۇيىردى» - دەيدى باتىس قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى التاي قۇلقاەۆ.

جيىندا جاستار وكىلدەرى دە وتە بەلسەندى بولىپ, ءوز ويلارى مەن ۇسىنىستارىن اشىق ءبىلدىرىپ وتىردى. جۋرناليست, باتىس قازاقستان وبلىسى اكىمدىگى جانىنداعى جاستار ىستەرى جونىندەگى كەڭەس مۇشەسى گالينا مانتسەۆا, ينجەنەر اقجول جانداۋوۆ, قازتالوۆتىق جاس كاسىپكەر ينديرا الىبەكوۆا, جاستار بي توبىنىڭ جەتەكشىسى اسان ساماتوۆ, ستۋدەنت ايگەرىم لۇقپانوۆا, «زەنيت» زاۋىتى جاستار كوميتەتىنىڭ توراعاسى سەرىك داۋلەتياروۆ جانە باسقالارى جاستار ءومىرىنىڭ ءار سالاسىنا بايلانىستى ءوز كوزقاراسى مەن پىكىرىن ءبىلدىردى. بۇل پىكىرلەردىڭ قاي-قايسىسى دا ءوڭىر باسشىسىنىڭ قولداۋىنا يە بولدى. ماسەلەن, جاستاردىڭ بۇقارالىق سپورتپەن اينالىسۋىنا سوڭعى كەزدەرى ورال قالاسىندا وتە قولايلى جاعداي جاسالىپ جاتقانى ريزاشىلىقپەن ايتىلسا, التاي كولگىنوۆ تاياۋ بولاشاقتا شاعان وزەنىن بويلاپ ۆەلوجولاقتار مەن جاياۋ جۇرگىنشىلەرگە ارنالعان سەيىل الاڭدارى سالىناتىنىن حابارلادى. وبلىس باسشىسى سونداي-اق ورال قالاسىنىڭ تابيعي جاعدايى ترياتلون سپورتىن دامىتۋعا وتە قولايلى ەكەنىن ايتادى.

– 2019 جىلدىڭ جاستار جىلى دەپ جاريالانۋى جاستار ساياساتىنا ۇلكەن سەرپىن بەرەرىنە سەنىم مول. ءبىز قازىرگى تاڭدا وبلىسىمىزداعى جاستارعا قاتىستى ماسەلەنىڭ بارلىعىن زەرتتەپ, زەردەلەپ, بىرقاتارىن ىسكە اسىرۋدامىز. ەلىمىزدىڭ, سونىڭ ىشىندە ءوڭىرىمىزدىڭ جاس ازاماتتارىن تولعاندىراتىن ناقتى ماسەلەلەردى شەشۋمەن اينالىسۋىمىز قاجەت. بۇگىنگى جيىندا جاستار ورىندى ۇسىنىستار ايتتى. ءبىز ولاردىڭ ءبارىن ءوز جوسپارىمىزعا ەنگىزەمىز. جىل سوڭىنا دەيىن ءبىز جاستاردىڭ وبلىستىق فورۋمىن ۇيىمداستىرامىز. ول جيىندا جاستار ءوز وي-پىكىرىن اشىق ايتىپ, كەڭىنەن تالقىلاۋى ءتيىس. ال كەلەسى جىلى ورال قالاسىندا شەكارالىق وڭىردەگى, سونىڭ ىشىندە كورشى مەملەكەت جاستارى دا باس قوسادى. جاستاردىڭ ءبىر بىرىمەن تانىسىپ, تاجىريبە الماسىپ, بولاشاق دامۋى ءۇشىن مۇنداي باسقوسۋلار وتە قاجەت, - دەدى ءوڭىر باسشىسى التاي كولگىنوۆ.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى

سۋرەتتى تۇسىرگەن تەمىربولات توقمامبەتوۆ