قازاقستان ءتۋريزمىن دامىتۋداعى كەزەكتى قادام

         قازاقستاننىڭ اتالمىش كورمەگە قاتىسۋىنىڭ ستراتەگيالىق ماڭىزى زور. اسپاناستى ەلى بىزگە كورشى بولعانىمەن, ستاتيستيكاعا سۇيەنسەك, قىتايلىقتار قازاقستانعا قاراعاندا, موڭعولياعا ءجيى ساياحاتتايدى ەكەن (قىتايدان موڭعولياعا كەلەتىن تۋريستەر جالپى ساننىڭ 52% قۇرايدى). وسى رەتتە شانحاي كورمەسىندەگى نەگىزگى لەك قىتاي كومپانيالارى بولعاندىقتان, قازاقستاندى ساياحاتتاۋعا جاقسى تاڭداۋ ەكەنىن جەتكىزۋ باستى مەجە. بۇل ماقساتتا قۇرامىندا «Kazakh Tourism» ۇلتتىق كومپانياسىنىڭ جانە بىرنەشە تۋريستىك فيرمانىڭ وكىلدەرى بار قازاقستان دەلەگاتسياسى جوسپارلى تۇردە دايىندىق جۇرگىزدى. قازاقستان ستەندىندە ۇلتتىق بۇيىمدارمەن جابدىقتالعان كيىز ءۇي جانە الماتى وبلىسىنداعى ايعايقۇم بەينەسىندەگى فوتوايماق ورناتىلعان, مەيمانداردى  «ارلان جەتە» تەاترى ارتىستەرى قارسى الۋدا. تاڭدالعان باعىت تا قازىرگى ۋاقىتتا سۇرانىسقا يە باعىتتاردىڭ ءبىرى - قازاقستاندى ەتنومادەني ەلەمەنتتەرى بار ەكوتۋريزم ورتالىعى رەتىندە تانىستىرۋ نەگىزگە الىنىپ وتىر.  

         «بيىل وسىمەن ەكىنشى رەت قىتايداعى كورمەگە قاتىسۋىمىز. وسىعان دەيىن بەيجىڭدە روۋد-شوۋ وتكىزىپ, قازاقستانعا قىتايلىق ميلليونەر-بلوگەرلەردى دە شاقىردىق. قىسقى دەمالىس پەن تاۋ-شاڭعى ءتۋريزمى باعىتى بويىنشا جۇمىس ىستەيتىن تۋروپەراتورلارعا ارنايى تۋر ۇيىمداستىرۋ دا جوسپاردا بار. قازاقستانعا دەگەن قىزىعۋشىلىق تۇراقتى تۇردە ارتۋدا, سول سەبەپتى جوعارىدا اتالعان جۇمىس كەلەر جىلى ءوز ناتيجەسىن بەرەدى دەپ كۇتۋدەمىز», - دەدى «Kazakh Tourism» ۇك» اق توراعا ورىنباسارى قايرات سادۋاقاسوۆ.

         كورمەدە #Travel2Kazakhstan حەشتەگى بويىنشا قوناقتار اراسىندا بايقاۋ وتكىزىلىپ, ۇلتتىق تاعامداردان ءدام تاتۋعا مۇمكىندىك بار. قازاقستاندى تاپتىرماس تۋريستىك باعىت رەتىندە تانىستىراتىن ۆيدەوروليكتەر كورسەتىلىپ, قىتاي تىلىندە اقپارات قاعازدارى ۇلەستىرىلۋدە. بۇدان بولەك Abdi Travel, Explore Central Asia, Intertourasia, QTrip, Uni tour, SkyWay Travel, Triumph Travel تۋريستىك فيرمالارى ءوز توپتامالارىن ۇسىنباق.