شەراعاڭ – شاربولاتتاي شامىرقانىپ سويلەگەندە شىندىقتىڭ شىراقشىسىنا, اقيقاتتىڭ الداسپانىنا اينالعان قازاق ءباسپاسوزىنىڭ باس ءباھادۇرى, سايىپقىران ساردارى شەرحان مۇرتازا اعامىز باقيلىق بولعالى دا قىرىق كۇن ءوتىپتى. قىرىق كۇن بۇرىن قايران شەراعاڭ ءوزى ايتقان ء«بىر كەم دۇنيەدەن» وزىپ, عاپىلدان عايىپقا, پانيدەن باقيعا – ايشا اناسى مەن تۇرار كوكەسى مەكەن ەتكەن ماڭگىلىك عارىشقا ساپار شەگە باردى. سول كۇنى حالىق قادىرلى قايراتكەر قالامگەرىمەن قيماي قوشتاستى. اقباس الاتاۋ مەن ارۋ الماتى ەلمەن بىرگە ەگىلىپ تۇردى...
قىلشىلداعان جيىرما-جيىرما بەستەرىندە جاسىنداي جارقىلداعان, وتىزىندا وردا بۇزعان, قىرقىندا قامال العان, ەلۋىندە حالقىنىڭ ارقاسۇيەر ەرى بولىپ, الپىسىندا اقىلمان ابىزىنا اينالعان شەراعاڭنىڭ ۇلتتىڭ ۇلى مۇراتى جولىندا نامىس نايزاعايىن شاتىرلاتپاعان كەزى ءسىرا جوق شىعار. زاڭعار جازۋشىلىعىن بىلاي قويعاندا, شەرحان مۇرتازا ەسىمى تاۋەلسىزدىككە دەيىنگى جانە كەيىنگى قازاق ءباسپاسوزىنىڭ جارتى عاسىردان استام دەرلىك تۇتاس ءداۋىرىن ايشىقتايتىن تۇعىرلى تۇلعاسى. وسى جىلدار ىشىندە شەراعاڭنىڭ شەكپەنىنەن شىققان جازۋشى-جۋرناليستەردىڭ تولقىن-تولقىن قوسىنى جاساقتالدى, ولاردىڭ اراسىندا فاريزا وڭعارسىنوۆا, اقسەلەۋ سەيدىمبەك, ورالحان بوكەي سىندى كورنەكتى شوعىرى ۇلت رۋحانياتىنىڭ ايتۋلى تۇلعالارى دارەجەسىنە جەتتى. شەراعاڭنىڭ شەكپەنىنەن شىعۋ قازاق جۋرناليستەرى ءۇشىن باقىت, ماقتانىش. ال «شەراعاڭنىڭ شەكپەنىنەن شىققان» دەگەن ءسوز ورىس ادەبيەتىنىڭ التىن عاسىرىنداعى ف.دوستوەۆسكي ايتقان: ء«بارىمىز گوگولدىڭ «شينەلىنەن» شىققانبىز» دەيتىن ايگىلى افوريزمىمەن بىردەي قازاق قاناتتى سوزدەرىنىڭ التىن ساندىعىن نۇرلاندىرادى.
بىزگە شەرحان مۇرتازا اعامىزدىڭ تاۋەلسىزدىكتىڭ ەلەڭ-الاڭ اراي تاڭىنداعى الماعايىپ وتپەلى كەزەڭدە وتانىمىزدىڭ باس گازەتىنىڭ باعىتىن ايقىنداپ, باسىندا تۇرعان جىلدارداعى كاتەپتى قارانار قىزمەتى ايرىقشا قىمبات. ول باسقارعان جىلدار گازەتكە ۇلكەن سەرپىلىس اكەلدى. جولبارىس جۇرەكتى, ابىز تىلەكتى, بالۋان بىلەكتى شەراعاڭ وسى كەزدە ەگەمەندىككە ءبىرجولا بەت بۇرعان ەلدىك ساياساتتىڭ باتاگوي ۇرانشىسى بولعانى انىق. كەڭەستىك كەردەڭ ساياساتتىڭ كەتەۋى كەتە قويماعان سوتسياليستىك قوعامدا تۇرىپ-اق بۇل ءسوتسياليزمنىڭ نيەتى ءتۇزۋ بولعانىمەن, حالىق سەنىمىن اقتاماعانىن گازەت بەتىندە العاش ايعايلاتىپ اشىق ايتقان دا شەرحان مۇرتازا. ەلباسى نۇرسۇلتان نازارباەۆپەن ەلدىگىمىز بەن بىرلىگىمىز, تاۋەلسىزدىك مۇراتتارى, ەگەمەن ەلدىڭ باسقا دا سان قيلى ماسەلەلەرى حاقىندا كەڭ كولەمدى, تەمىرقازىق ماقساتتى ايقىندار ماعىنالى سۇحباتتار جاساپ ۇيىمداستىرۋدىڭ, مەملەكەت باسشىسىنىڭ شەتەلدەردەگى العاشقى ساپارلارىن كەلىستى كورسەتۋدىڭ بۇرىن بولماعان كەرەمەت ۇلگى-ۇردىستەرىن باستاپ بەرگەن دە شەرحان اعا. سول ساپارلاردا شەتتەگى قانداستارىمىز جايلى ايتقان دا, ولاردىڭ اتامەكەنگە دەگەن شەرلى ساعىنىشىن العاش جەتكىزگەن دە ايكول شەراعاڭ.
بۇگىندە شەرحان مۇرتازانىڭ «رەداكتورلاردىڭ رەداكتورى» دەپ اتالۋى وتە ءادىل باعا! ول شىن مانىندەگى حالىق ءسۇيىپ وقيتىن وقىلىمدى, باتىل يدەيالى, ءوزى سياقتى ءباھادۇر گازەت جاساۋدىڭ حاس شەبەرى بولدى. رەداكتور رەتىندەگى باستى ەرلىكتەرىنىڭ ءبىرى – سوتسياليستىك قوعامنىڭ سىرەسكەن مۇزى ءالى جىبىمەگەن كەزدە «سوتسياليستىك قازاقستان» گازەتىنىڭ اتاۋىن بار قاجىر-قايراتىن جۇمساي وتىرىپ, «ەگەمەندى قازاقستان» دەپ اۋىستىرۋى دەر ەدىك. بۇل 1991 جىلدىڭ 18 ماۋسىمى بولاتىن. سودان بەرى ەل گازەتى «ەگەمەن» دە اقيقاتتىڭ, ادىلەتتىڭ اق جولىنان اداسپاي, ۇلتتىڭ مۇددە-مۇراتىن ۇلىقتاۋمەن كەلەدى.
الاش ارىستارىنىڭ جولىن جالعاستىرعان شەراعاڭنىڭ ومىرشەڭ ونەگەسى بىزگە ابىرويلى امانات, سوندىقتان ول ەلىمىزدىڭ جۇزجىلدىق جىلناماسىمەن بىرگە جاساي بەرەدى...
رۋحىڭىز پەيىشتە شالقىسىن, الداسپان اعا...
دارحان قىدىءرالى