قوستانايلىقتار قۋانىشى جانىندا كۇزدىڭ ىقتاسىن ىزدەتەر قارا سۋىعىنىڭ ىزعارى دا بىلىنبەگەن ءتارىزدى. ورتالىق ستاديوندا «توبىل» سولتۇستىك قازاقستان وبلىسىنىڭ «قىزىلجار» كومانداسىمەن بيىلعى سوڭعى كەزدەسۋىن وتكىزىپ, 3:0 ەسەبىمەن ۇتتى.
«توبىل» «قىزىلجاردى» وسىلاي ويسىراتا جەڭىپ, ستاديوندا قارا سۋىققا قارسى قاراپ, ويىننىڭ ءار ءساتىن باعىپ وتىرعان جانكۇيەرلەرىن قۋانىشپەن جىلىتىپ جىبەرگەندەي بولدى. بىراق «توبىل» جانكۇيەرلەرىنىڭ باستى قۋانىشى بۇل ەمەس ەدى. كوماندا بيىل ەل چەمپيوناتىندا ءۇشىنشى ورىندى جەڭىپ الدى. بۇل «توبىل» كومانداسىنىڭ 8 جىلدان كەيىنگى شىعىپ وتىرعان بيىگى بولاتىن. وسىعان وراي قوستاناي قالاسىنداعى ە.ومىرزاقوۆ اتىنداعى وبلىستىق فيلارمونيادا كومانداعا قۇرمەت كورسەتىلدى.
قازاقستان فۋتبولىنىڭ اڭىزى, سەيىلدا بايشاقوۆ «توبىل» كومانداسىنىڭ مۇشەلەرىنە, باسشىلارىنا, قىزمەتكەرلەرىنە قولا مەدال تاپسىردى. فۋتبول سپورتىنىڭ مەرەيلى ساتىنە ارنالعان سالتاناتتا وبلىس اكىمى ارحيمەد مۇحامبەتوۆ فۋتبولشىلار مەن جانكۇيەرلەردى بيىلعى تابىسىمەن قۇتتىقتادى.
– قازاقستان چەمپيوناتىنداعى تابىسىمىز ۇلكەن ەڭبەكتىڭ ارقاسىندا مۇمكىن بولدى. الدىمەن فۋتبولشىلارعا, بارلىق باپكەرلەرگە راحمەت ايتامىن. اكىمشىلىك تاراپىنان دا فۋتبولعا جاساپ وتىرعان جاعدايدى جانكۇيەرلەر كورىپ وتىر. وسىدان بىرنەشە جىل بۇرىن ستاديون كۇتىمسىز, ستاندارتقا ساي كەلمەيتىن. ءبىز العاشقى جىلدان-اق قارجىنى ينفراقۇرىلىمدى جاقسارتۋعا جۇمسادىق, ءبارىن ورنىنا كەلتىردىك. بۇگىن ورتالىق ستاديون تولىق جوندەۋدەن وتكىزىلدى, ۋەفا-نىڭ بارلىق ستاندارتتارىنا ساي كەلەدى. زاتوبول كەنتىندەگى, ارقالىق, رۋدنىي قالالارىنداعى ستاديوندار دا جاڭا تالاپپەن جوندەلدى. بۇگىندە رۋدنىي قالاسىندا تۇتاس سپورت كەشەنىنىڭ قۇرىلىسى ءجۇرىپ جاتىر, وندا دا فۋتبول الاڭدارى بار. وسىنداي جۇمىستاردىڭ بولاشاق جەڭىستەردىڭ دە العىشارتىنا اينالاتىنى ءسوزسىز, – دەدى ارحيمەد بەگەجان ۇلى.
سالتاناتتا كوماندا كاپيتانى, ەسىمى وبلىستان سىرت جەرلەرگە دە تانىمال فۋتبولشى نۇربول جۇماسقاليەۆ جانكۇيەرلەرى مەن ارىپتەستەرىن جەڭىسىمەن قۇتتىقتادى. سونىمەن قاتار ءوزىنىڭ فۋتبول مانسابىن «توبىلدىڭ» ءوز الاڭىندا «قىزىلجار» كومانداسىمەن كەزدەسۋىمەن اياقتاعانىن حابارلادى. ول وسى ويىندا دا «قىزىلجار» قاقپاسىنا «توبىلدىڭ» ءبىر دوبىن ءوزى سالعان بولاتىن.
ايتپاقشى, وبلىستىڭ «توبىل-2000» جاستار قۇراماسى دا فۋتبول ورتالىقتارى اراسىندا وتكەن قازاقستان چەمپيوناتىندا «اعاسىنىڭ» جولىمەن ءۇشىنشى ورىن الدى.
ال فۋتبول سالتاناتى ەسترادا ونەرپازدارىنىڭ انىمەن ورنەكتەلدى.
ءنازيرا جارىمبەت,
«ەگەمەن قازاقستان»
قوستاناي