فيزيكالىق قۇرىلىمى مەن تەحنولوگيالىق تۇرعىدان كىتاپتى جەتىلدىرۋ قيىن. وسىدان ەكى مىڭ جىل بۇرىن قاعازعا جازا باستاعاننان بەرى كىتاپتىڭ فورماسى وزگەرگەن جوق.
نيۋ-يوركتىڭ جاس وقىرماندارىنا ارنالعان Dutton Books باسپاسىنىڭ پرەزيدەنتى دجۋلي ستروسس-گابەلدىڭ كىشكەنتاي كىتاپتاردى ويلاپ تابۋى باسپا يندۋسترياسىنا جاڭا لەپ اكەلدى. قالتا كولەمىمەن بىردەي كىشكەنتاي كىتاپشالار گوللانديادا كەڭىنەن تانىلا باستادى.
«العاش كورگەنىمدە تاڭعالدىم, دەيدى اۆتوردىڭ ءوزى. – ولاردى قالاي جاسايتىنىن انىقتاۋدى وزىمە مىندەت ەتتىم».
وتكەن ايدا Dutton كىشكەنتاي كىتاپشالارىنىڭ ساتىلىمىن باستادى. جاستار مەن ەرەسەكتەردىڭ سۇيىكتى اۆتورىنا اينالعان دجون گريننىڭ كىتابىن قايتا باسىپ شىعاردى. كىشكەنتاي كىتاپتار قالتا تەلەفونىنىڭ كولەمىندەي جانە قالىڭدىعى باسبارماعىڭىزبەن شامالاس. ال پاراقتارىنىڭ قالىڭدىعى پياز قابىعىنان دا جۇقا. ولاردى ءبىر قولمەن وقۋ دا ىڭعايلى, ويتكەنى تەكست كولدەنەڭ تۇسىرىلگەن. پاراقتارىن اۋدارۋ سمارتفون بەتىن تۇرتكەننەن وڭاي.
بۇل جوبا ءساتتى بولسا, جاسالعان جۇمىستار كىتاپ باسپاسى يندۋسترياسىن دامىتىپ, ءتىپتى كىتاپ وقۋ مادەنيەتىنە جاڭالىق ەنگىزبەك.
ميستەر گرين كىشكەنتاي كىتاپتارمەن امستەردامدا تۇرعان كەزىندە تانىسقان-دى. نيدەرلاندتار ءوز تىلىندە ولاردى «dwarsliggers» دەپ اتايدى. جاڭا فورمات ەۋروپادا كەڭ تارالىپ, ونىڭ 10 ميلليونعا جۋىق تيراجى ساتىلعان. ەرەكشە فورماتتا دەن براۋن, دجون لە كاررە, يان ماك ەۆان, يزابەل اللاندتىڭ, سونىمەن قاتار اگاتا كريستي مەن فيتز سكوت فيتزدجەرالد سىندى كلاسسيكتەردىڭ شىعارمالارى جارىق كوردى.
دجون گريننىڭ «الياسكانى ىزدەيمىن», «بىرنەشە كاتەرينا», «قاعاز قالالار», «جۇلدىزدارىمىزدىڭ قاتەسى» تۋىندى-
لارى كىشكەنتاي كىتاپ رەتىندە 12 دوللاردان, ال جيناعى 48 دوللاردان ساتىلماق. ولاردى امەريكانىڭ كىتاپ دۇكەندەرىنەن وڭاي تابۋعا بولادى.
عاسىرلار وتە باسپا ۇيلەرى كىشكەنتاي كىتاپتارمەن ءتۇرلى تاجىريبە جاساپ, كەي كەزدە جاقسى ناتيجەگە جەتىپ وتىردى. 1939 جىلى Pocket Books امەريكاعا قالتا كولەمىندەي كىتاپتاردى تانىستىرعان بولاتىن. ەكىنشى دۇنيەجۇزىلىك سوعىس كەزىندە امەريكا اسكەرىن كىتاپپەن قامتاماسىز ەتۋ جاڭا باستاماعا اكەلدى. اسكەري قىزمەتكەرلەر وزدەرىمەن الىپ جۇرەتىن كىتاپتار شىعارىلا باستادى.
دەگەنمەن سوڭعى كەزدە كىتاپ يندۋستريياسىنداعى جاڭالىقتار تەك تسيفرلاندىرۋعا بايلانىستى. بۇعان ەلەكتروندى كىتاپ پەن اۋديو كىتاپتاردى مىسال رەتىندە ايتا الامىز.
كەي باسپا ۇيلەرى بۇعان دەيىن جارىق كورگەن كىتاپتاردىڭ مۇقاباسىن وزگەرتۋ ارقىلى ولاردىڭ ساتىلۋىن قايتا جانداندىرعىسى كەلدى.
ميستەر گريننىڭ اعىلشىن تىلىندەگى كولدەنەڭ كىتاپتارىن تابۋ قيىنعا سوقتى. گوللانديالىق باسپا ءۇيى Royal Jongbloed بۇعان قول جەتكىزگەن جالعىز كومپانيا. ولاردىڭ كىتاپتارى فينليانديا زاۋىتى دايارلايتىن وتە جۇقا بىراق مىقتى قاعازداردان جاسالعان. مۇنىمەن قوسا Dutton ديزاينەرلەرى قارىپتەر مەن ءماتىندى ورنالاستىرۋ بويىنشا تاجىريبەلەر جاساعان.
ء«بىز ءار ميلليمەتردىڭ سۇراۋى بار زاماندا ءومىر ءسۇرىپ جاتىرمىز», دەيدى ميسس ستروسس-گابەل.
ماقالانى اۋدارعان سۆەتلانا عالىمجانقىزى,
«ەگەمەن قازاقستان»