قازاق حالقى اققۋدى – ماحابباتتىڭ, قارلىعاشتى – مەيىرىمنىڭ, بۇركىتتى – ەرجۇرەكتىكتىڭ, كوگەرشىندى - بەيبىتشىلىكتىڭ نىشانى رەتىندە قاراعان. جۋىردا شىمكەنتتە وسىنداي قۇستاردىڭ ءبىرى ءارى بىرەگەيى, ءبىزدىڭ بالالىق شاعىمىزداعى تانىمال ءاننىڭ قاھارمانى – كوگەرشىندەردىڭ كورمەسى ءوتتى.
«گۇلسار» كەپتەرشىلەر كلۋبىنا 30 جىل تولۋىنا وراي ۇيىمداستىرىلعان كورمەگە رەسەي, وزبەكستان, قىرعىزستان جانە گەرمانيا, اقش سىندى ەلدەرىنەن كوگەرشىننىڭ ءتۇر-ءتۇرى اكەلىنگەن. كلۋب جەتەكشىسى باقىت باتەكەەۆتىڭ ايتۋىنشا, نەگىزىنەن ورتا ازيالىق كەپتەرلەردى تانىتۋعا كۇش سالىنعان. كورمە وتكىزۋدەگى ماقسات تا وسى وڭىردەگى كەپتەرلەردى الەمگە تانىتۋ. كورمەگە قاتىسۋعا تەك كاسىبي كەپتەرشىلەر عانا ەمەس, جاس بالالاردى دا شاقىرىپ, كەپتەر وسىرۋگە اۋەستەنەتىندەردىڭ باسىن قوسۋ دا كوزدەلگەن. قۇستىڭ بۇل ءتۇرىن قولدا ۇستاۋعا اۋەستەردى باعاسى قىزىقتىرارى دا ءمالىم. كورمەگە اكەلىنگەن قۇستاردىڭ تۇرلەرى دە, باعالارى دا سان الۋان.
ەڭ ارزانىنىڭ قۇنى 5 000 تەڭگەدەن باستالسا, قىمباتى 5 000 000 تەڭگەگە دەيىن بارادى. بۇل ورايدا, ارينە تۇقىمى مەن جاسىنا ەرەكشە ءمان بەرىلەدى. كوڭىلىنەن شىققان قۇس باعاسىنىڭ قىمباتتىعىنا قاراماي الاتىندار دا از ەمەس. كەپتەرشىلەردىڭ ايتۋىنشا, قۇستىڭ تۇمسىعى مەن تىرناعىنا, تۇرقى مەن جاسىنا ەرەكشە ءمان بەرىلەدى.
شىمكەنت حالقى ءتۇسى قۇبىلىپ تۇراتىن, كوزى اشىق كوك ءتۇستى ادەمى «گۇلبادام» اتتى كەپتەرلەرگە كوپ قىزىعادى ەكەن. كوگەرشىندى قوسىمشا تابىس كوزىنە اينالدىرعاندار دا بارشىلىق. مىسالى, 80 قۇس باپتاپ وتىرعان ارىس قالاسىنىڭ تۇرعىنى ە.پەرنەباي كورمەگە 20 كوگەرشىن الىپ كەلىپتى. قۇستارى ارقىلى تاپقان ەڭ كوپ تابىسى - 600 مىڭ تەڭگە بولىپتى. مۇعالىمنىڭ ايتۋىنشا, نەگىزگى تابىستان بولەك كوگەرشىن اسىراۋ ارقىلى 1 000 000 تەڭگە كولەمىندە قارجى تابۋعا بولادى.
ايتا كەتەلىك, شىمكەنتتە وتكەن كورمەگە ەڭ قىمبات - 5 000 000 تەڭگەگە باعالاناتىن كوگەرشىن دە اكەلىنگەن. كەلۋشىلەر ەلىمىزدىڭ تۇكپىر-تۇكپىرىنەن جانە الىس-جاقىن شەتەلدەردەن جەتكىزىلگەن كەپتەرلەردىڭ 500-دەن استام ءتۇرىن تاماشالاۋ مۇمكىندىگىنە يە بولدى. سونداي-اق وزدەرىنە ۇناعان كەپتەرلەردى ساتىپ العاندار دا از بولمادى.
عالىمجان ەلشىباي,
«ەگەمەن قازاقستان»
شىمكەنت