قولىمىزعا توتە جازۋمەن جازىلعان ءبىر پاراق ۇندەۋحات ءتۇستى. وسىدان 90 جىل بۇرىن باسىلعان بۇل ۇندەۋ سول كەزدەگى سەمەي وبلىستىق (گۋبەرنيالىق) «جاڭا اۋىل» گازەتىمەن بىرگە ەل-جۇرتقا تاراتىلسا كەرەك. قۇجات سول زاماننىڭ قيىن ءبىر كەزەڭىنەن حابار بەرەدى.
«جاڭا اۋىل» گازەتىنىڭ №17-سىنە قوسىمشا
سەمەي گۋبەرنەسىندەگى بارلىق ەڭبەكشىلەرگە گۋبەرنەلىك اتقارۋ كوميتەتىنىڭ, گۋبەرنەلىك كاسىپشىلەر كەڭەسىنىڭ جانە سەمەيدىڭ قالالىق كەڭەسىنىڭ ۇندەۋى
سەمەي گۋبەرنەسىنىڭ ءوز ۇيەزدەرىنەن كەلگەنى بار, باسقا اۋدانداردان كەلگەنى بار, قازىرگى ۋاقىتتا سەمەي قالاسىندا جۇمىسسىزدار بىرقاتار بولىپ كوبەيىپ وتىر. جۇمىسسىزداردىڭ مۇنشا كوبەيىپ كەتۋىنە گۋبەرنەدەگى سالىناتىن ورىندارعا, اسىرەسە تۇركىستان-ءسىبىر تەمىر جولىنا جۇمىسكەرلەر كوپ كەرەك دەگەن دالەلسىز, الىپقاشتى حابارلار سەبەپ بولدى.
وسى حابارلاردى ەستىگەندەردىڭ بىرەۋى قىزمەتىن تاستاپ, بىرەۋى شارۋاسىن تاستاپ سەمەيگە كەلدى دە, مۇنداعى بۇرىنعى جۇمىسسىزداردىڭ سانىن كوبەيتتى.
مۇنداعى جۇمىستارعا ەڭبەك بيرجاسىندا تىركەلگەن جۇمىسسىزداردىڭ وزدەرى دە جەتكىلىكتى ەدى. جۇمىسسىزداردىڭ وسى سياقتى تىم كوبەيۋىنىڭ ارقاسىندا بۇرىن كورىلمەگەن جۇمىسسىزدىق داعدارىسى بولىپ وتىر. بۇل داعدارىستى ازايتۋ ءۇشىن جەرگىلىكتى كەڭەس, كاسىپشىلەر ورىندارى بارلىق قولىنان كەلگەن شاراسىن ىستەپ جاتىر. سوندا دا جۇمىسسىزدار ءالى كۇنگە دەيىن سەمەيگە اعىلىپ كەلىپ جاتىر.
جۇمىسسىزدىقتى باسەڭدەتۋ ءۇشىن قولداعى قاراجاتتى ۇستاپ ءبىتىرىپ, ەندى گۋباتكوم قالالىق كەڭەس جانە گۋبەرنەلىك كاسىپشىلەر كەڭەسى گۋبەرنەنىڭ بارلىق ەڭبەكشىلەرىنە جار سالادى – جۇمىسقا كىرەمىن دەپ سەمەيگە كەلۋدى توقتاتۋلارىڭىزدى سۇرايدى. ويتكەنى مۇندا جۇمىسقا تۇسە الماي جۇرگەن جۇمىسسىزدار ءالى كوپ, ونىڭ ۇستىنە جۇمىسكەر العالى وتىرعان ورىندار دا جوق.
ۋاتكومدەر (ۋەزدىك اتقارۋ كوميتەتتەرى – ق.ق.), بولاتكومدەر (بولىستىق اتقارۋ كوميتەتتەرى – ق.ق.), اۋىل كەڭەستەرى, بۇل حاباردىڭ ءمان-جايىن ەڭبەكشى ەلگە تۇسىندىرۋگە جانە ۇيەزدەن سەمەيگە جۇمىسسىزداردىڭ كەلۋىن توقتاتۋ ءۇشىن شارا قولدانۋعا ءتيىس.
گۋباتكوم اعاسىنىڭ ورىنباسارى مەدۆەدكوۆ گۋبەرنەلىك كاسىپشىلەر كەڭەسىنىڭ اعاسى بۋدرەيكا قالالىق كەڭەس اعاسى قۇلاتاي ۇلى
1928 جىل, 28 ماي (مامىر – ق.ق.)
قازبەك قۇتتىمۇرات ۇلى,
«ەگەمەن قازاقستان»
سەمەي