بەلگىلى قىلقالام شەبەرى نۇربولات ىسقاقوۆتىڭ قولتاڭباسىنان تۋعان پورترەتتىك بەينەلەر ادام بويىنداعى سەزىم ساۋلەلەرى ارقىلى باياندالادى. سۋرەتشىنىڭ بۇل سالاداعى العاشقى كولەمدى ەڭبەگىنىڭ ءبىرى – مۇقاعالي ماقاتاەۆتىڭ ءتۇرلى كەزەڭدەرىندەگى پورترەتتەرى.
مۇقاعاليدىڭ وزىنە عانا ءتان قايتالانباس بەينەسىن بەدەرلەۋگە دەگەن شىنايى ۇمتىلىس سۋرەتشىگە شابىت بەرگەن. مۇنىڭ اقىننىڭ العاشقى تيپتىك پورترەتتەرىنىڭ جارىققا شىعۋىنا دا سەپتىگىن تيگىزگەنى انىق. مىنا پورترەتتەردەگى بەس ءتۇرلى مۇقاعالي بەينەسى اقىن كوڭىل كۇيىن سان قىرىنان تانىتارداي. ونىڭ ادام رەتىندە جانە اقىن رەتىندەگى وبرازى قورشاعان ورتا ارقىلى سيپاتتالادى. قىلقالام يەسى «اقىن دەگەن تابيعات قوي, قىسى, كۇزى, جازى بار» دەپ مۇقاعاليدىڭ ءوزى ايتقانداي, اقىن جانىنىڭ سان تاراۋ ىرعاقتارىن, ىشكى بۇلقىنىسىن, جۇرەك تولعانىسىن, ءاپ-ساتتە قۇبىلاتىن كوڭىل كۇيىن تاپ باسۋعا تالپىنادى.
جان بالاسىن جاتسىنباي جان سىرىن جايىپ سالاتىن اقەدىل اڭعالدىق, ءسال جالعاندىق سەزىلسە قارا اسپانداي بۇلتتاناتىن نايزاعاي تەكتەس ءور مىنەز, جاسقا دا, كارىگە دە قۇشاعىن بىردەي اشاتىن قاراپايىم قاسيەت, سابيدەي پاك العاۋسىز كوڭىل تازالىعى, اينىماس ازاماتتىق بولمىس – ءبىزدىڭ ويىمىزداعى مۇقاعالي تۇلعاسى. سۋرەتشى اقىن بويىنداعى ءدال وسى قاسيەتتەردى اينىتپاي كەيىپتەۋگە كۇش سالعان.
– جاسىمنان مۇقاعاليدى جاتا-جاستانا وقىدىم. ونىڭ الەمىنە ولەڭى ارقىلى بويلادىم. مۇقاعالي ولەڭدەرىندەگى كوپتەگەن كەيىپكەرلەردى بەينەلەدىم.
قۋلارى قىردىڭ قىزىل تۇلكىسى دەر, مومىنى ءبىزدىڭ ءۇيدىڭ كىرپىشى دەر. ماڭگىلىككە وزىممەن الا كەتكەن, مەنىڭ نازىك جانىمدى كىم تۇسىنەر, – دەپ اقىن ءوزى جىرعا قوسقانداي, ونىڭ ىشكى الەمىن, سالقار ساعىنىشىن, اساۋ شابىتتىڭ تىنىمسىز توعىسقان تاسقىندارىن ءوز دارەجەسىندە تۇسىنە الماعان دا شىعارمىز. دەسە دە پورترەتتىك بەينەلەر ارقىلى كورەرمەندى مۇقاعالي الەمىنە بويلاتۋدى مۇرات تۇتتىم, – دەيدى قازاقستان سۋرەتشىلەر وداعىنىڭ مۇشەسى نۇربولات ىسقاقوۆ.
مۇقاعالي ءوز كۇندەلىگىندە: «مەنى ادامنىڭ ءوزى, سىرتقى سۇلدەرى ەمەس, مىنەز-قۇلقى, قاتىناسى, ويى مەن پسيحولوگياسى قىزىقتىرادى. ولاردى تۇسىنۋگە تىرىسامىن. ادامداردى تۇسىنە وتىرىپ, ولاردىڭ دا مەنى تۇسىنگەنىن قالايمىن» دەپ جازىپتى. ءبىز اقىننىڭ جان دۇنيەسىن ءومىرىنىڭ وزەگىنە اينالعان ولەڭدەرىنەن تانىعانداي بولامىز. كوڭىل كوگىمىزدە ساقتالىپ قالعان ساعىنىش سەزىمدەرى, اقىن ديدارىن اشاتىن مۇنداي بەينەلەر جانارعا جاسىرىنعان ماڭگىلىك جۇمباق الەمگە جەتەلەيتىندەي كورىنەدى دە تۇرادى.
ارمان وكتيابر,
«ەگەمەن قازاقستان»
الماتى