الماتىدا بەيتاراپتاندىرعىش تسەحى ىسكە قوسىلدى

جاڭا ءونىمدى تانىستىرۋ بارىسىندا «عىلىم قورى» اق باسقارما توراعاسى انۋاربەك سۇلتانعازين ۇلتتىق عىلىم اكادەمياسى عالىمدارىنا ۇلكەن العىسىن ءبىلدىرىپ, ءبىر جىلدىڭ ۇشىندە كوپتەگەن جۇمىستاردىڭ اتقارىلعاندىعىنا توقتالدى. العاشقى 8 ايدىڭ ىشىندە كوممەرتسيالاندىرۋمەن اينالىساتىن كاسىپورىندار ءوز جوبالارىنىڭ پايداسىن كورىپ وتىرعاندىعىنا توقتالدى. جاڭا ءونىم الداعى ۋاقىتتا سەرتيفيكاتتالاتىن بولادى.

بۇگىندە قورشاعان ورتانىڭ اۆتوكولىكتەردەن, وندىرىستەردەن شىعاتىن ۋلى گاز قالدىقتارىمەن لاستانۋى عالامدىق ماسەلەگە اينالدى. اۋا لاستانۋىنىڭ اپاتى جىلدان-جىلعا ۇلعايىپ بارادى. عالىمداردىڭ پايىمداۋىنشا, الماتى ەلىمىزدەگى قاتتى گازدانعان قالالاردىڭ قاتارىنا جاتادى. اۋاعا جىلىنا بولىنەتىن ىس پەن گاز كولەمى 300 توننانى قۇرايدى. كولىك كەپتەلىسىنىڭ سالدارىنان اۋاعا كوپتەگەن حيميالىق زياندى قالدىقتار بولىنەدى.

جوبانىڭ جەتەكشىسى تەحنيكا عىلىمدارىنىڭ كانديداتى بولاتبەك قۇسايىننىڭ ايتۋىنشا, وسى ماسەلەلەردى نەگىزگە العان وتاندىق عالىمدار كەڭەسى ءبىر جىل بۇرىن «اۆتوكولىك جانە ونەركاسىپتىك كاسىپورىندار گاز شىعارىندىلارىنداعى ۋلى كومپونەنتتەرىن جوياتىن كاتاليتيكالىق بەيتاراپتاندىرعىشتاردى مەتالدان ءوندىرۋدى ۇيىمداستىرۋ» جوباسىن جۇزەگە اسىرۋدى ۇسىنعان بولاتىن. جوبانى جۇزەگە اسىرۋ ءۇشىن ەلىمىزدەگى بىردەن-ءبىر مامانداندىرىلعان, كوپجىلعى زەرتتەۋلەر قورى بار «د.ۆ. سوكولسكي اتىنداعى جانارماي, كاتاليز جəنە ەلەكتروحيميا ينستيتۋتى» تاڭدالعان بولاتىن. اتالعان ينستيتۋت جانە  «عىلىم قورىنىڭ» ماماندارى جوبا اياسىندا وتاندىق كاتاليتيكالىق بەيتاراپتاندىرعىش تسەحىن ىسكە قوستى.

جاڭا ءونىم قىمبات شەتەلدىك ونىمدەردى الماستىرادى. تەمىردەن جاسالعان كاتاليزاتورلار كەراميكالىق تۇرىنە قاراعاندا جىلدام قىزادى ءارى ءتوزىمدى كەلەدى. ماماندار بۇل وتاندىق وندىرىستەگى جوعارى سەرپىن ءارى ەكولوگيالىق تىعىرىقتان شىعار جولداردىڭ ءبىرى, دەيدى.

ەلۆيرا سەرىكقىزى,

«ەگەمەن قازاقستان»

الماتى