«ەسكى قالا» اۋماعىندا ورنالاسقان ۇيلەردىڭ تۇرعىندارىنا وتەماقى تولەۋگە جەرگىلىكتى بيۋدجەتتەن 1 ملرد 200 مىڭ تەڭگە ءبولىندى, - دەپ حابارلايدى اتىراۋ قالاسى اكىمدىگىنىڭ ءباسپاسوز قىزمەتى.
بۇگىن, 5 قاراشادا, اتىراۋ قالاسىنىڭ اكىمى اليمۇحاممەد قۇتتۇمۇرات ۇلى اپپارات جينالىسى بارىسىندا قاراماعىنداعىلارعا قۇرىلىس باستاۋ ءۇشىن «ەسكى قالا» اۋماعىندا ورنالاسقان ۇيلەردى ءسۇرۋ جۇمىستارىن جەدەلدەتۋدى تاپسىردى.
- الداعى جىلدىڭ ناۋرىز ايىنان باستاپ الەۋمەتتىك نىساندار سالۋ ءۇشىن بۇل اۋماقتى بوساتۋىمىز كەرەك. سول ءۇشىن تۇرعىندارمەن كەزدەسىپ, وتەماقى تولەۋ شارتتارىن ءتۇسىندىرۋ, وتەماقى سوماسىنا كەلىسپەگەن تۇرعىنداردى كوشىرۋ جۇمىستارىن كۇشەيتۋ قاجەت, - دەدى قالا باسشىسى.
ايتا كەتسەك, «ەسكى قالا» اۋماعىندا ءسۇرىلۋى ءتيىس اۋدانى 18 گا 269 ءۇي بار. قازىر سونىڭ 223-ءى تاۋەلسىز باعالاۋدان ءوتتى, 73 ءۇيدىڭ تۇرعىندارىنا جاڭا ءۇي الۋ ءۇشىن وتەماقى تولەندى. كوشىرۋگە كەلىسكەن ءۇي تۇرعىندارى 2019 جىلدىڭ باسىندا جاڭادان سالىنىپ جاتقان بەرەكە ىقشاماۋدانىنان باسپانالى بولادى.
ەسكە سالا كەتسەك, اتىراۋدىڭ دامۋ باس جوسپارى بويىنشا 2030 جىلعا قاراي قالا تۇرعىندارىنىڭ سانى 350 مىڭ ادامعا دەيىن وسەدى دەپ كۇتىلۋدە, ال وبلىس ورتالىعىنىڭ اۋدانى 3 ەسەگە ۇلعايىپ, 46 مىڭ گا بولماق.
الەۋمەتتىك ينفراقۇرىلىمنىڭ قالىپتى بولۋى ءۇشىن 2030 جىلعا قاراي قوسىمشا 83 بالاباقشا, 45 مەكتەپ, 20 ەمحانا, 5 اۋرۋحانا, 6 دەنە شىنىقتىرۋ-ساۋىقتىرۋ كەشەنى جانە 3 مادەنيەت ءۇيى سالىنادى.