ارال اۋدانىندا اۋرۋحانا مەن مەكتەپ-ليتسەيى اشىلدى

وبلىس اكىمى قىرىمبەك كوشەرباەۆ اۋدانعا جۇمىس ساپارى بارىسىندا اۋرۋحانا مەن مەكتەپتىڭ اشىلۋ راسىمىنە قاتىستى.

150 ورىندىق اۋرۋحانانىڭ عيماراتى 3 قابات, 4 بلوكتان تۇرادى. ونىڭ ىشىندە تەراپيا, حيرۋرگيا, تراۆماتولوگيا, پەدياتريا, گينەكولوگيا, ينفەكتسيالىق جانە دەرماتوۆەنەرولوگيالىق بولىمشەلەر قىزمەت كورسەتەدى.

وبلىس اكىمى اۋرۋحانا ۇجىمىن جاڭا نىساننىڭ اشىلۋىمەن قۇتتىقتادى.

«قازىرگى تاڭدا ەلباسى تاپسىرماسىمەن مەملەكەتتىك-جەكەمەنشىك ارىپتەستىك اياسىندا مەملەكەت پەن جەكە سەكتور اراسىندا ۇزاق مەرزىمدى ىنتىماقتاستىقتى قالىپتاستىرۋعا باعىتتالعان جۇمىستار ءجۇرىپ جاتىر. وبلىس بويىنشا ءبىلىم, دەنساۋلىق, سپورت, جالپى الەۋمەتتىك سالالار بويىنشا 52 نىساننىڭ جوباسى ازىرلەنۋدە. وتكەن جىلى قازالى تەمىرجول اۋرۋحاناسىنىڭ بازاسىندا ارال, قازالى, قارماقشى اۋداندارىنىڭ تۇرعىندارى ءۇشىن اۋدانارالىق ينسۋلتتىق ورتالىق, بايقوڭىر قالاسىنان كوپسالالى اۋرۋحانا اشىلدى. قاجەتتى مامانداردى رەزيدەنتۋراعا دايىنداۋ ماقساتىندا وبلىس اكىمىنىڭ گرانتىن بولدىك, قازىر 22 مامان وقىپ جاتىر»,-دەدى ايماق باسشىسى.

سوڭعى ەكى جىلدا مەديتسينالىق ۇيىمداردىڭ ماتەريالدىق-تەحنيكالىق بازاسى نىعايتىلىپ, بارلىق اۋدانداردا اۋىسىمىنا 250 كەلۋشىگە ارنالعان ەمحانالار مەن 11 مەديتسينالىق بەكەت سالىندى. وتكەن جىلدىڭ جەلتوقسانىندا قازالى اۋداندىق ورتالىق اۋرۋحاناسى پايدالانۋعا بەرىلدى. وبلىستىڭ دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن جاقسارتۋ ماقساتىندا 48 دارىگەرلىك امبۋلاتوريا, 7 فەلدشەرلىك-اكۋشەرلىك بەكەت, 27 مەديتسينالىق بەكەت قۇرىلىسى جوسپارلانۋدا. مەديتسينالىق ۇيىمداردى ارنايى تەحنيكامەن قامتاماسىز ەتۋ بويىنشا الەمنىڭ كەز-كەلگەن كلينيكاسىمەن بايلانىسقا تۇسۋگە مۇمكىندىك بەرەتىن ءموبيلدى – وتا جاسايتىن قوندىرعى ورناتىلدى. وسى رەتتە ايتا كەتەيىك, مۇنداي قوندىرعىمەن رەسپۋبليكانىڭ بەس كلينيكاسى عانا جابدىقتالعان.

باقتيار تايجان,

«ەگەمەن قازاقستان»

قىزىلوردا وبلىسى