ناركولوگيالىق ديسپانسەر دارىگەرلەرىنىڭ ايتۋلارىنشا سينتەتيكالىق ەسىرتكى زاتتارىن قابىلدايتىنداردىڭ سانى وڭىردە كەمۋدىڭ ورنىنا ارتىپ بارادى.
وتكەن جىلى 630 ناۋقاس تىركەۋگە الىنسا, بيىل ولاردىڭ سانى 750-گە جەتكەن. وسىلايشا جاڭادان 120 ناشاقور قوسىلعان. ناركولوگيالىق ديسپانسەردىڭ ءبولىم مەڭگەرۋشىسى گالينا اندرەەۆانىڭ سوزىنە قاراعاندا, سينتەتيكالىق ەسىرتكىنى قابىلدايتىن جاستاردىڭ قاتارى قالىڭ. بىرىنشىدەن, كامەلەتكە تولماعانداردىڭ پسيحيكالىق سانا-سەزىمى تولىق قالىپتاسپاعاندىقتان, جاقسى مەن جاماننىڭ پارقىن ايىرا بەرمەيدى. ءدامىن ءبىر رەت قانا تاتىپ كورەيىنشى دەگەن اۋەسقويلىق سەزىم مىنەز-ق ۇلىقتى كىلت وزگەرتىپ جىبەرۋى قازىر-اق. ەكىنشىدەن, نارىقتا گەروين تاپشى جانە وعان قاراعاندا باعاسى ەداۋىر ارزان.
بىلاي قاراساڭ ەسىرتكى جانە سينتەتيكالىق پسيحيكالىق بەلسەندى زاتتاردىڭ زاڭسىز اينالىمىنا قارسى كۇرەس جۇمىستارى قارقىندى اتقارىلىپ جاتقان سياقتى. «رەفلەكس» جەدەل-پروفيلاكتيكالىق شارالار بارىسىندا 14 وقۋ ورنىندا ءبىر مىڭنان استام ءجاسوسپىرىمنىڭ قاتىسۋىمەن دارىستەر مەن اڭگىمەلەسۋلەر وتكىزىلگەن. ەسىرتكىگە ەلىتىپ, ەسىن جوعالتقان, تۋرا جولدان اداسقان جانداردىڭ ازاپقا تولى ومىرىنەن سىر شەرتەتىن دەرەكتى فيلمدەر, بەينەتاسپالار كورسەتىلگەن. جىل باسىنان بەرى 57 فاكت اشكەرەلەنىپ, جارتى تونناعا جۋىق ەسىرتكى زاتتارى تاركىلەنگەن. سينتەتيكالىق ەسىرتكىلەردى تاراتۋمەن شۇعىلدانىپ, تابىس كوزىنە اينالدىرعان 50-دەن استام سايت جابىلعان.
سوعان قاراماستان ەسىرتكىگە تاۋەلدىلىك كەمىر ەمەس. ادام دەنساۋلىعىنا, قوعامعا كەلتىرەتىن وراسان زالالىن بىلە تۇرا ونىڭ ساۋداسى قازىر الەۋمەتتىك جەلىلەردە قىزىپ تۇر. اسىرەسە, ەسىرتكى ساتاتىن سايتتاردى جارنامالاۋشىلار ەشنارسەدەن يمەنبەيتىن كورىنەدى. جۋىردا پوليتسەيلەر سايتتاردىڭ مەكەن-جايلارى كورسەتىلگەن گراففيتيدى ۇيلەر مەن اۋلالاردىڭ, گاراجداردىڭ قابىرعاسىنا ورنالاستىرىپ جۇرگەن 22 جاستاعى قىز بالانى قولعا ءتۇسىردى. كوزدى باقىرايتىپ قويىپ, ەشنارسەدەن قايمىقپاي ءجۇرۋىنىڭ سەبەبى ونىڭ جاۋابىنان تۇسىنىكتى بولدى. سويتسە, ادام اعزاسىنا جويقىن كۇشپەن اسەر ەتىپ, ونىڭ سوڭى ولىمگە سوقتىراتىن قوعام كەسەلىن ناسيحاتتاعانى ءۇشىن ناشاقورلارعا تەگىن بەرىلەدى ەكەن. مىنە, ەشنارسەدەن تايسالماۋدىڭ, يمەنبەۋدىڭ, ياعني «كوزسىز باتىرلىققا» بارۋدىڭ كوزى قايدا جاتىر دەسەڭشى! پەتروپاۆل قالالىق ىشكى ىستەر باسقارماسى ەسىرتكى بيزنەسىنە قارسى كۇرەس ءبولىمىنىڭ جەتەكشىسى دۋلات مۇحامەدراحيموۆتىڭ ويىنشا, قوعامدىق ۇيىمدار, جۇرتشىلىق بولىپ جۇمىلماي جەكە-دارا ارەكەتتەن ەشتەڭە ونبەيدى. ويتكەنى, ۋاقىت وتكەن سايىن الىپساتارلارعا توسقاۋىل قويۋ قيىنداپ بارادى. زاماناۋي تاراتۋدىڭ اككى جولدارىن ءبىلىپ العان. ينتەرنەت-سايتتاردى وتە شەبەر پايدالانادى. كليەنتتەر تارتۋ ءۇشىن ەسىرتكىگە تاۋەلدىلەردى جالداپ, وزدەرى تاسادا قالادى. كەز كەلگەن ءجاسوسپىرىم سمارتفون ارقىلى «سپايسقا» تاپسىرىس بەرە الادى. ولاردىڭ ناقتى جانە ۆيرتۋالدى قورشاعان ورتاسىن باقىلاۋ جاعى دا كەمشىن. مەكتەپتەن تىس ءبىلىمدى ۇيىمداستىرۋ ماسەلەسىن شەشۋدە پروبلەمالار از ەمەس. زاڭدىق تۇرعىدان قولدانىلاتىن شارالار دا پارمەنسىز. 10 ايلىق ەسەپتىك كورسەتكىش كولەمىندە ايىپپۇل سالىنادى بولماسا ون كۇنگە قاماۋعا الىنادى. ونىڭ پىكىرىن «يمپۋلس» بالالار-جاستار كلۋبىنىڭ پەداگوگ-ۇيىمداستىرۋشىسى ناتاليا كاپۋستينا دا قولدايدى. بەسىكتەن بەلى شىقپاعان جاسوسپىرىمدەردىڭ ناشاقورلىققا تەز بەيىمدەلۋى ويلاندىرماي قويمايدى. سينتەتيكالىق ەىسرتكىنىڭ ورنى تولماس وكىنىشكە سوقتىراتىن قاتەرىن تىلمەن ايتىپ جەتكىزۋ قيىن. بۇگىندە قارا نارىقتاعى ءداستۇرلى ەسىرتكى زاتتارىن «ديزاينەرلىك», تاعى باسقا تۇرلەرى ىعىستىرىپ شىعارۋدا. كۇشى جويقىن, ءزارلى. ونى تۇتىنعان ادام ءبىر جىلدىڭ ىشىندە سۋ ءتۇبى قۇردىمعا كەتىپ تىنادى. پەتروپاۆل قالاسىنداعى 21 بالالار مەن جاسوسپىرىمدەر كلۋبىندا 4 مىڭداي بالا جاتتىعادى. بۇل–از. كوبىنە سەبەبىنەن گورى سالدارىمەن كۇرەسۋگە بەيىلمىز. وسكەلەڭ ۇرپاقتىڭ ءومىرى مەن دەنساۋلىعىن ساقتاۋدا قوعامنىڭ بەلسەندى كوزقاراسى, بىرلەسكەن تەگەۋرىندى ءىس-قيمىلى عانا سەنىمدى قورعان بولا الادى, دەيدى ول.
مامانداردىڭ ايتۋلارىنشا, الەمدە سينتەتيكالىق ەسىرتكىنىڭ 800-گە تارتا ءتۇرى بار.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى