«قازاقستاننىڭ 100 جاڭا ەسىمى» ونلاين داۋىس بەرۋ ارقىلى انىقتالادى. بۇل تۋرالى بۇگىن ورتالىق كوممۋنيكاتسيالار قىزمەتىندە ايتىلدى.
100 جاڭا ەسىم رەسپۋبليكالىق كونكۋرسىنا ارنالعان ءباسپاسوز كونفەرەنتسياسىنا اقپارات جانە كوممۋنيكاتسيالار ۆيتسە-ءمينيسترى ن.ماۋبەرلينوۆا مەن «قازكونتەنت» اق توراعاسى د.قوجاحمەتوۆ قاتىستى. جيىن بارىسىندا وتكەن جىلعى جوبا جەڭىمپازدارىنىڭ جەتىستىكتەرى ايتىلىپ, جاڭا داۋىس بەرۋ كەزەڭىنىڭ باستالعانى جاريالاندى. سونداي-اق اقپارات جانە كوممۋنيكاتسيالار ۆيتسە-ءمينيسترى ن.ماۋبەرلينوۆا مينيسترلىكتىڭ جول كارتاسىنىڭ تىزىمىنە كىرگەن جوبالار تۋرالى ايتىپ ءوتتى.
«وتكەن جىلى 1 قاڭتاردا «قازاقستاننىڭ 100 جاڭا ەسىمى» جاريالانعان بولاتىن. جوبا قورىتىندىسى بويىنشا 102 جەڭىمپاز انىقتالدى. بۇگىندە ولار ءارتۇرلى قىزمەت سالاسىندا جاڭا جەتىستىكتەرگە جەتىپ, يدەيالارى مەن جوبالارىن دامىتىپ كەلەدى. جەڭىمپازدار ۇسىنعان 17 الەۋمەتتىك ماڭىزى بار جوبا مينيسترلىك ازىرلەگەن جول كارتاسى تاراپىنان قولداۋ تاپتى», دەدى ۆيتسە-مينيستر.
قازاقستان حالقى اسسامبلەياسى مەن اقپارات جانە كوممۋنيكاتسيالار مينيسترلىگىنىڭ بىرلەسە ۇيىمداستىرعان «قازاقستاننىڭ 100 جاڭا ەسىمى» جوباسى بيىل ءوز جالعاسىن تاپتى. جيىن بارىسىندا «قازكونتەنت» اق باسقارما توراعاسى د.قوجاحمەتوۆ جوبانىڭ ەكىنشى كەزەڭىندەگى ۇمىتكەرلەردى تىركەۋ اياقتالعانىن اتاپ ءوتتى.
«پرەزيدەنتىمىز «بولاشاققا باعدار: رۋحاني جاڭعىرۋ» ماقالاسىندا «100 جاڭا ەسىم» جوباسى ارقىلى ەلىمىزدىڭ ءار وڭىرىندە تۇراتىن ءتۇرلى جاستاعى ازاماتتاردىڭ جەتىستىكتەرىنە نازار اۋدارۋدى ۇسىندى. سونىڭ نەگىزىندە وتكەن جىلى بىرقاتار جۇمىستار اتقارىلدى. دارىندى ازاماتتاردىڭ ءومىربايانىن ۇلگى ەتۋ ارقىلى جاستاردى تاربيەلەۋدە بۇل جوبانىڭ ماڭىزى ەرەكشە. ەل اراسىندا كەڭ تاراعان جوبانىڭ ەكىنشى كەزەڭى ءوز جۇمىسىن باستادى. جوبانىڭ ءبىرىنشى كەزەڭى بويىنشا 2388 كانديدات تىركەلدى. سونىڭ ىشىندە 200 ادام بارلىق تالاپتارعا سايكەس كەلىپ, ەكىنشى كەزەڭگە ءوتتى», دەدى د.قوجاحمەتوۆ.
ونلاين داۋىس بەرۋ 100esim.el.kz سايتىندا 2-15 قاراشا ارالىعىندا وتەدى. داۋىس بەرۋ پروتسەسى ۇمىتكەر سايتقا تىركەلگەننەن كەيىن جۇزەگە اسادى. ودان سوڭ پايدالانۋشى پوشتاسىنا كەلگەن كودتى اكتيۆتەندىرۋ كەرەك. ءاربىر كاتەگوريا بويىنشا داۋىس بەرۋشى ءۇش داۋىستان بەرە الادى. جوبا ناتيجەسى رەسمي سايتتا جاريالانادى.
مارجان تىلەۋبەك,
«ەگەمەن قازاقستان»