اۋكتسيوندىق ساۋدانى وتكىزۋ حالىققا تاريفتەردى وسىرمەۋگە جول اشادى — ەنەرگەتيكا مينيسترلىگى

ەنەرگەتيكا مينيسترلىگىنىڭ مالىمەتىنە قاراعاندا, اۋكتسيوندىق ساۋدا-ساتتىقتىڭ جاڭا تەتىگى جەك نىساندارى وندىرەتىن ەلەكتر ەنەرگياسىنىڭ ءتيىمدى نارىقتىق باعاسىن ايقىنداپ, الەۋەتتى ينۆەستورلاردى ىرىكتەۋدى اشىق وتكىزىپ, ەلىمىزدەگى جاڭارتىلاتىن گەنەراتسيا سالاسىن دامىتۋ ءۇشىن ينۆەستيتسيا تارتۋعا سەپتىگىن تيگىزەدى. بيىل كوكتەم مەن كۇزدە قۋاتتىلىعى 1000 مۆت بولاتىن جەك جوبالارىنىڭ: كۇن ەلەكتر ستانتسيالارى (كەس), جەل ەلەكتر ستانتسيالارى (جەس), سۋ ەلەكتر ستانتسيالارى (سەس) جانە بيوەس تيپتەرى بويىنشا حالىقارالىق اۋكتسيوندىق ساۋدا-ساتتىق وتكىزىلدى.

«سالاعا ينۆەستيتسيالار تارتۋ ارقىلى تاريفتەر تومەندەدى. ورتا ەسەپپەن الساق, جەس 12,2%-عا, شاعىن سەس 12,12%-عا, كەس 35,71%-عا تومەندەگەن. جەل گەنەراتسياسىنىڭ اۋكتسيوندىق باعاسى ەڭ كوبى 23,3%-عا ءتۇستى, كۇن گەنەراتسياسى بويىنشا – 48%, شاعىن سەس جوبالارى – 23,4%, بيوەس – 1%. بۇل – جاقسى ناتيجە», — دەدى ا. شكارۋپا.

بيىل اۋكتسيوندىق ساۋداعا 113 قازاقستاندىق جانە شەتەلدىك كومپانيالار (قىتاي, رەسەي, تۇركيا, فرانتسيا, بولگاريا, يتاليا, بىرىككەن اراب امىرلىگى, نيدەرلاندى) قاتىستى. ولاردىڭ ىشىندە جالپى قۋاتى 857,93 مۆت بولاتىن 36 جەك جوباسى جەڭىسكە جەتتى.

«جالپى, ساۋدا اۋكتسيونىنا تۇسكەن وتىنىمدەر كولەمى 3 422 مۆت بولدى, ياعني سۇرانىس كولەمى ۇسىنىس كولەمىنەن 3,4 ەسە ارتىق ەكەنىن كورەمىز. ساۋدا اۋكتسيونىنىڭ جەڭىمپازدارى ۇسىنىلعان اۋكتسيون قۋاتتىلىعىنىڭ 85%-ىن وتەپ وتىر», — دەدى ۆيتسە-مينيستر.

ۆيتسە-ءمينيستردىڭ ايتۋىنشا, قابىلدانىپ جاتقان شارالار حالىققا تاريفتەردىڭ ءوسۋىن تەجەۋگە مۇمكىندىك بەرەدى.

ء«بىز اۋكتسيوندىق ساۋدا-ساتتىق تەتىكتەرىن ەنگىزگەنگە دەيىن بەلگىلەنگەن باعامەن سالىستىرامىز. 2018 جىلى بولعان بەكىتىلگەن باعامەن سالىستىرعاندا, قازىرگى باعا تومەندەۋدە, ياعني ءبىز الەۋەتتى تۇردە حالىققا تاريفتەردىڭ وسۋىنە جول بەرمەۋدىڭ امالدارىن جاساپ جاتىرمىز», — دەدى ا. شكارۋپا.

ەنەرگەتيكا ۆيتسە-ءمينيسترىنىڭ ايتۋىنشا, اۋكتسيوندىق ساۋدا-ساتتىق تەتىكتەرىن ەنگىزۋ حالىق اراسىندا تاريفتەردىڭ كوتەرىلمەۋىنىڭ ماڭىزدى قورى بولۋى مۇمكىن.

«ماسەلەن, كۇن ەنەرگياسى بويىنشا بىزدە 2018 جىلعا دەيىن بەلگىلەنگەن باعا 34 تەڭگەدەن ءسال جوعارى بولسا, ەندى اۋكتسيوندىق ساۋدا-ساتتىق ەسەبىنەن كۇن گەنەراتسياسى بويىنشا بۇل باعا 48%-عا تومەندەدى. باعانى بارىنشا تومەندەتۋ – ىسكە اسىرا الاتىن جوبا, سوندىقتان ءبىز ورتاشا ماندەردى ەسەپكە الۋدى ۇسىنامىز», — دەدى ول.

سونىمەن قاتار, ا. شكارۋپا قازاقستاننىڭ ەنەرگيا جۇيەسى نەگىزگى قۋاتتىلىقتىڭ نەعۇرلىم جوعارى ۇلەسىمەن جانە جوعارى مانەۆرلىك قۋاتتىلىقتىڭ از ۇلەسىمەن سيپاتتالادى, بۇل جالپى ەنەرگيا جۇيەسىندە قۋاتتى رەتتەۋگە مۇمكىندىك بەرەتىن سۋ ەلەكتر ستانتسيالارىن دامىتۋعا ىقپال ەتەدى.

بۇدان وزگە, ەنەرگەتيكا ۆيتسە-ءمينيسترى قاتتى تۇرمىستىق قالدىقتاردى, قوقىستى قايتا وڭدەۋ بويىنشا جۇمىس ىستەيتىن بيو ەلەكتر ستانتسيالارىنىڭ قۇرىلىسى ماسەلەسىن پىسىقتاۋ قاجەتتىگىن اتاپ ءوتتى.

«اتالعان سەكتوردا بارىنشا كوپ باسىمدىق پەن ىنتالاندىرۋلار جاساعىمىز كەلەدى. پوليگوندار بازاسىندا بىردەن بىرنەشە ماسەلەنىڭ شەشىمىن تاباتىن بيو ەلەكتر ستانتسيالارىن ورناتۋدى كوزدەپ وتىرمىز. بۇل – قالدىقتاردى باسقارۋ, تازا جانە جاسىل ەنەرگيانى وندىرۋدە قايتالاما شيكىزاتتى پايدالانۋ», — دەدى ول.

ايتا كەتۋ كەرەك, قازاقستاندا جاڭارتىلاتىن ەنەرگيا كوزدەرىنىڭ اۋكتسيوندىق ساتۋ جۇيەسى العاش رەت 2018 جىلعى 23 مامىردا ىسكە قوسىلعان.