ورال قالاسىندا «ەۋرازيا پەرىشتەسى 2018» اتتى كىشكەنتاي فوتومودەلدەر بايقاۋى ءوتتى. بايقاۋعا قاتىسقان 23 مودەلدىڭ 21-ءى – ەستۋ, سويلەۋ جانە كورۋ قابىلەتى ناشار بالالارعا ارنالعان مەكتەپ وقۋشىلارى بولدى.
بۇل بايقاۋدى «پەرىشتە» قايىرىمدىلىق قورى ۇيىمداستىرعان. قور 2011 جىلدان بەرى تالانتتى بالالار مەن جاستاردى قولداۋمەن اينالىسىپ كەلەدى. بۇگىنگى بايقاۋدىڭ ماقساتى – مۇگەدەك بالالاردى قوعامنىڭ مادەني ومىرىنە تارتۋ, الەۋمەتتىك تۇرمىسقا بەيىمدەۋ ەكەن.
بايقاۋعا قاتىسۋعا باتىس قازاقستان وبلىسىنىڭ اۋداندارىنان جانە اتىراۋ قالاسىنان دا نيەت بىلدىرگەندەر كوپ بولدى. 4 پەن 17 جاس ارالىعىن قامتىعان سايىس بىرنەشە فوتوسەسسيادان تۇردى. بايقاۋدىڭ فينالدىق بولىمىنە 17 بالا ءوتتى. حاديشا بوكەەۆا اتىنداعى باتىس قازاقستان وبلىستىق قازاق دراما تەاترىنىڭ ساحناسىندا قورىتىندىلانعان سوڭعى سىناقتا جۇزدەن جۇيرىك شىققان جەڭىمپازدار انىقتالدى.
- كىشكەنتاي فوتومودەلدەر بۇل سايىسقا بار ىنتاسىمەن قاتىستى. جان تولقىتار ساتتەر دە بولدى. وسى بايقاۋعا قاتىسىپ جاتقان ءبىر بالانىڭ اكەسى كەشە عانا اۋىر ناۋقاستان دۇنيە سالدى. بىراق مارقۇم سوڭعى سوزىندە ۇلىنا سايىستان قالماۋىن ءوتىنىپ, جەڭىس تىلەپ كەتكەن ەكەن. ءتىپتى جەرلەۋ ءراسىمىنىڭ ۋاقىتىن دا كونكۋرستان كەيىنگە قالدىرعان. قوعام ومىرىنەن كوبىنە شەت قالىپ جۇرگەن مۇنداي جاندارعا كوپتىڭ كوز الدىندا, ساحنادا ونەر كورسەتۋ وڭاي ەمەس قوي. ولار ءبارىن جەڭىپ شىقتى, - دەيدى بايقاۋدى ۇيىمداستىرۋشى جانار داۋلەتوۆا.
سونىمەن, قىزدار اراسىندا ەڭ كىشكەنتايلار توبىندا 4 جاسار انەليا, ورتا توپتا 14 جاسار كريستينا, 15-16 جاستاعى ەرەسەكتەر توبىندا اسەم جانە ەگىز الەنا مەن ۆەرونيكا باس جۇلدەگە يە بولدى. ەر بالالار اراسىندا 11 جاسار ايبەرگەن مەن 17 جاسار اتىراۋلىق ەۆگەني جەڭىمپاز تانىلدى.
ايتپاقشى, جاس مودەلدەردىڭ فوتوسەسسياسىن جاساعان – ورالدىق جاس فوتوگرافتار بولاتىن. ەڭ ءساتتى كورىنىس, ەڭ مىقتى سۋرەت ءۇشىن ولار دا ءوزارا ونەر باسەكەسىنە ءتۇستى. ءسويتىپ, ەكاتەرينا موچالوۆا باس جۇلدەنى, شەرحان ەدەكەشەۆ – 1 ورىندى, ابىلاي عاليمات – «ەڭ كرەاتيۆ فوتوگراف» اتاعىن يەلەنىپ, مەيىربەك تاجقۇرانوۆ العىس حات الدى.
بايقاۋدىڭ گران-پري جۇلدەسى مەن 1 بايگەسىن العان فوتومودەلدەر پاريج قالاسىنداعى حالىقارالىق ءسان بايقاۋىنا جولداما الدى. ولار سونداي-اق «Edelweiss» ارت-ستۋدياسىندا مودەلينگ پەن ەتيكەت بويىنشا تەگىن ساباق الادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان