شىمكەنت قالاسىنداعى جاستار رەسۋرستىق ورتالىعىندا «QDigitalInform» سەمينارى ءوتتى. جۋرناليستيكانىڭ, ونىڭ ىشىندە قازاق ءتىلدى بۇقارالىق اقپارات قۇرالدارىنىڭ ساپاسىن ارتتىرۋعا سەپتىگىن تيگىزۋدى, «تسيفرلى قازاقستان» باعدارلاماسىن دارىپتەۋدى ماقسات ەتكەن جوبا شەڭبەرىندە وتكەن ءىس-شاراعا قاتىسۋشىلار, ياعني جاڭا تەحنولوگيالار زامانىندا پايدا بولعان جاڭاشىلدىقتاردى يگەرۋگە قىزىعۋشىلىق تانىتقاندار كوپ بولدى.
«Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن كوممۋنيكاتيۆتىك باستامالار جانە ستراتەگيالار قورى ۇيىمداستىرعان سەميناردىڭ ءبىرىنشى كۇنىندە قاتىسۋشىلار ەلەكتروندى ۇكىمەت پەن ەلەكتروندى مەملەكەتتىك قىزمەتتىڭ تسيفرلى مۇمكىندىكتەرىمەن تانىسسا, ەكىنشى كۇنى بلوكچەين تەحنولوگياسى تۋرالى تەرەڭ ماعلۇمات الدى. سونداي-اق قاتىسۋشىلارعا ۇلەستىرۋ ءتىزىلىمىنىڭ تەحنولوگياسى نەمەسە دەرەكقوردىڭ جەكەلەنۋ تەورياسىن مەڭگەرۋ مۇمكىندىگى بەرىلدى. سەميناردا بلوكچەين تەحنولوگياسىن مەملەكەتتىك باسقارۋ مەن بيزنەس سالاسىندا پايدالانۋ ادىستەرى تۋرالى بايانداعان شىمكەنت قالاسى بويىنشا اقپاراتتىق-تەحنولوگيالىق ورتالىعىنىڭ اقپاراتتىق جۇيەلەردى سۇيەمەلدەۋ باسقارماسىنىڭ باس ينجەنەرى مارجان سابدەن ەلىمىزدە ەلەكتروندى قۇجات اينالىمى جۇيەسى ەرەكشە ءرول اتقاراتىنىن, بارلىق دەڭگەيدەگى مەملەكەتتىك باسقارۋدىڭ جان-جاقتى اشىقتىعى مەن باقىلاۋىن قالىپتاستىرۋداعى ماڭىزدى فاكتور ەكەنىن اتاپ ءوتتى. ال باسقارمانىڭ باس مامانى ەرقۇلان بارماعانبەتوۆ وتانداستارىمىزدىڭ كيبەر كەڭىستىكتەگى باعىتى مەن دەڭگەيى تۋرالى باياندادى.
سەمينار سوڭىندا قاتىسۋشىلار العان بىلىمدەرىن بەكىتۋ ماقساتىندا شاعىن جوبالار جاساپ, سپيكەرلەردىڭ پراكتيكالىق تاپسىرمالارىن ورىندادى.
عالىمجان ەلشىباي,
«ەگەمەن قازاقستان»
شىمكەنت