زياتكەرلىك مەنشىك سالاسىنداعى ىنتىقماقتاستىق تۋرالى مەموراندۋمعا قول قويىلدى

قۇجات زياتكەرلىك مەنشىك قۇقىقتارى نىساندارىن قولدانۋ كەزىندە زاڭدى ساقتاۋدى كوزدەيدى. بۇل سالادا زاڭبۇزۋشىلىقتار, نەگىزىنەن, ونىمدەردىڭ زاتتاڭبالارىن دالەلدەمە قۇجاتتارىنسىز باسىپ شىعارۋ بولىپ تابىلادى. قاتىسۋشى تاراپتار اتالعان زاڭبۇزۋشىلىقتاردى بولدىرماۋدىڭ ماڭىزدىلىعىن مويىنداي وتىرىپ, مەنشىك سالاسىنداعى قۇقىق بۇزۋشىلىق سالدارىنا الدىن-الۋ شارالارى ارقىلى توتەپ بەرۋدى جۇزەگە اسىرۋ ماقساتىندا مەموراندۋم جاساستى.

«ساۋدا نەمەسە ويىن-ساۋىق نىساندارىنىڭ ماڭدايشىلارىنا بەلگىلى فيرمالاردىڭ زاتبەلگىلەرىن كوشىرىپ باسۋ دەرەكتەرى ءجيى كەزدەسەدى. بۇگىنگى مەموراندۋم وسىنداي زاڭسىزدىقتاردىڭ الدىن-الۋ جانە زاتتاڭبالاردى مەنشىك يەسىنىڭ رۇقساتىنسىز كوشىرىپ باسۋدىڭ جاۋاپكەرشىلىگى تۋرالى تاعى ءبىر رەت ەسكەرتۋ ماقساتىندا جاسالىپ وتىر»,-دەيدى اقتوبە وبلىسى ادىلەت دەپارتامەنتىنىڭ زياتكەرلىك مەنشىك قۇقىقتارى ءبولىمىنىڭ باسشىسى تيمۋر ۋبيشەۆ.

مەموراندۋم تالاپتارى بويىنشا كاسىپكەرلەر پالاتاسى, ادىلەت دەپارتامەنتى, اقتوبە وبلىسىنىڭ كاسىپكەرلىك باسقارماسى تۇرعىندارعا ارنالعان ءتۇسىندىرۋ جۇمىستارىن جۇرگىزىپ, مەملەكەت كەپىلدىك بەرگەن تەگىن زاڭ كومەگىنە جانە قۇقىقتىق ساۋاتتىلىعىن ارتتىرۋعا كومەك بەرەدى. اقتوبە وبلىسىنىڭ ىشكى ىستەر دەپارتامەنتى وسىنداي قۇقىقبۇزۋشىلىقتار انىقتالعان جاعدايدا ءتيىستى شارالار قولدانادى. باسپاحانا باسشىلارى تاۋار تاڭبالارىن دالەلدەمە قۇجاتتارىنسىز باسىپ شىعارماۋعا مىندەتتەلەدى.

«زاڭدى ساقتاۋ-ەلىمىزدەگى ءاربىر ازاماتتىڭ مىندەتى. بۇل تۇرعىدا ارەكەتسىزدىك  تانىتۋ دا زاڭسىزدىققا جاعداي تۋعىزۋ بولىپ سانالادى. سوندىقتان قالامىزداعى ءاربىر ازاماتتى زاڭ تالاپتارىن ورىنداۋدا نەمقۇرايلىق تانىتپاۋعا شاقىرامىن. بۇگىنگى مەموراندۋم قوعامداعى قاتىناستاردى دۇرىس شەشۋگە, سونىمەن قاتار قانداي دا بولماسىن قاتىناستاردىڭ بۇزىلۋىنىڭ الدىن الۋ مەن رەتتەۋگە ءوز ۇلەسىن قوسادى دەپ ويلايمىن»,-دەدى اقتوبە وبلىسىنىڭ «اتامەكەن» كاسىپكەرلەر پالاتاسىنىڭ ديرەكتورى نۇرلىبەك مۇقانوۆ.

مەموراندۋم اقتوبە وبلىسىنىڭ اكىمى مەن وبلىستىق پروكۋراتۋرا بەكىتكەن «كريمينوگەندىك جاعدايعا قوعامنىڭ اسەرىن ارتتىرۋ جولىمەن قۇقىقبۇزۋشىلىقتاردىڭ الدىن-الۋ» شارالار جوسپارى اياسىندا جۇزەگە اسىرىلدى.

تەمىر قۇسايىن,

«ەگەمەن قازاقستان»