«اۋىرىپ ەم ىزدەگەنشە, اۋىرمايتىن جول ىزدە». ونەر جۇلدىزدارىمەن كەزدەسۋدى اتالى سوزبەن باستاعان دەنساۋلىق ساقتاۋ ءمينيسترى ەلجان ءبىرتانوۆ سالاۋاتتى ءومىر سالتىن ساقتاۋدى دارىپتەۋدە ەلگە ەتەنە جاقىن ونەرپازداردىڭ ءرولى ەرەكشە ەكەنىنە توقتالا كەلىپ, بىرقاتار بەلگىلى اكتەر, انشىلەرگە جانە سپورتشىلارعا «دەنساۋلىق ەلشىسى» بەلگىسىن تابىستادى.
قازاننىڭ 25-26 كۇندەرى ەلوردادا وتەتىن الماتى دەكلاراتسياسىنىڭ 40 جىلدىعىنا ارنالعان جاھاندىق كونفەرەنتسيا قارساڭىندا ونەر جۇلدىزدارىنا بەرىلگەن بۇل اتاقتىڭ ءمانى زور. ويتكەنى جۇرت تانىمال تۇلعالارعا قاراپ بوي تۇزەيدى, جاستار ولارعا ەلىكتەيدى. وسى تۇرعىدا حالىق نازارىنداعى انشىلەر مەن اكتەرلەردىڭ كۇندەلىكتى دۇرىس تاماقتانىپ, سپورتپەن اينالىسۋى ادامداردى سالاۋاتتى ءومىر سۇرۋگە تەز جەتەلەيتىنى انىق. مەملەكەت باسشىسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا بۇقارالىق سپورت پەن دەنە شىنىقتىرۋدىڭ قولجەتىمدىلىگىن ارتتىرۋ بويىنشا ۇكىمەت پەن اكىمدەرگە ناقتى تاپسىرمالار بەرگەنى بەلگىلى. ال بۇل سالادا ىستەلەتىن جۇمىستارعا بۇگىنگى «دەنساۋلىق ەلشىلەرىنىڭ» قوسار ۇلەسى دە از بولماق ەمەس.
«ەلباسى ءوز جولداۋىندا قازىرگى كۇنى دەنساۋلىق ساقتاۋ سالاسى مەن مەديتسينالىق قىزمەتتىڭ ساپاسى حالىقتى مازالاپ وتىرعان ەڭ باستى ماسەلە ەكەندىگىن اتاپ وتكەن بولاتىن. ارينە, ءبىزدىڭ مەديتسينا سالامىزدا ماسەلە كوپ. بىراق, ءار ادام دەنساۋلىعىنىڭ 50 پايىزى ونىڭ سالاۋاتتى ءومىر سۇرۋىنە تىكەلەي بايلانىستى ەكەندىگى عىلىمي تۇرعىدا دالەلدەنگەن. قازاقتا «اۋىرىپ ەم ىزدەگەنشە, اۋىرمايتىن جول ىزدە» دەگەن ءسوز بار. سوندىقتان ءبىزدىڭ مينيسترلىكتىڭ ستراتەگياسىندا اۋرۋلاردىڭ الدىن الۋ ماڭىزدى باعىت. سوڭعى جىلدارى دەنە شىنىقتىرۋمەن اينالىساتىن ادامداردىڭ سانى ارتىپ كەلەدى. دۇرىس تاماقتانۋ ماسەلەسى دە ءجيى كوتەرىلەدى. ءبىز وسى جۇمىسقا حالىق سىيلايتىن سىزدەر سياقتى تانىمال ازاماتتاردى قوسۋدى ءجون كوردىك», دەگەن مينيستر ە.ءبىرتانوۆ «دەنساۋلىق ەلشىسى» توسبەلگىسىن ءانشى, ەلىمىزدىڭ ەڭبەك سىڭىرگەن قايراتكەرى قاراقات ابىلديناعا, اكتەر نۇرلان الىمجانوۆقا, ءانشى قايرات نۇرتاسقا, ءانشى, كاسىپقوي بوكسشى يبراگيم ەسكەندىرگە, گرەك-ريم كۇرەسى بويىنشا وليمپيادا چەمپيونى يۋري مەلنيچەنكوعا جانە «سپارتا-استانا» كتك توبىنىڭ كاپيتانى دانيار جۇمادىلوۆكە تاقتى.
«دەنساۋلىق ەلشىلەرى» دەنساۋلىق ساقتاۋ مينيسترىنە العىستارىن ايتىپ, جاڭا باستاماعا قولداۋ بىلدىرەتىندىكتەرىن جەتكىزدى. «سالاۋاتتى ءومىر سالتىن ناسيحاتتاۋ – ءاربىر ازاماتتىڭ پارىزى. بۇل اتاق بىزگە ۇلكەن جاۋاپكەرشىلىك جۇكتەيدى. مينيسترلىكتىڭ اماناتىن حالىققا جەتكىزۋدە بەلسەندى جۇمىس اتقارامىز. «ەلشى» دەگەن اتىمىزعا لايىق ەكى اراعا التىن كوپىر بولۋعا كۇش سالىپ, سپورتپەن اينالىساتىن بولامىز», دەپ ۋادە بەردى ءانشى ق.ءابىلدينا.
ال اكتەر نۇرلان ءالىمجانوۆ سالاۋاتتى ءومىر سالتىن ساقتاۋ ءتان ساۋلىعىمەن قوسا رۋحاني جاڭعىرۋعا دا وڭ اسەر ەتەتىنىن ايتتى. «كەزىندە باتىرحان شۇكەنوۆ بۇۇ اياسىنا كەرەمەت باستامالاردى جۇزەگە اسىرىپ, قانشاما حالىقتى سوڭىنان ەرتكەنى بەلگىلى. وسىنداي ۇلكەن جاۋاپكەرشىلىكتى بىزگە جۇكتەپ جاتقانىڭىز ءبارىمىز ءۇشىن مارتەبە. ونەر ادامدارى مەن اق حالاتتى ابزال جانداردىڭ جۇرتشىلىقتى جاقسىلىققا شاقىرعان يگىلىكتى ءىسى جاڭعىرا بەرسىن. بۇل دا ءبىر رۋحاني جاڭعىرۋ دەپ بىلەمىز. ويتكەنى ادامنىڭ رۋحى ساۋ بولعان كەزدە وي-ساناسى دا, دەنى دە ساۋ بولادى», دەدى ول.
مەديتسينا سالاسىنىڭ تاعى ءبىر وزەكتى ماسەلەسى انا مەن بالا دەنساۋلىعى ەكەنىنە توقتالعان مينيستر قاراقات ءابىلدينانى حالىق ءانشى رەتىندە عانا ەمەس, اياۋلى انا دەپ تە قۇرمەتتەيتىندىگىن, «انا مەن بالا» باعدارلاماسىنداعى ىستەپ جاتقان جۇمىستارىن جوعارى باعالايتىنىن اتاپ ءوتتى. ء«اربىر پەندە دەنى ساۋ ۇرپاقتى تىلەيدى. وكىنىشكە قاراي, ەلىمىزدە ايىقپاس دەرتكە شالدىققان بالالار كوپ. «انا مەن بالا» باعدارلاماسىن جۇرگىزۋ بارىسىندا سوعان كوزىم جەتتى. بۇل كوبىنەسە جۇكتىلىك كەزىندەگى كەتكەن قاتەلىكتەردەن تۋىنداپ وتىر. ياعني, بولاشاق انا ءوزىنىڭ دەنساۋلىعىنا سەلقوس قارايدى. بۇل قازىرگى تاڭدا دابىل قاعاتىن ماسەلە. سوندىقتان كەز كەلگەن بالا سۇيگىسى كەلەتىن ايەل دەنساۋلىعىن كۇتىپ, بالانى جوسپارلى تۇردە دۇنيەگە اكەلۋگە دايىندالسا ەكەن», دەدى بەس بالانىڭ اناسى ق.ءابىلدينا.
كەزدەسۋ سوڭىندا دەنساۋلىق ءمينيسترى «ەلشىلەردى» 24 قازاندا استاناداعى بوتانيكالىق باقتا وتەتىن «سوزدەن ىسكە/Walkthe Talk/وت سلوۆ ك دەلۋ» اكتسياسىنا قاتىسۋعا شاقىردى.
مايگۇل سۇلتان,
«ەگەمەن قازاقستان»