كالينينگراد قالاسىندا «رەسەيدىڭ تسيفرلى بولاشاعى» ينجەنەرلىك-تەحنيكالىق شىعارماشىلىق فەستيۆالى اياسىندا روبوت تەحنيكاسى بويىنشا وتكەن حالىقارالىق چەمپيوناتتا قاراعاندى وبلىسىنىڭ كومانداسى ءۇش التىن جانە ءبىر قولا مەدال جەڭىپ الدى.
بايراقتى دودادا تۇڭعىش رەت باق سىناعان قاراعاندى كومانداسىنىڭ ساپىندا 10-15 جاس ارالىعىنداعى جەتى وقۋشى ەل نامىسىن قورعادى. ولاردىڭ اراسىندا قالاداعى №38 مەكتەپ-گيمنازيانىڭ وقۋشىلارى جانە «RoboClub» روبوت تەحنيكاسى مەكتەبىنىڭ تاربيەلەنۋشىلەرى بولدى.
قاراعاندىلىق وقۋشىلار «سۋمو» جانە «روبوفۋتبول» اتالىمدارى بويىنشا ءبىلىم سىناسقان بولاتىن. روبوتتار سۋموسى – «لەگو» بولشەكتەرىنەن قۇراستىرىلعان ەكى روبوتتىڭ ءبىر-ءبىرىن بەلگىلەنگەن شەڭبەردەن ىعىستىرىپ شىعارۋى باعدارلامالانعان ءپان. ال «روبوفۋتبولدا» روبوتتاردان قۇرالعان كوماندالار ءوزارا سايىسقا تۇسەدى. ولاردىڭ ماقساتى – بەلگىلەنگەن ۋاقىت ىشىندە قارسىلاس قاقپاعا مەيلىنشە كوپ گول سوعۋ.
وسىمەن ەكىنشى رەت ۇيىمداستىرىلعان چەمپيونات قورىتىندىسىندا «روبوفۋتبول» اتالىمى بويىنشا جۇپتاسىپ ونەر كورسەتكەن داۆيد شۋرالەۆ پەن ستانيسلاۆ بونە, دانيل پينيگين مەن ەۆگەني لۋكيانوۆ, سونداي-اق يليا پوۆەتين مەن دانيل مۋللەروۆ توپتارى ۇزدىك شىقتى. قۇرامانىڭ ەڭ جاس مۇشەسى 10 جاسار اندرەي ماشكين «سۋمو» اتالىمىندا قولا جۇلدەگە قول جەتكىزدى.
قايرات ءابىلدا,
«ەگەمەن قازاقستان»
قاراعاندى