اتىراۋ وبلىستىق تىلدەردى دامىتۋ جونىندەگى باسقارما جىل سايىن جۇمەكەن وقۋلارىن وتكىزىپ كەلەدى. بۇل ءۇردىس بيىل دا جالعاستى. قازاقستان رەسپۋبليكاسى گيمنى اۆتورلارىنىڭ ءبىرى, مەملەكەتتىك سىيلىقتىڭ لاۋرەاتى جۇمەكەن ناجىمەدەنوۆ اتىنداعى رەسپۋبليكالىق كوركەمسوز وقۋ شەبەرلەرى بايقاۋى اقىننىڭ تۋعان جەرىنە تالانتتى جاستاردى جينادى. ەلىمىزدىڭ تۇكپىر-تۇكپىرىنەن كەلگەن جاستار جۇمەكەننىڭ پروزالىق, پوەزيالىق شىعارمالارىن جاتقا وقۋدان سايىسقا ءتۇستى.
قازىلار القاسىنىڭ توراعاسى, قازاقستان جازۋشىلار وداعى باسقارما توراعاسىنىڭ ورىنباسارى, پرەزيدەنت سىيلىعىنىڭ لاۋرەاتى مەرەكە قۇلكەنوۆ: «جۇمەكەننىڭ كەز كەلگەننىڭ تۇسىنۋگە ورەسى جەتە بەرمەيتىن تۇڭعيىق تەرەڭ شىعارمالارى – قازاق ادەبيەتىنىڭ ماڭگىلىك مۇراسى. بايقاۋعا قاتىسقان 17 جاستىڭ سول تەرەڭدىك پەن بيىكتىككە دەگەن قۇلشىنىسى كوڭىل قۋانتادى», دەپ اتاپ ءوتتى.
– جۇمەكەن وقۋلارى بۇرىن وبلىستىق دەڭگەيدە وتەتىن, بيىل ءۇشىنشى جىل قاتارىنان رەسپۋبليكالىق بايقاۋ ۇيىمداستىردىق, – دەيدى وبلىستىق تىلدەردى دامىتۋ جونىندەگى باسقارما باسشىسى ءاسيا قىستاۋباەۆا. – جىل ساناپ بايقاۋعا قىزىعۋشىلىق تانىتاتىن جاستار قاتارى كوبەيىپ كەلەدى. بايقاۋ قورىتىندىسىندا باس جۇلدەنى قاراعاندىلىق ايسۇلۋ نۇرتاي جەڭىپ الدى.
باقىتگۇل باباش,
«ەگەمەن قازاقستان»
اتىراۋ