الماتى الما وسىرۋگە قولايلى مەكەن عانا ەمەس, ءدامى تاتقان جاننىڭ تاڭدايىندا قالاتىن ءتاتتى المالاردىڭ وتانى. كوپتەگەن زەرتتەۋلەرگە دەن قويساق, الما جەمىسى الاتاۋ باۋرايىنداعى الىپ شاھاردىڭ تەرەڭ تاريحىمەن استاسىپ, ساباقتاسىپ جاتقانىن بايقايمىز. قالانىڭ كونە مادەنيەتىنەن حابار بەرەتىن الماعا قاتىستى دەرەكتەردى ءجىتى زەرتتەپ, ۇرپاققا ۇلگى ەتۋدىڭ ماڭىزى زور. وسى رەتتە الماتىدا تۇڭعىش رەت الما مۋزەيى اشىلعانىن سۇيىنشىلەپ ايتا كەتكەنىمىز ءجون.
قالا اتىمەن اتتاس «الماتى» قوناقۇيىندە ورىن تەپكەن اياداي مۋزەيدەن الما مەن الماتىنىڭ تاريحىنان سىر شەرتەتىن تاڭعاجايىپ دەرەكتەردى كەزدەستىرۋگە بولادى. الماعا قاتىسى بار اڭىزدار مەن ەرتەگىلەر, المانىڭ الەمگە قالاي تاراعانى تۋرالى اڭگىمەلەر, باقشاشىلىق جانە المانىڭ تاساسىنداعى تىلسىم ماندەرگە بويلاتاتىن تىڭ اقپاراتتاردىڭ بارلىعى وسىندا توپتاستىرىلعان. جوباعا مۇرىندىق بولعان «المالى جۇماق» قوعامدىق قورىنىڭ اتقارۋشى ديرەكتورى اجار جاندوسوۆانىڭ سوزىنشە, مۋزەيدىڭ ماقساتى – قازاقستاندىقتار مەن شەتەلدىكتەرگە ەلىمىزدىڭ المانىڭ وتانى ەكەنىن جانە بۇل جەمىستىڭ الماتى مەن الەم ءۇشىن قانداي ماڭىزدى ەكەنىن پاش ەتۋ.
– ءبىز كوپ ماتەريال جيناقتادىق. ولاردىڭ اراسىندا وتاندىق جانە شەتەلدىك اۆتورلاردىڭ الما تۋرالى كىتاپتارى, قازاقستان – المانىڭ وتانى ەكەنىن دالەلدەيتىن فرانتسۋز جانە نەمىستەر تۇسىرگەن دەرەكتى فيلمدەر بار. ءبىز المالى ولكەمىز. وكىنىشكە وراي, قولدا باردى باعالامايمىز. ەكى رەت الما باعىن جوعالتتىق. ءاۋ باستا قالا باۋرايىنداعى الما ورماندارىنان ايىرىلدىق. توقسانىنشى جىلدارى قالانى ۇلعايتۋ سالدارىنان قانشاما الما اعاشى جويىلدى. ەلىمىزدەگى الما كاسىبىن جانداندىرۋ ءۇشىن بۇل تاقىرىپتى كەڭىنەن قوزعايمىز. الما – ءبىزدىڭ ايرىقشا قۇندىلىعىمىز.مۇنداعى ەكسپوزيتسيالار ءار 2-3 اي سايىن وزگەرتىلىپ, تولىعىپ وتىرادى. كەيىن مۋلتيمەديالىق تۇراقتى ەكسپوزيتسيا پايدا بولماق. ارۋ قالامىزعا ەجەلگى الما مادەنيەتىن قايتارعىمىز كەلەدى, – دەيدى اجار جاندوسوۆا.
ۇيىمداستىرۋشىلاردىڭ ايتۋىنشا مۋزەي قابىرعاسىندا ءتۇرلى تاقىرىپتاردى قامتىعان ونەر كورمەلەرى ۇزدىكسىز وتكىزىلىپ تۇرماق. المانىڭ ارعى وتانىنا بالاناتىن الىپ مەگاپوليستەگى شاعىن مۋزەي قالا قوناقتارىن شاھار تاريحىنىڭ تىلسىمىنا بويلاتاتىن بىردەن-ءبىر مادەني ورىنعا اينالسا دەگەن تىلەگىمىز بار.
ارمان وكتيابر,
«ەگەمەن قازاقستان»
الماتى