وبلىستاعى 2830 بيۋدجەتتىك مەكەمەنىڭ بارلىعى, ياعني 100 پايىزى قىسقى ماۋسىمعا دايىن. ونىڭ ىشىندە ءبىلىم سالاسىندا – 1289, دەنساۋلىق ساقتاۋ سالاسىندا – 788, الەۋمەتتىك سالادا – 753 مەكەمە.
بۇل جونىندە تۇركىستان وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى مارعۇلان مارايىم ءمالىم ەتتى. وبلىس بويىنشا جەكە تۇرعىنداردىڭ كومىر وتىنىنا دەگەن جالپى قاجەتتىلىگى – 902 مىڭ توننا بولسا, تەمىر جول ستانتسيالارىنداعى قويمالارعا تاسىمالدانعانى – 689,1 مىڭ توننا. باسقارما باسشىسىنىڭ مالىمدەۋىنشە, وبلىستاعى ورتالىقتاندىرىلعان جىلۋمەن قامتاماسىز ەتىلەتىن كوپقاباتتى تۇرعىن ۇيلەردىڭ سانى – 544, ولار جىلۋ بەرۋ ماۋسىمىنا دايىن. سونداي-اق بيۋدجەتتىك مەكەمەلەرگە قاجەتتى 169,1 مىڭ توننا كومىر تولىق تاسىمالدانعان. ال وبلىستاعى تەمىر جول ستانتسياسى قويمالارىنداعى 1 توننا كومىردىڭ باعاسىنا كەلسەك, «شۇباركول» كومىرى – 14-15 مىڭ تەڭگە, «بوتاقارا» كومىرى – 10-11 مىڭ تەڭگە كولەمىندە. وبلىستىڭ سولتۇستىك جانە تاۋلى ايماقتارىندا اتاپ ايتقاندا, سوزاق, تولەبي, تۇلكىباس اۋداندارىندا 15 قازاننان باستاپ جىلۋ بەرىلۋدە.
ايتا كەتەلىك, ءۇشىنشى مەگاپوليس شىمكەنت قالاسىندا جىلۋ جىلداعى جوسپاردان ەرتە بەرىلە باستادى. قالا اكىمدىگىنىڭ حابارلاۋىنشا, دۇيسەنبىدەن ياعني, 15 قازاننان باستاپ بيۋدجەتتىك ۇيىمدارعا جىلۋ بەرىلگەن, ال كوپقاباتتى ۇيلەرگە جىلۋ 20 قازاننان باستاپ قوسىلادى.
عالىمجان ەلشىباي,
«ەگەمەن قازاقستان»
تۇركىستان وبلىسى