بەرىك يماشەۆتىڭ توراعالىعىمەن ورتالىق سايلاۋ كوميسسياسىندا گرۋزياداعى پرەزيدەنت سايلاۋىنا قازاقستاننان جىبەرىلەتىن بايقاۋشىلار ءتىزىمىن بەكىتۋگە قاتىستى وتىرىس ءوتتى.
وسك مالىمەتىنشە, گرۋزياداعى سايلاۋعا بايقاۋشى رەتىندە ەلىمىزدەن 9 ادام رەسمي تىركەلگەن. ولاردىڭ ىشىندە 3 باقىلاۋشىنى گرۋزيا وسك ارنايى شاقىرعان. باقىلاۋشىلار قاتارىنا وسك-دان, قازاقستاننىڭ باس پروكۋراتۋراسىنان, جوعارعى سوتى مەن «نۇر وتان» ساياسي پارتياسىنان – 1 كانديداتۋرادان, سىرتقى ىستەر مينيسترلىگىنەن 2 كانديداتۋرا ۇسىنىلعان. ايتا كەتەيىك, وسك 28 قازاندا وتەتىن سايلاۋدى باقىلاۋعا قاتىسۋ ءۇشىن جەتى ساياسي پارتياعا شاقىرۋ جىبەرگەن, بىراق تەك «نۇر وتان» پارتياسى ءوز كانديداتۋراسىن ۇسىنعان.
ەسكەرە كەتەتىن جايت, قازاقستاننان شەتەلدەرگە جىبەرىلەتىن بايقاۋشىلار ءتىزىمى وسك قاۋلىسىمەن بەكىتىلەدى.
ۇسىنىلعاندار ءتىزىمى رەسمي بەكىتىلگەننەن كەيىن كوميسسيا مۇشەسى زاۋرەش بايمولدينا باقىلاۋشىلار ءۇشىن ارنايى ترەنينگ وتكىزدى. ترەنينگ كەزىندە ولار سايلاۋ ناۋقانىنداعى نەگىزگى قۇجاتتارمەن, ستاندارتتارمەن تانىستىرىلدى. اسىرەسە سايلاۋ پروتسەسىنىڭ جانە الدىن الا شىعارىلاتىن سايلاۋ ناتيجەلەرىنىڭ ەرەكشەلىكتەرىنە اسا كوڭىل ءبولىندى. سونىمەن قاتار شەتەلدەگى باقىلاۋشىلار سايلاۋ كەزىندە ۇستانۋى ءتيىس ەرەجەلەر تانىستىرىلدى.
بۇگىندە ەلىمىز سايلاۋدى حالىقارالىق دەڭگەيدە باقىلاۋ ىسىنە بەلسەنە اتسالىسىپ كەلەدى. 2005-2018 جىلدار كولەمىندە حالىقارالىق باقىلاۋشى رەتىندە ەلىمىزدەن شامامەن 123 سايلاۋ كامپانياسىنىڭ جۇمىسىن باقىلاۋعا 1,9 مىڭ وكىل جىبەرىلگەن.
قارلىعاش قۇرامىس,
«ەگەمەن قازاقستان»