قازاقستاندا العاش رەت بيزنەس سالاسىنا قاتىستى «نەگىزىن سالۋشىلار» – «وسنوۆاتەلي» اتتى رەاليتي-شوۋ جوباسى قولعا الىندى. اتالعان جوباعا قاتىسامىن دەگەن ازاماتتاردان ءوتىنىم قابىلداۋ 2018 جىلدىڭ 18 قازانىنان باستالادى.
«نەگىزىن سالۋشىلار» – «وسنوۆاتەلي» قازاقستانداعى YouTube ارناسىنا شىعارىلاتىن العاشقى شىنايى بيزنەسشوۋ جوباسى بولىپ تابىلادى.
جوباعا جاڭا ىسكەرلىك يدەياسى بار جانە ونى ىسكە اسىرۋدى كوزدەيتىن 18 بەن 25 جاس ارالىعىنداعى قازاقستاندىق كەز كەلگەن ازامات قاتىسا الادى. ول ءۇشىن تالاپكەرلەر 2018 جىلدىڭ 15 قازانى مەن 15 جەلتوقسانى ارالىعىندا جوبانىڭ osnovateli.kz سايتىنا ءوز وتىنىمدەرىن جولداۋى ءتيىس.
ىرىكتەۋ قورىتىندىسى بويىنشا ەڭ ءتيىمدى ءارى پەرسپەكتيۆالى دەگەن 21 بيزنەس-جوبا انىقتالاتىن بولادى. ولاردىڭ اۆتورلارى ءبىر اي بويى تمد اۋماعىنداعى ەڭ مىقتى بيزنەس-جاتتىقتىرۋشىلارمەن دايىندالادى جانە بيزنەس-لاگەرگە شاقىرىلادى. سونداي-اق ولار قازاقستاندىق ءىرى كاسىپكەرلەردىڭ قامقورلىعىمەن ءوز جوبالارىن قازىلار القاسى الدىندا ودان ءارى قورعاۋعا دايىندالادى. بۇدان كەيىن قازىلار القاسى ەڭ ءتيىمدى دەپ تابىلعان 3 جوبانى تاڭداپ الادى. ال وسى ءۇش جوبا بويىنشا ءبىرىنشى, ەكىنشى, ءۇشىنشى ورىن العاندار انىقتالىپ, ولارعا سايكەسىنشە ون, بەس جانە ءۇش ميلليون تەڭگە بەرىلەدى. حالىق جوباعا قاتىستى بارلىق ۇدەرىستەردى, ياعني قاتىسۋشىلاردىڭ ءوز جۇمىستارىن دايىنداۋ, ونى قورعاۋ پروتسەستەرىن YouTube كانالى ارقىلى كورە الادى.
جوبا قازاقستانداعى شاعىن جانە ورتا بيزنەستىڭ دامۋى ءۇشىن جاستار اراسىندا بيزنەستى باستاۋ جانە ىسكە قوسۋ ىسىنە قىزىعۋشىلىقتى ارتتىرۋ ارقىلى العىشارتتار جاساۋعا باعىتتالعان.
«نەگىزىن سالۋشىلار» جوباسى تولىعىمەن جەكە جوبا بولىپ تابىلادى. ونىڭ مەملەكەتتىك ۇيىمدارمەن ەشقانداي قاتىسى جوق. دەگەنمەن, جوبانىڭ ماڭىزدىلىعىنا بايلانىستى قازاقستان اقپارات جانە كوممۋنيكاتسيالار ءمينيسترى داۋرەن اباەۆ ونى قولدايتىنىن مالىمدەدى.
د.اباەۆ اتالعان جوبانىڭ باستالۋىنا وراي «بيزنەس – كەز كەلگەن ەكونوميكانىڭ نەگىزى بولىپ تابىلادى. ول حالىقتىڭ ءال-اۋقاتىن ارتتىرۋدى قامتاماسىز ەتەدى, ال كاسىپكەرلەر ورتا تاپتىڭ نەگىزىن قۇرايدى. قازىرگى تاڭدا قازاقستاندا بيزنەستى قولداۋعا, دامىتۋعا ۇلكەن كۇش جۇمسالىپ وتىر», دەدى.
ونىڭ ايتۋىنشا, «نەگىزىن سالۋشىلار» – «وسنوۆاتەلي» اتتى بۇل جاڭا جوبا جاستاردىڭ بيزنەس باستامالارىن قولداۋعا باعىتتالعان يگى قادام بولىپ تابىلادى. سونداي-اق مينيستر اتالعان جوبانىڭ قازاقستاندىقتار ءۇشىن تابىسقا جەتۋدىڭ, يگىلىكتى ىستەردىڭ باستاۋ الاتىن الاڭىنا اينالاتىنىنا سەنىم ءبىلدىردى.
«IC group» حولدينگىنىڭ جەتەكشىسى لاريون ليان جوبانىڭ دەمەۋشىسى بولىپ تابىلادى. ول دەمەۋشىسى جوبانى قولعا الۋداعى نەگىزگى ماقسات تۋرالى بىلاي دەدى:
«مەن ءوزىمنىڭ ومىرلىك تاجىريبەمدى قازىرگى جاستارمەن بولىسكىم كەلەدى. تالانتتى جاستاردىڭ ءوز بيزنەستەرىن باستاۋدان باس تارتاتىنىن, ءتىپتى ءوز كاسىبىن اشۋدى باستاماق تۇگىلى, وعان تىرىسپايتىنىن ويلاپ كورىڭىزشى... جاستار ءىستىڭ كوزىن تابۋدى, قولعا العىسى كەلگەن شارۋاسىن قالاي باستاۋدى بىلمەيدى دە, ىلە كۇدىككە شىرمالىپ قالادى. وزىنە كۇمانمەن قاراۋ ونى ءوز قابىلەتىن باعالاماۋعا الىپ كەلەدى دە تابىسقا جەتە المايدى. سوندىقتان ولارعا جول كورسەتكەنىمىز ابزال».
شوۋدىڭ ءبىرىنشى شىعارىلىمى 2019 جىلدىڭ اقپان ايىنا جوسپارلانعان.