جاقىندا قوستانايعا كەلگەن استانا مەن قازاقستان ءميتروپوليتى الەكساندر ساياسي قۋعىن-سۇرگىن كەزىندە قوستاناي قالاسىندا جاپپاي اتىلعان ادامدار سۇيەگى قالعان ورىنعا بەلگى ورناتۋدى ۇسىندى.
«كەڭەس وكىمەتى جىلدارىنىڭ كۇناسىز ادامدار زارداپ شەككەن, قىرىلعان تاريح بەتتەرى بولدى. ولاردىڭ اراسىندا ساياسي تۇلعالارمەن قاتار, قاراپايىم ەڭبەك ادامدارى بولدى. سونىمەن قاتار ءدىن قىزمەتكەرلەرى, ءدىندارلار دا جازىقسىز جاپا شەكتى. قوستاناي جەرىندە دە وسىنداي جازىقسىز قۇربانداردىڭ سۇيەگى جاتقان بىرنەشە ورىن بار. پرەزيدەنت نۇرسۇلتان نازارباەۆ «ساياسي قۋعىن-سۇرگىن قۇرباندارىن ەسكە الۋ» تۋرالى جارلىق شىعاردى. تاريحي ادىلەتسىزدىكتەر وسىلاي قالپىنا كەلتىرىلدى. ءبىزدىڭ بىلۋىمىزشە, قۇرباندار جەرلەنگەن جەرلەردە 4 مىڭنان اسا اتىلعان جانداردىڭ سۇيەگى جاتىر. وز ەلىنىڭ, جەرىنىڭ تاريحىن ۇمىتپاۋ – ءار ادامنىڭ پارىزى بولۋى ءتيىس. اسىرەسە, مۇنداي اۋىر تاريحتى ۇمىتۋعا بولمايدى» - دەدى مەتروپوليت الەكساندر.
ميتروپوليت قوستاناي قالاسىنىڭ ورتالىعىنداعى ساياسي قۋعىن-سۇرگىننىڭ جازىقسىز قۇربانى بولعان ادامدار جەرلەنگەن ناريمانوۆ قورىمىندا بولدى. وندا قۇرباندارعا ارنالعان بەلگى ورناتۋدى ۇسىندى.
ءنازيرا جارىمبەت,
«ەگەمەن قازاقستان»
قوستاناي