بۇگىن مەملەكەت باسشىسىنىڭ تاپسىرماسىمەن قر پرەمەر-ءمينيسترى باقىتجان ساعىنتاەۆ جۇمىس ساپارىمەن شىعىس قازاقستان وبلىسىنا كەلدى. پرەزيدەنتتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا العا قويعان نەگىزگى مىندەتتەردى ءتۇسىندىرۋ ماقساتىندا سەمەي جانە وسكەمەن قالالارىندا اكتيۆپەن جانە جۇرتشىلىقپەن كەزدەسۋلەر وتەدى., دەپ حابارلايدى پرەمەر-ءمينيستردىڭ ءباسپاسوز قىزمەتى.
سەمەي قالاسىندا اكتيۆپەن جانە جۇرتشىلىق وكىلدەرىمەن پرەزيدەنت جولداۋىنىڭنەگىزگى باعىتتارى تالقىلانادى. اتاپ ايتقاندا, حالىقتىڭ تابىس دەڭگەيىن ارتتىرۋ, ءبىلىم بەرۋ مەن دەنساۋلىق ساقتاۋ ساپاسىن جاقسارتۋ, تۇرعىن ءۇيدىڭ قولجەتىمدىلىگى ماسەلەلەرى قارالادى. بۇعان قوسا, پرەمەر-مينيستر بىرقاتار الەۋمەتتىك جانە ونەركاسىپتىك نىسانداردى ارالاپ, سولاردىڭ نەگىزىندە وڭىردە «نۇرلى جول», «نۇرلى جەر», «دەنساۋلىق» جانە ت.ب. مەملەكەتتىك باعدارلامالاردىڭ ىسكە اسىرىلۋىمەن تانىسادى.
وبلىس ورتالىعىندا اكتيۆپەن جانە جۇرتشىلىقپەن كەزدەسۋدە حالىقتىڭ ءال-اۋقاتىن ارتتىرۋعا باعىتتالعان الەۋمەتتىك مىندەتتەرگە باسا كوڭىل بولىنەدى. كوپتەگەن ماسەلەلەر, سونىڭ ىشىندە يندۋستريالاندىرۋدى, شاعىن جانە ورتا بيزنەستى, اوك دامىتۋدىڭ, وڭىرلەردى تۇراقتى دامىتۋدىڭ جاڭا تاسىلدەرى قارالادى. وسكەمەندەگى وڭدەۋ ونەركاسىبىنىڭ ءىرى نىساندارى مەن ءبىلىم بەرۋ مەكەمەلەرىن ارالاۋ جوسپاردا بار.
وڭىرگە جاسالعان جۇمىس ساپارى سەمەي قالاسىنان باستالدى. پرەمەر-مينيستر ۇشىپ-قونۋ جولاعى مەن اەروۆوكزالدى رەكونسترۋكتسيالاۋ ناتيجەسىمەن تانىستى. شىعىس قازاقستان وبلىسىنىڭ اكىمى د. احمەتوۆتىڭ بايانداۋىنشا, اۋەجايدى جاڭعىرتۋ رەيستەر مەن جولاۋشىلار سانىن ۇلعايتۋعا, سونداي-اق, ۇشۋ كەزىندەگى قاۋىپسىزدىك دەڭگەيىن ارتتىرۋعا جول اشادى.
2016 جىلعى جەلتوقساندا «نۇرلى جول» مەملەكەتتىك باعدارلاماسى اياسىندا باستالعان اۋەجايدى رەكونسترۋكتسيالاۋ جۇمىستارى بيىل اياقتالادى. جوبانى ىسكە اسىرۋ ۇشۋ-قونۋ جولاعىن, جەر ۇستىمەن ءجۇرۋ جولدارىن جانە پەرروندى, سونداي-اق, اەروۆوكزال عيماراتىن جوندەۋدى قامتىدى. ۇشۋ-قونۋ جولاعىنا قاتىستى جۇمىستار تولىقتاي اياقتالعان: بۇگىنگى تاڭدا اتالعان جولاق وبلىسارالىق جانە وبلىسىشىلىك اۆيارەيستەردىڭ اۋە كەمەلەرىن قابىلداپ, جونەلتەدى. وسى جىلدىڭ 2 قىركۇيەگىنەن باستاپ ۇشۋ-قونۋ جولاعى «وسكەمەن — سەمەي — ءۇرجار», «سەمەي — الماتى», «سەمەي — استانا» باعىتتارى بويىنشا ان-24 تيپىندەگى ۇشاقتاردى قابىلدايدى. اەروۆوكزالعا قاتىستى جالپى اياقتالعان جۇمىستار بۇگىندە 93% قۇرايدى.
جاڭعىرتۋ قورىتىندىسى بويىنشا اۋەجاي «ۆ» ساناتىنداعى حالىقارالىق اۋەجايلارعا ارنالعان يكاو (حالىقارالىق ازاماتتىق اۆياتسيا ۇيىمى) تالاپتارىنا ساي بولادى. ال بۇل 300 جولاۋشىعا دەيىن تاسىمالداي الاتىن Boeing, Airbus, يل-76 تيپىندەگى اۋە كەمەلەرىن قابىلداۋعا مۇمكىندىك بەرەدى. ياعني, تاۋلىگىنە 25-30 رەيسكە دەيىن, ساعاتىنا 200 ادامعا دەيىن قىزمەت كورسەتۋگە جول اشىلادى. جولاۋشىلار تەرمينالىنىڭ عيماراتى قاۋىپسىز پايدالانۋ تالاپتارىنا جاۋاپ بەرەتىن بولادى, ال ول جولاۋشىلارعا قىزمەت كورسەتۋ ساپاسىن ەداۋىر جاقسارتادى.
«Scat, Qazaq air, Bek air, Air Astana سەكىلدى وتاندىق اۆياكومپانيالاردى تارتۋمەن قاتار, رەسەي فەدەراتسياسىنا, تۇركياعا, مىسىرعا, بىرىككەن اراب امىرلىكتەرىنە حالىقارالىق رەيستەردى ۇيىمداستىرۋعا مۇمكىندىك تۋادى. اەروۆوكزالدا حالىقارالىق جانە ىشكى اۋە قاتىناستارىنىڭ جەكەلەگەن زالدارى پايدا بولادى, زاماناۋي تەكسەرۋ جابدىعى ورناتىلادى. جالپى, كەشەندە 250-دەن استام ادامعا جۇمىس ورنى اشىلادى», — دەپ باياندادى شىعىس قازاقستان وبلىسى اكىمىنىڭ ورىنباسارى س. اقتانوۆ.
ەسكە سالا كەتەيىك, پرەمەر-مينيستر مەملەكەت باسشىسىنىڭ تاپسىرماسىمەن ەل وڭىرلەرىن جۇمىس ساپارىمەن ارالاپ ءجۇر. وسىعان دەيىن باقىتجان ساعىنتاەۆ اتىراۋ, اقتوبە, قاراعاندى, قوستاناي, قىزىلوردا, ماڭعىستاۋ, وڭتۇستىك قازاقستان (قازىرگى تۇركىستان), باتىس قازاقستان, سولتۇستىك قازاقستان, اقمولا جانە پاۆلودار وبلىستارىندا جۇمىس ساپارلارىمەن بولدى.