بۇگىندە جۇمىسىن تۇركىستاندا جالعاستىرىپ جاتقان مەملەكەتتىك مەكەمەلەر قاتارى وسە تۇسكەن.
تۇركىستان وبلىسىنىڭ بولاشاعىنا سەنىمى نىق مەملەكەتتىك قىزمەتتەگىلەردىڭ جۇمىس ءتارتىبى قاجەتتى قالىپقا ءتۇسىپ, ءوز مىندەتتەرىن ورىنداۋدا. سولاردىڭ قاتارىندا تۇركىستان وبلىسى بويىنشا سوتتار اكىمشىسى, تۇركىستان وبلىستىق سوتى جانە مامانداندىرىلعان سوتتار دا بار. قازىرگى تاڭدا سوت جۇيەسى عيماراتپەن جانە قىزمەتكەرلەرى تۇرعىن جايمەن تولىق قامتاماسىز ەتىلگەن.
وبلىستىق سوت جۇيەسىنىڭ 33 سۋدياسى, 128 سوت قىزمەتكەرى جانە كەلىسىمشارت نەگىزىندە جۇمىس ىستەپ جۇرگەن 15 ازامات شىمكەنتتەن تۇركىستانعا, كەنتاۋعا قونىس اۋداردى. جۇمىستىڭ ساپاسىن جوعالتپاس ءۇشىن كوشتى ۇتىمدى ۇيىمداستىرىپ, سۋديالار مەن سوت قىزمەتكەرلەرىن باسپانامەن قامتاماسىز ەتۋ دە ماڭىزدى ماسەلە. وسى ماڭىزدى ماسەلەنى بىرىگىپ شەشۋ ءۇشىن تۇركىستان وبلىسى بويىنشا سوتتار اكىمشىسى مەن وبلىس اكىمدىگىنىڭ, سونداي-اق تۇركىستان, كەنتاۋ قالالارى اكىمدىكتەرىنىڭ اراسىندا ءوزارا ىنتىماقتاستىق تۋرالى مەموراندۋمعا قول قويىلعان بولاتىن.
مەموراندۋمعا سايكەس, تاراپتار تۇركىستان وبلىسى سوت جۇيەسىنىڭ جاڭا ورتالىققا كوشۋىنە, ورنالاستىرىلۋىنا قاتىستى ءىس-شارالاردى جۇزەگە اسىرۋدا ءوزارا ىقپالداستىقتا جۇمىس اتقارا باستادى. ارينە سوتقا كەلۋشىلەرگە بارىنشا قولايلى جاعداي جاسالۋى ءۇشىن قاجەتتى عيمارات زاماناۋي تالاپتارعا ساي كەلۋى ءتيىس. سوت زالدارىن اۋديو-بەينەتىركەۋ جانە بەينەبايلانىس جۇيەلەرىمەن جابدىقتاۋدان بولەك, عيماراتتا كۇتۋ زالى, پروكۋرورلار مەن ادۆوكاتتارعا ارنالعان كابينەتتەر, كەڭەسۋ بولمەلەرى, مەدياتسيا جانە مۇراعات, ىستەرمەن تانىسۋعا ارنالعان كەڭسەلەر بولۋى دا شارت. وسىنداي تالاپتارعا ساي عيماراتتاردى تاڭداۋ بارىسىندا جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى نۇرسەرىك ءشارىپوۆ تۇركىستانعا ارنايى كەلگەن. ن.ءشارىپوۆ ارنايى ساپارىنىڭ بارىسىندا جالعا بەرىلەتىن نىسانداردى ارالاپ, يەلەرىمەن كەزدەستى جانە عيماراتتاردى انىقتاپ بەردى. وسىنىڭ ناتيجەسىندە, تاڭدالىنىپ الىنعان عيماراتتار قىسقا مەرزىمدە زامان تالابىنا سايكەستەندىرىلگەن بولاتىن.
وبلىس اكىمدىگى تۇركىستان قالاسىندا ورنالاسقان سوڭعى ۇلگىدەگى جاتاقحانالاردىڭ بىرىنەن بىرقاتار سۋديالارعا جانە بارلىق سوت قىزمەتكەرلەرىنە تەگىن تۇراتىن تۇرعىلىقتى جاي ءبولدى. كەيبىر سوت ماماندارى كەنتاۋ قالاسىنداعى بيىل كۇردەلى جوندەۋدەن وتكىزىلگەن جاتاقحانادا تۇرعىن جايمەن قامتاماسىز ەتىلدى. تۇركىستان مەن كەنتاۋ قالاسى اراسىنداعى جولدا ءجۇرۋ ماسەلەسى دە ءوز شەشىمىن تاپتى, ياعني كەنتاۋ قالاسىنىڭ اكىمدىگى تاراپىنان ارنايى بولىنگەن اۆتوبۋس سوت قىزمەتكەرلەرىن جاتاقحانادان جۇمىس ورنىنا جانە كەرى تەگىن تاسىمالداۋدا. وبلىس جانە تۇركىستان, كەنتاۋ قالالارىنىڭ اكىمدەرىنە كورسەتىپ وتىرعان قولداۋلارى ءۇشىن ۇلكەن العىس بىلدىرەمىز», دەيدى تۇركىستان وبلىسى بويىنشا سوتتار اكىمشىسى ورىنباسار لەشتاەۆ.
ءيا, كوشكە كومەكتەسكەن ساۋاپتى ءىس بولىپ سانالادى. كوپشىلىك جايعاسىپ, جايلانىپ العان سوت قىزمەتكەرلەرى ءوز مىندەتتەرىن جاڭا ورتالىقتا ساپالى دا ءمىنسىز اتقارادى دەگەن ۇمىتتە.
عالىمجان ەلشىباي,
«ەگەمەن قازاقستان»
تۇركىستان وبلىسى