اتىراۋ مەن استراحاننىڭ اراسىنداعى 277 شاقىرىم جول جوندەۋ كورمەگەلى ءبىراز ۋاقىت وتكەن. ابدەن توزىعى جەتكەن تاس جولدىڭ جاعدايى سىن كوتەرمەيدى. تالاي مىنبەردە ايتىلىپ, تالاي ماجىلىستە كوتەرىلگەن بۇل ماسەلەنىڭ شەشىمىن تابۋى دا ۇزاققا سوزىلىپ كەتكەن ەدى.
قۇرمانعازى اۋدانىنا ىسساپارمەن كەلگەن پارلامەنت سەناتىنىڭ دەپۋتاتى سارسەنباي ەڭسەگەنوۆ اقجولتاي جاڭالىق جەتكىزدى. ماگيسترالدىڭ 60 شاقىرىمىنىڭ قۇرىلىسى باستالىپتى.
نەگىزى جۇمىس وتكەن جىلى باستالادى دەپ جوسپارلانعان بولاتىن.
«جول قۇرىلىسىنا 373 ملن اقش دوللارى قاجەت بولدى, ونىڭ 45 ملن-ى رەسپۋبليكالىق بيۋدجەتتەن ءبولىنۋى كەرەك ەدى. قالعان بولىگى يسلام دامۋ بانكىنىڭ قارجىسى. ءتيىستى قۇجاتتار تولىق دايىن بولعانىمەن, 2017 جىلى كەلىسىمشارتقا قول قويىلمادى, سوندىقتان رەسپۋبليكالىق بيۋدجەتتەن قارالعان قارجى يگەرىلمەيتىن بولعاسىن كەيىن قايتارىلدى», – دەيدى سەناتور. اقىرى پارلامەنتكە كەلىسىمشارت تۇسپەگەن سوڭ, سارسەنباي ەڭسەگەنوۆ ۇكىمەت باسشىسىنىڭ ءبىرىنشى ورىنباسارى ا.مامينگە وسى پروبلەمانىڭ شەشىمىن تاپپاي وتىرعانىن ايتىپ, دەپۋتاتتىق ساۋال جولداعان. ماسەلەنى سەنات توراعاسى قاسىم-جومارت توقاەۆ قولداپ, ناتيجەسىندە ارنايى جول كارتاسى جاسالدى. «قازاۆتوجول» اق جاريالاعان كونكۋرستىڭ جەڭىمپازى بولىپ «سينە ميداس ستروي» بك» جشس مەن «توديني» اق قۇرامىنداعى كونسورتسيۋم انىقتالعان.
قۇرىلىس باستالعان كوتياەۆ اۋىلى رەسەيمەن ورتاداعى شەكارادا ورنالاسقان. «نۇرلى جول» مەملەكەتتىك باعدارلاماسى اياسىندا جۇزەگە اساتىن جوبا بويىنشا 60 شاقىرىم جول سالىنادى. 500-دەن استام ادام جۇمىسپەن قامتىلادى. قۇرىلىس بارىسىمەن تانىسۋعا كەلگەن ينۆەستيتسيالار جانە دامۋ مينيسترلىگى اۆتوموبيل جولدارى كوميتەتى توراعاسىنىڭ ورىنباسارى ءساتجان ابىلاليەۆتىڭ ايتۋىنشا, اتىراۋ-استراحان جولىنىڭ 217 شاقىرىمىنا ەۋروپا قايتا قۇرۋ جانە دامۋ بانكى 160 ملن اقش دوللارىن بولۋگە كەلىسىم بەرىپتى. كۇرە جول قۇرىلىسىنا قازىرگى زامانعى ۇزدىك تەحنولوگيا پايدالانىلادى. ەنى 9 مەتر, ءبىر بەلدىككە تۇسەتىن جۇك سالماعى 13 توننادان اسادى, بۇل اۋىر كولىكتەردىڭ قوزعالىسىنا دا كەدەرگى تۋدىرمايدى.
«قازاۆتوجول» ۇك» اق باسقارما توراعاسىنىڭ ورىنباسارى تەمىرحان مەڭدىعاليەۆ قۇرىلىس كەزىندە 12 كوپىر قايتا جوندەلىپ, 55 سۋ وتكىزگىش قۇبىر قاراستىرىلاتىنىن ايتادى. جول تولىقتاي جاڭارتىلعاندا اتىراۋ ارقىلى ورتا ازيادان كەلەتىن كولىكتەر 300 شاقىرىمدى ۇنەمدەيدى. الىس جولدىڭ ازابىن تارتاتىندارعا بۇل كوپ جەڭىلدىك.
باقىتگۇل باباش,
«ەگەمەن قازاقستان»
اتىراۋ