الماتىدا قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى كۇيشى قۇرمانعازىنىڭ 200 جىلدىق مەرەيتويى اياسىندا «قۇرمانعازى جانە ۇلى دالا سازى» اتتى حالىقارالىق فەستيۆال وتكىزىپ جاتىر, دەپ حابارلايدى قر مادەنيەت جانە سپورت مينيسترلىگىنىڭ ءباسپاسوز قىزمەتى.
مادەنيەت جانە سپورت مينيسترلىگىنىڭ ۇيىمداستىرۋىمەن شارا 30 قىركۇيەك پەن 2 قازان ارالىعىندا وتەدى.
«رۋحاني جاڭعىرۋ» باعدارلاماسى اياسىندا ۇيىمداستىرىلىپ وتىرعان ءىس-شاراعا «يۋنەسكو» شتاب-پاتەرىنەن, «تۇرىكسوي» ۇيىمىنان, رەسەي فەدەراتسياسىنان ارنايى وكىلدەر, جاقىن جانە الىس شەت ەلدەردىڭ جەتەكشى ءداستۇرلى ورىنداۋشىلارى, قىرعىزستان, رەسەي, وزبەكستان رەسپۋبليكالارىنىڭ ونەر ۇجىمدارى جانە ەلىمىزدىڭ «اكادەميالىق» دارەجەسى بار وركەسترلەرى قاتىسادى», دەلىنگەن حابارلامادا.
3 كۇنگە سوزىلاتىن ءىس-شارا اياسىندا ء«داستۇرلى ونەر - جاھاندانۋ الەمىندە» تاقىرىبىندا فورۋم, رەسپۋبليكامىزدىڭ, جاقىن شەت ەلدەردىڭ كۇيشىلىك مەكتەبى مايتالماندارىنىڭ كونتسەرتى, رەسپۋبليكامىزدىڭ, جاقىن شەت ەلدەردىڭ ۇلت اسپاپتار وركەسترلەرىنىڭ كونتسەرتى, وركەسترلەر شەرۋى, مەملەكەتتىك سىيلىقتىڭ لاۋرەاتى, سۋرەتشى شاحان ماحانبەتوۆ پەن تانىمال فوتو ءتىلشى رافحات حالەلوۆتىڭ «كۇي جانە كۇيشى» اتتى فوتو كورمەسى جانە تانىمال ءداستۇرلى ورىنداۋشىلاردىڭ شىعارماشىلىق كونتسەرتى وتەدى.