8-14 قازان ارالىعىندا Techstars اكسەلەراتور قامقورلىعىمەن استانادا جانە الماتىدا ستارتاپشىلاردىڭ العاشقى حالىقارالىق اپتالىعى وتەدى, دەپ حابارلايدى استانا قالاسى اكىمدىگىنىڭ رەسمي سايتى.
جوبا باستاماشىلارى: MOST بيزنەس-ينكۋباتور, «تەحنولوگيالىق دامۋ جونىندەگى ۇلتتىق اگەنتتىك» اق, استانا اكىمدىگى, «Astana Innovations» اق جانە ت. ب. ءبىر اپتا ىشىندە ەلىمىزدىڭ ەكى ءىرى قالاسىندا 30-دان استام شارا وتەدى. ءاربىر باعىت بويىنشا وقىتۋ, نەتۆوركينگ, كونكۋرستار جانە باسقا دا ءىس-شارالار جۇرگىزىلەتىن بولادى.
استانا قالاسىندا ءۇش حاكاتون جوسپارلانعان, وندا جاس ستارتاپشىلاردىڭ ساۋدا جانە ءتۇرلى كونفەرەنتسيالار تاقىرىبىنا ارنالعان جۇمىستارى قارالادى. ءىس-شارا باراسىندا قازاقستاننىڭ بارلىق ستارتاپ-ەكوجۇيەسىنىڭ قاتىسۋشىلارىن ءبىر ورتاعا جيناپ, تۇرلى كەزدەسۋلەر, دارىستەر, پىكىرتالاستار وتكىزۋ جوسپارلانعان.
Startup Week Qazaqstan مىناداي باعىتتاردان تۇرادى: FinTech, Smart City, ەكوجۇيەلەر, Entrepreneurship, اقپاراتتىق تەحنولوگيالار (IT), قىز-كەلىنشەكتەر كاسىپكەرلىگى, كورپوراتيۆتىك يننوۆاتسيالار.
ايتا كەتەيىك, 2017 جىلى 80-نەن استام ەل وسى تارىزدەس «Techstars Startup Week» اپتالىعىن وتكىزدى. وندا ءبىر اپتا بويى جەتەكشى ساراپشىلار ءوز تاجىريبەلەرىمەن ءبولىستى جانە وقىتۋ كۋرستارىن جۇرگىزدى. Techstars Startup Week-ءتىڭ باستى ماقساتى جاس كاسىپكەرلەردى بىرىكتىرۋ, جەرگىلىكتى كاسىپكەرلىك قوعامداستىعىن دامىتۋ جانە كوشباسشىلار مەن دارىندى ادامدار ءۇشىن جاڭا مۇمكىندىكتەر قاراستىرۋ.