دۋشانبەدە وتكەن تاۋەلسىز مەملەكەتتەر دوستاستىعى مەملەكەتتەرى باسشىلارىنىڭ كەزەكتى وتىرىسىندا ەكىنشى دۇنيەجۇزىلىك سوعىستىڭ جەڭىسىنە 75 جىل تولۋ مەرەيتويىنا دايىندىق شارالارى تالقىلاندى.
جيىندا وسى ماسەلە بويىنشا تمد مۇشە مەملەكەتتەرى – مەملەكەت ارالىق گۋمانيتارلىق ىنتىماقتاستىق قورىنىڭ تەڭ توراعاسى ميحايل شۆىدكوي بايانداما جاساپ, اتقارىلاتىن شارالاردى تانىستىردى. ونىڭ ايتۋىنشا, جەڭىستىڭ 75 جىلدىعىن تويلاۋ بويىنشا 49 شارا وتكىزۋ قاراستىرىلعان. سولاردىڭ باسىم بولىگى سوعىس ارداگەرلەرىنە قامقورلىق كورسەتۋگە ارنالعان.
«قازىرگى تاڭدا تمد كولەمىندە 100 مىڭعا جۋىق سوعىس ارداگەرى بار. ولارعا ەرەكشە نازار اۋدارۋ قاجەت ەكەنى بەلگىلى. جوبا بويىنشا وتكىزىلەتىن شارالاردىڭ باسىم بولىگى ارداگەرلەرگە ماتەريالدىق, مەديتسينالىق جانە باسقا دا قامقورلىق كورسەتۋگە باعىتتالعان», دەيدى م.شۆىدكوي.
اتاپ ايتار بولساق, جوبانىڭ باستى باعىتتارىنىڭ ءبىرى سوعىس دەرەكتەرىن بۇرمالاۋ ارەكەتتەرىنىڭ الدىن الۋعا ارنالعان. سونىمەن قاتار م.شۆىدكوي جاستارعا جەڭىستىڭ ماڭىزىن ءتۇسىندىرۋ قاجەتتىگىن جەتكىزدى.
بۇدان بولەك, جەڭىستىڭ 75 جىلدىعىنا تمد ەلدەرىنىڭ بارىنە ورتاق ارنايى مەدال جاساۋ قاجەتتىگىن ۇسىندى.
جيىن قورىتىندىسى بويىنشا, تمد مەملەكەتتەر باسشىلارى جەڭىستىڭ 75 جىلدىعىن اتاپ ءوتۋ جونىندەگى شارالاردى ءبىراۋىزدان قولدادى.
اباي اسانكەلدى ۇلى,
«ەگەمەن قازاقستان»
دۋشانبەدەن