باتىس قازاقستان وبلىسىندا زەلەنوۆ اۋدانىنىڭ اتاۋى وزگەرەدى

باتىس قازاقستان وبلىستىق ءماسليحاتىنىڭ كەزەكتى سەسسياسىندا ءسوز العان باتىس قازاقستان وبلىستىق تىلدەردى دامىتۋ باسقارماسىنىڭ باسشىسى ايگۇل مىڭباەۆا زەلەنوۆ اۋدانىنداعى بارلىق 22 اۋىلدىق وكرۋگتە جانە اۋدان ورتالىعىندا وسى ماسەلە تالقىلانىپ, قوعامدىق تىڭداۋ كەزىندە كوپشىلىك تاراپىنان قولداۋ تاپقانىن ايتتى. كوپشىلىك ۇيعارىمى بويىنشا زەلەنوۆ اۋدانىن بايتەرەك اۋدانى دەپ اتاۋ ۇسىنىلعان.

شەشىم وبلىستىق ءماسليحات سەسسياسىنا قاتىسقان دەپۋتاتتار تاراپىنان قولداۋ تاپتى.

زەلەنوۆ اۋدانى بولەك اكىمشىلىك قۇرىلىم رەتىندە 1939 جىلى قۇرىلعان, 1997 جىلى اۋدان قۇرامىنا پريۋرالنىي اۋدانى كىردى, جالپى اۋماعى – 7,4 مىڭ شارشى شاقىرىمدى قۇرايدى. ورتالىعى پەرەمەتنىي اۋىلى وبلىس ورتالىعى ورال قالاسىنان 38 شاقىرىمدا ورنالاسقان. اۋداندا 22 اۋىلدىق وكرۋگ, 68 اۋىلدىق ەلدى مەكەن بار, وندا 2018 جىلدىڭ 1 قاڭتارداعى مالىمەت بويىنشا 57,2 مىڭ ادام تۇرىپ جاتىر.

ايتا كەتەيىك, زەلەنوۆ اۋدانى باتىس قازاقستان وبلىسىنىڭ سولتۇستىگىندە, قازاقستان رەسپۋبليكاسىنىڭ مەملەكەتتىك شەكاراسىن بويلاي ورنالاسقان. رەسەي فەدەراتسياسىنىڭ 3 وبلىسىمەن – ورىنبور وبلىسىنىڭ پەرۆوماي, تاشلا اۋداندارىمەن, سامارا وبلىسىنىڭ بولشەچەرنيگوۆ اۋدانىمەن جانە ساراتوۆ وبلىسىنىڭ وزينكي, پەرەليۋب اۋداندارىمەن شەكتەسەدى.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان