ورتالىق سايلاۋ كوميسسياسى مەن قوعامدىق دامۋ مينيسترلىگىنىڭ بىرلەسكەن وتىرىسى ءوتتى

بىرلەسكەن وتىرىس جۇمىسىنا مەملەكەتتىك ورگانداردىڭ, ساياسي پارتيالاردىڭ, ۇكىمەتتىك ەمەس ۇيىمداردىڭ وكىلدەرى مەن ساراپشىلار قاتىستى.

وتىرىستى اشقان قر وسك باسشىسى بەرىك يماشەۆ اعىمداعى جىلى بولعان سايلاۋ زاڭناماسىنا ەنگىزىلگەن وزگەرىستەر مەن تولىقتىرۋلار ساياسي پارتيالار مەن ۇكىمەتتىك ەمەس سەكتوردىڭ سايلاۋ پروتسەستەرىنە نەعۇرلىم بەلسەندى قاتىسۋى ءۇشىن ايتارلىقتاي الەۋەتكە يە ەكەنىن اتاپ ءوتتى.

"بۇگىنگى بىرلەسكەن وتىرىس - بۇل مەملەكەتتىك ورگاندار, ساياسي پارتيالار مەن ۇكىمەتتىك ەمەس ۇيىمدار اراسىنداعى ءوزارا ءىس-قيمىل, ءوزارا تۇسىنىستىك دەڭگەيىن ارتتىرۋ بويىنشا ۇلكەن جۇمىستىڭ باستاۋى", - دەدى ب. يماشەۆ.

وتىرىس بارىسىندا سايلاۋ پروتسەسىندەگى ازاماتتىق قوعام ينستيتۋتتارىمەن ءوزارا ءىس-قيمىل ماسەلەلەرى بويىنشا پىكىر الماسىلدى, جەرگىلىكتى وكىلدى ورگاندار دەپۋتاتتارىنىڭ سايلاۋىن وتكىزۋ كەزىندە پروپورتسيونالدى سايلاۋ جۇيەسىنە كوشۋگە, مۇگەدەكتەردىڭ سايلاۋ قۇقىقتارىن قامتاماسىز ەتۋگە بايلانىستى سايلاۋ زاڭناماسىنداعى وزگەرىستەر مەن تولىقتىرۋلار تالقىلاندى.

ب. يماشەۆ سونداي-اق ساياسي پارتيالار مەن ۇكىمەتتىك ەمەس ۇيىمداردىڭ سايلاۋ پروتسەسىنىڭ نەگىزگى قاتىسۋشىلارى بولا وتىرىپ, سايلاۋ زاڭناماسىنا سايكەس, اتاپ ايتقاندا, سايلاۋ كوميسسيالارىنىڭ قۇرامىن قالىپتاستىرۋدا, ءوز وكىلدەرىن سايلاۋ لاۋازىمدارىنا ۇسىنۋدا, سايلاۋدى بايقاۋدا, سايلاۋ پروتسەسىنە قاتىسۋشىلاردى ەلەكتورالدىق وقىتۋدى ۇيىمداستىرۋدا قۇقىقتارى مەن وكىلەتتىكتەرىنىڭ كەڭەيتىلگەن شەڭبەرىنە يە ەكەندىگىنە نازار اۋداردى.

قازاقستان رەسپۋبليكاسىنىڭ قوعامدىق دامۋ ءمينيسترى دارحان كالەتاەۆ ءوز سوزىندە بولاشاقتا قوعامدىق-ساياسي پروتسەستەردى باسقارۋدا پىكىر ءپليۋراليزمىنىڭ ءوسۋىن ەسكەرە وتىرىپ, ازاماتتىق قوعام ينستيتۋتتارى قاتىسۋى ءتيىس ەكەنىن اتاپ ءوتتى. دەرەكتەرگە سايكەس, حالىقتىڭ اراسىندا ۇەۇ قوعامدىق ومىرگە, ازاماتتىق, سونىڭ ىشىندە سايلاۋدى بايقاۋىنا كەڭىنەن قاتىسۋىنا دەگەن سۇرانىس ءالى دە قاناعاتتانباعان. سۇرالعانداردىڭ 35% - ى ۇەۇ فاكتورىن سەزىنەدى, ال 65% - ى ولاردىڭ ءرولىن كۇشەيتۋ قاجەتتىلىگىن كورسەتەدى. دەمەك, ۇەۇ-دى سايلاۋ پروتسەسىن مونيتورينگتەۋ, تالداۋ جانە زەرتتەۋ پروتسەسىنە كەڭىنەن تارتۋ قاجەت.

وتىرىس بارىسىندا قر وسك توراعاسىنىڭ ورىنباسارى ك. پەتروۆ «قازاقستان رەسپۋبليكاسى ورتالىق سايلاۋ كوميسسياسىنىڭ سايلاۋ سالاسىنداعى ساياسي پارتيالارمەن جانە ۇكىمەتتىك ەمەس ۇيىمدارمەن ءوزارا ءىس-قيمىل ماسەلەلەرى تۋرالى» تاقىرىپتا بايانداما جاسادى.

بىرلەسكەن وتىرىس قورىتىندىسى بويىنشا بىرقاتار ناقتى ۇسىنىستار ازىرلەندى,  قر ورتالىق سايلاۋ كوميسسياسى مەن قوعامدىق دامۋ مينيسترلىگى اراسىندا حاتتاماعا قول قويىلدى.

بىرلەسكەن وتىرىس قارساڭىندا, اعىمداعى جىلدىڭ 26 قىركۇيەگىندە, وبلىستاردىڭ, استانا, الماتى جانە شىمكەنت قالالارىنىڭ ىشكى ساياسات باسقارمالارىنىڭ باسشىلارى مەن قىزمەتكەرلەرى ءۇشىن "ازاماتتىق بەلسەندىلىك: دامۋدىڭ جاڭا پروتسەستەرى" تاقىرىبىندا وقىتۋ سەمينار-ترەنينگى وتكىزىلدى.

سايلاۋ ۇدەرىسىندەگى قوعامدىق بىرلەستىكتەر مەن سايلاۋ كوميسسيالارىنىڭ ءوزارا ءىس-قيمىلىنىڭ وزەكتى ماسەلەلەرىن تالقىلاۋعا ارنالعان سەميناردى قر ورتالىق سايلاۋ كوميسسياسىنىڭ حاتشىسى ءسابيلا ساپارقىزى مۇستافينا, قر قدر ازاماتتىق قوعام ىستەرى كوميتەتىنىڭ ءتورايىمى ءاليا قايراتقىزى عالىموۆا, وسك ەلەكتوراتتىق وقىتۋدى ۇيىمداستىرۋ ءبولىمىنىڭ جاۋاپتى قىزمەتكەرلەرى وتكىزدى.

سەمينار-ترەنينگ شەڭبەرىندە قاتىسۋشىلار قازاقستان رەسپۋبليكاسىنىڭ سايلاۋ زاڭناماسىنا سايكەس سايلاۋ پروتسەسىنە ساياسي پارتيالار مەن ۇكىمەتتىك ەمەس ۇيىمداردىڭ قاتىسۋىن قۇقىقتىق رەتتەۋ, سايلاۋ ماسەلەلەرى بويىنشا كەيبىر زاڭنامالىق اكتىلەرگە ەنگىزىلگەن جاڭالىقتار اياسىندا سايلاۋشىلاردىڭ سايلاۋ-قۇقىقتىق مادەنيەتىن ارتتىرۋدا جەرگىلىكتى اتقارۋشى ورگانداردىڭ ۇكىمەتتىك ەمەس ۇيىمدارمەن ءوزارا ءىس-قيمىل نىساندارى تۋرالى جۇيەلەندىرىلگەن ءبىلىم الدى.

وسىعان بايلانىستى پروپورتسيونالدى سايلاۋ جۇيەسى نەگىزىندە جەرگىلىكتى وكىلدى ورگانداردى ء(ماسليحاتتاردى) قالىپتاستىرۋعا, مۇمكىندىكتەرى شەكتەۋلى ازاماتتاردىڭ سايلاۋ قۇقىقتارىن ودان ءارى قامتاماسىز ەتۋگە قاتىستى سايلاۋ زاڭناماسىندا جاقىندا قابىلدانعان جاڭاشىلدىقتار, ەلەكتوراتتىق وقىتۋدى ۇيىمداستىرۋ جونىندەگى قۇقىقتىق نورمالار تالقىلاندى.

وتكەن سەمينار ورتالىق سايلاۋ كوميسسياسى, قوعامدىق دامۋ مينيسترلىگى جانە ۇكىمەتتىك ەمەس سەكتور اراسىنداعى ءتيىمدى ۇشجاقتى ارىپتەستىكتىڭ وزەكتى ۇلگىسى بولدى.