ورتالىق كوممۋنيكاتسيالار قىزمەتىندە سۋعا شومىلۋ ماۋسىمىنىڭ اياقتالۋىنا, ءورت قاۋپى كەزەڭىنىڭ وتۋىنە جانە جىلۋ بەرۋ ماۋسىمىنا ازىرلىككە ارنالعان ءباسپاسوز ءماسليحاتى ءوتتى. وعان ىشكى ىستەر ءمينيسترىنىڭ ورىنباسارى يۋري يلين قاتىستى.
يۋري ءيليننىڭ ايتۋىنشا, بيىلعى شومىلۋ ماۋسىمى باستالعاننان بەرى ءىىم وبلىس اكىمدىكتەرىمەن جانە مۇددەلى ورگاندارمەن تىعىز جۇمىس جاساي وتىرىپ, تاجىريبەلىك جانە پروفيلاكتيكالىق ءىس-شارالار كەشەنىن جۇرگىزگەن. سۋ ايدىندارىنىڭ قاۋىپتى جانە كۇزەتىلمەيتىن ۋچاسكەلەرىندە (دالا جاعاجايلارى) قۇتقارۋشىلار توتەنشە جاعدايلار كوميتەتى ءموبيلدى قۇتقارۋ بەكەتتەرىن ۇيىمداستىرىپ, شومىلۋعا تىيىم سالىنعان جەرلەردى بەلگىلەگەن. سونىمەن قاتار بۇل جەرلەردە تىيىم سالۋ جانە ەسكەرتۋ بەلگىلەرى ورناتىلعان.
بيىلعى سۋعا شومىلۋ ماۋسىمى كەزەڭىندە 8 مىڭنان استام رەيد جۇرگىزىلىپ, ىشىمدىك ىشكەن جانە ورتاق سۋ پايدالانۋ قاعيدالارىن بۇزعان 2,5 مىڭ ازامات اكىمشىلىك جاۋاپكەرشىلىككە تارتىلعان.
يۋري يلين قابىلدانىپ جاتقان شارالارعا قاراماستان, شومىلۋعا ارنالماعان سۋ ايدىندارىندا ازاماتتاردىڭ قازا بولۋ فاكتىلەرى كەزدەسكەنىنە توقتالىپ ءوتتى. ولاردىڭ 85 پروتسەنتى سۋعا شومىلۋ ماۋسىمىنىڭ باسىندا تىركەلگەن. بۇل رەتتە ايتا كەتەر جايت, كەيبىر ازاماتتاردىڭ ءوز ومىرىنە سالعىرت قاراۋى.
جالپى, قازا بولۋدىڭ نەگىزگى سەبەپتەرى كوپ. ولاردىڭ قاتارىندا قاتتى اعىس, اياق-قولدىڭ قۇرىسۋى, بالىق اۋلاۋ كەزىندە ەرەجەلەردى ساقتاماۋ, ماس كۇيىندە شومىلۋ, جۇزە بىلمەۋ, بالالاردىڭ ۇلكەندەردىڭ باقىلاۋىنسىز سۋعا ءتۇسۋى سياقتى سەبەپتەر بار. ازاماتتار ءولىمىنىڭ باسىم بولىگى سۋعا تۇسۋگە جاعداي جاسالماعان ورىنداردا تىركەلگەن.
2018 جىلى ءورت قاۋپى تۋىندايتىن كەزەڭدە الدىن الۋ شارالارىنىڭ ناتيجەسىندە ورمان ءورتى 38 پروتسەنتكە, ال دالا ءورتى 3 ەسە ازايعان. قاۋىپتى كەزەڭ باستالعاننان باستاپ, بارلىق ورمان القاپتارىندا جەكە تۇلعالاردىڭ كەلۋىنە جانە كولىك قۇرالدارىنىڭ كىرۋىنە شەكتەۋ قويۋ بويىنشا جالپى سانى 325 ءموبيلدى توپ قۇرىلىپ, ولار 2 مىڭعا جۋىق رەيد جۇرگىزگەن. سونىڭ ناتيجەسىندە 177 تۇلعا اكىمشىلىك جاۋاپكەرشىلىككە تارتىلعان.
2018-2019 جىلدارى جىلۋ بەرۋ كەزەڭىندە ءورت سانىن ازايتۋ ماقساتىندا ازاماتتىق قورعاۋ ورگاندارى ءىس-شارالار جوسپارىن بەكىتكەن. ماسەلەن, 15 قىركۇيەكتەن باستاپ ءورت قاۋىپسىزدىگى ايلىعى باستالدى. بۇل ايلىق شەڭبەرىندە كوميتەتتىڭ اۋماقتىق بولىمشەلەرىنىڭ ينجەنەرلىك-ينسپەكتورلىق قۇرامى جەرگىلىكتى تۇرعىندارمەن جىلۋ بەرۋ ماۋسىمىنىڭ اياقتالۋىنا دەيىن جوسپارلى جۇمىسىن جۇرگىزە بەرمەك.
ۆەنەرا تۇگەلباي,
«ەگەمەن قازاقستان»