قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ ۇيىمداستىرۋىمەن «قازاقستان بۇگىن جانە بولاشاقتا» تاقىرىبىندا پىكىر-سايىس وتكىزىلدى. ايماقتىق دەڭگەيدە وتكەن سايىس مەملەكەتتىك قىزمەتشىلەر جانە ستۋدەنتتەردىڭ باسىن قوستى.
دەباتقا بارلىعى 24 مەملەكەتتىك قىزمەتشى قاتىسىپ, 12 كومانداعا ءبولىندى. دەبات بريتاندىق فورماتتا وتكىزىلدى. ونىڭ ەرەجەسىنە سايكەس 2 جاقتاۋشى جانە 2 داتتاۋشى كوماندا قاتىسادى. ءار كوماندادا 2 سپيكەر وينايدى, ولاردىڭ ارقايسىسىنىڭ مىندەتى ادىلقازىنى ءوز سوزدەرىنە سەندىرۋ بولىپ تابىلادى. كوماندالار راۋندتار كەزىندە ءسوز سويلەۋلەرىنە قاراي 1-دەن 4-كە دەيىن رەيتينگتەر الادى (1 – ەڭ جوعارى, 4 – ەڭ تومەن).
دەبات سىبايلاس جەمقورلىقتىڭ الدىن-الۋ, مەملەكەتتىك قىزمەتتىڭ تيىمدىلىگىن ارتتىرۋ, اتاپ كورسەتكەندە فاكتورلى-بالدىق شكالا بويىنشا اكىمشىلىك مەملەكەتتىك قىزمەتشىلەرگە ەڭبەكاقى تولەۋ جاڭا جۇيەسى بويىنشا پيلوتتىق جوبانى ەنگىزۋ جونىندەگى تاقىرىپتاردا ءوربىدى. كوماندالار كەلەسى كريتەريلەر بويىنشا باعالاندى: پىكىر ءبىلدىرۋدىڭ دەبات تاقىرىبىنا سايكەس كەلۋى, قيسىندىلىق (مازمۇنى, سويلەۋ قۇرىلىمى), سويلەۋ ساۋاتتىلىعى مەن مادەنيەتى, اقپاراتتىڭ شىنايىلىعى, سويلەۋ تەحنيكاسى, ەموتسيالىق ارەكەت دەڭگەيى, سويلەۋ ادەبى جانە دۇرىستىعى, دەبات ءتارتىبىن ساقتاۋى.
وتكىزىلگەن 4 راۋندتىڭ قورىتىندىسى بويىنشا وبلىس اكىمدىگىنىڭ نامىسىن قورعاعان تالعات ساقتاعانوۆ جانە ەركەبۇلان قايرولين جەڭىمپاز دەپ تانىلدى. ال ەركەبۇلان جانىبەك جانە ەرعالي انەسوۆ باستاعان كوماندا ەكىنشى ورىنعا شىقتى. ال ايدىنعالي دۇيسەنباەۆ جانە ايگۇل ءجۇسىپتىڭ كومانداسى جۇلدەلى ءۇشىنشى ورىندى يەلەندى.
سونىمەن قاتار, بەينەۋ اۋدانى اكىمى اپپاراتىنىڭ اتىنان قاتىسقان ەلجاس شۇڭعالوۆ جانە راحىمجان جۇماعازيەۆ دەباتتىڭ ەڭ بەلسەندى قاتىسۋشىلارى دەپ تانىلدى.
بارلىق جەڭىمپاز جانە جۇلدەگەر كوماندالار العىس حاتپەن ماراپاتتالدى. ال نامىستى قولدان بەرمەي, جەڭىمپاز اتانعان مەملەكەتتىك قىزمەتشىلەر تالعات ساقتاعانوۆ جانە ەركەبۇلان قايرولين استانادا وتەتىن رەسپۋبليكالىق دەباتتا ماڭعىستاۋدىڭ نامىسىن قورعايتىن بولادى.
«مەملەكەتتىك قىزمەتشىلەردىڭ بۇل دەباتقا قاتىسۋى ولاردىڭ ءتيىمدى قىزمەت ەتۋىنە, ءوز ۇستانىمدارىن دالەلدەي بىلۋىنە, كرەاتيۆتىلىككە, سونداي-اق, كەز-كەلگەن جاعدايدا ماڭىزدى اقپاراتتاردى ەركىن جەتكىزە الۋىنا سەپتىگىن تيگىزەدى. سونىمەن قاتار, ۇلتتىق دەڭگەيدەگى پىكىر-سايىس مەملەكەتتىك قىزمەتشىلەرگە ەل الدىندا قويىلعان ماقساتتارعا جەتۋ جولىندا دا ۇلكەن مۇمكىندىك بەرەدى», - دەيدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى باسشىسىنىڭ ورىنباسارى قايرات بايگەباەۆ.