XXIX دۇنيەجۇزىلىك قىسقى ۋنيۆەرسيادا 2019 جىلدىڭ 2-12 ناۋرىزى ارالىعىندا رەسەيدىڭ كراسنويارسك قالاسىندا وتەتىنى بەلگىلى. 20 قىركۇيەكتە يتاليانىڭ تۋرين قالاسىندا ايتۋلى جارىستىڭ الاۋى تۇتانعان بولاتىن.
تۋرين ۋنيۆەرسيتەتىنىڭ اۋماعىندا وتكەن راسىمگە حالىقارالىق ستۋدەنتتەر سپورتىنىڭ پرەزيدەنتى (FISU) ولەگ ماتىتسين مەن تۋرين قالاسىنىڭ مەرى كيارا اپپەندينو باستاعان ءبىر توپ لاۋازىم يەلەرى جانە دە وسى سالانىڭ باسى-قاسىندا جۇرگەن ازاماتتار قاتىستى. مىنە, سول سالتاناتتى شارا بۇگىن الاتاۋ بوكتەرىندە ءوز جالعاسىن تاپتى. القىزىل الاۋدى ۇستاۋشىلار الماتىداعى اباي داڭعىلىنىڭ بويىمەن بالۋان شولاق اتىنداعى سپورت سارايىنان باستاپ, رەسپۋبليكا سارايىنا دەيىن جۇگىرىپ ءوتتى. ولاردىڭ قاتارىندا FISU پرەزيدەنتى ولەگ ماتىتسين, وتاندىق ستۋدەنتتىك سپورت وداعىنىڭ باسشىسى كايرات زاكيريانوۆ, بوكسشى قانات يسلام, فۋتزالشى دىنمۇحامبەت سۇلەيمەنوۆ, بياتلونشى ۆاسيلي پودكورىتوۆ جانە باسقا دا تانىمال سپورت قايراتكەرلەرى, جوعارى وقۋ ورىندارىنىڭ رەكتورلارى, بەلگىلى سپورتشىلار بولدى.
ەندى ارادا ەكى كۇن وتكەننەن سوڭ سالتاناتتى شەرۋ قىتايدىڭ حاربين قالاسىندا جالعاسادى. ال 29 قىركۇيەكتە الاۋ رەسەيگە جەتكىزىلەدى. سول كۇننەن باستاپ, كەلەسى جىلدىڭ 1 ناۋرىزىنا دەيىن جالعاساتىن الاۋ ەستافەتاسى اتالمىش ەلدىڭ 30 قالاسىن ارالاپ, اقىرىندا XXIX دۇنيەجۇزىلىك قىسقى ۋنيۆەرسياداسىنىڭ استاناسى – كراسنويارسكىنى بەتكە الادى.
عالىم سۇلەيمەن,
«ەگەمەن قازاقستان»
الماتى