تامىز ايىنىڭ سوڭعى كۇندەرى تولاسسىز جاۋعان جاۋىن بىتىك وسكەن استىقتى ورىپ, باستىرۋعا ءبىرشاما قولبايلاۋ تۋعىزىپ ەدى, قوڭىر كۇز جايما-شۋاقتىق تانىتىپ تۇر. ديقان قاۋىمىنا كەرەگى – وسى, اۋا رايىنىڭ قولايلى بولۋى. ءسال-ءپال باياۋلاپ قالعان ناۋقان قايتادان قىزىپ سالا بەردى. قازىر ەش كىدىرىس جوق. 4,2 ميلليون گەكتار القاپتىڭ ونىمدەرىن جيناپ الۋعا 10 مىڭعا جۋىق ءارتۇرلى ماركالى تەحنيكالار جۇمىلدىرىلعان. جانار-جاعار ماي, جۇمىس كۇشى جەتكىلىكتى. ايىرتاۋ اۋدانىنا بارعان جۇمىس ساپارىندا وبلىس اكىمى قۇمار اقساقالوۆ بيداي تاناپتارىنىڭ ءار گەكتارىنان 62,5 تسەنتنەر ەل ريزىعى جينالىپ جاتقان القاپتى ارالاپ, كۇزگى وراقتىڭ بارىسىمەن تانىستى. بۇرىنعى رەكورد 55 تسەنتنەر بولسا, بيىل جاڭارتىلىپ, كورسەتكىش 7,5 تسەنتنەرگە اسىپ تۇسكەن. وسىنداي مول ونىمگە قالاي قول جەتكىزدىڭىزدەر دەگەن ساۋالعا «بابىق-بۇرلىق» جشس-ءنىڭ ديرەكتورى سەيىلبەك ماحمەتوۆ جەر-انانى ماپەلەپ كۇتە بىلسە, جومارتتىعىندا شەك جوق دەپ قىسقا عانا جاۋاپ قايىردى. سوزگە ساراڭ, ىسكە مىعىم ەڭبەك ادامىنا ءتان قاسيەت دەرسىڭ.
ءوڭىر باسشىسى قىزىلجار, ەسىل اۋداندارىنىڭ ەگىس تاناپتارىن ارالاۋ كەزىندە بابىقبۇرلىقتاردىڭ تاجىريبەسىن ۇلگى ەتتى. مەملەكەت اگرارلىق سالاعا جۇيەلى قولداۋ كورسەتىپ كەلەدى. ەڭبەكاقىنىڭ ءوسۋى, باسقا دا الەۋمەتتىك كورسەتكىشتەردىڭ جاقسارۋى استىق ءوندىرىسىنىڭ رەنتابەلدىلىگىنە تىكەلەي بايلانىستى. جۇمىس ناتيجەلىگى جەرگىلىكتى بيلىكتەن دە سۇرالادى.
راسىندا دا, تومەنگى بۇرلىق اۋىلىنىڭ تۇرعىندارىنا بارلىق جاعداي جاسالعان. ورتاشا ەڭبەكاقى 115 مىڭ تەڭگەنى قۇرايدى. بيىل ءار ۇيگە ورتالىقتاندىرىلعان جىلۋ جۇيەسى تارتىلىپ, جۇمىسشىلارعا ارنالعان باسپانالار سالىنۋدا. «سىرىمبەت–1» اگروقۇرىلىمىنىڭ باسشىسى مانات عابدۋلليننىڭ ايتۋىنشا, بيىل ءونىم وتە بەرەكەلى. 6 مىڭ گەكتار القاپتىڭ ۇشتەن بىرىنە مايلى داقىلدار سەبىلىپتى. گەكتار بەرەكەسى 18 تسەنتنەرگە جەتەعابىل.
ايىرتاۋ – ءىرى استىقتى اۋدانداردىڭ ءبىرى. 370 مىڭ گەكتار جەردىڭ ءونىمىن جيناپ الۋ ءۇشىن بارلىق مۇمكىندىك قاراستىرىلعان. ءىرى قارا مالى 52 مىڭ باسقا جۋىقتايدى. «مولدەكەنوۆ» شارۋا قوجالىعىنىڭ باسشىسى جومارت مولدەكەنوۆ تابىندى مولايتۋ ماقساتىندا جەڭىلدىكپەن 10 ميلليون تەڭگە نەسيە راسىمدەپتى. ەلوردالىق كاسىپكەر نۇرلان مۇحامەدجانوۆ ءسۇتتى باعىتتاعى سيممەنتال سيىرىن وسىرۋمەن اينالىسادى. ەندى 200 باس قازاقتىڭ اقباس سيىرلارىن ساتىپ الماقشى. ويى – 17 تۇرعىنى عانا بار كراسنوگوركا اۋىلىن تۇلەتۋ. بۇل ءۇشىن جىلىجاي, تۇرعىن ءۇي سالىپ, وڭتۇستىك جاقتان قونىستانۋشىلاردى كوشىرىپ اكەلمەك.
اۋدان اكتيۆىمەن وتكەن جيىندا 280-گە جۋىق شارۋاشىلىقتىڭ ءبىرسىپىراسى مينەرالدى تىڭايتقىش قولدانبايتىنى, سۋبسيديانىڭ ءتيىمدى پايدالانىلمايتىنى ايتىلدى. مال باسى مەن جالاقىنى ارتتىرۋ, ەت, ءسۇت ونىمدەرىنىڭ ەكسپورتىن ۇلعايتۋ ءتيىستى ورىندارعا تاپسىرىلدى.
ءوڭىر بويىنشا ءداندى داقىلداردىڭ جارتىسىنان استامى باستىرىلىپ, ورتاشا ونىمدىلىك 15 تسەنتنەردەن اينالۋدا.
ءومىر ەسقالي, «ەگەمەن قازاقستان» سولتۇستىك قازاقستان وبلىسى