جىل وتكەن سايىن وتاندىق ءبىلىم بەرۋ سالاسى كوپتەگەن جاڭاشىلدىقپەن ەرەكشەلەنۋدە. ەلىمىز بويىنشا جاڭارتىلعان ءبىلىم بەرۋگە كوشۋ جالعاسىن تاۋىپ, جاڭا بۋىن وقۋلىقتارى ەنگىزىلدى. سونىمەن قاتار بۇگىندە ساپالى ءبىلىم بەرۋ ارقىلى وزىق ويلى جاس بۋىندى قالىپتاستىرۋ ۋاقىت تالابى بولىپ وتىر. وسى ورايدا مەملەكەت تاراپىنان ءتيىستى قولداۋ كورسەتىلىپ, ءبىلىم سالاسىنا قامقورلىق ارتتى. تالاي جاستىڭ شەتەلدە ءبىلىم الۋىنا مۇمكىندىك جاساعان «بولاشاق» حالىقارالىق باعدارلاماسىنا 25 جىل تولدى. ناتيجەسىندە شيرەك عاسىر ۋاقىت ىشىندە جاستاردىڭ جاڭا بۋىنى قالىپتاستى دەۋگە بولادى. سونىمەن قاتار نازارباەۆ زياتكەرلىك مەكتەپتەرىنىڭ قۇرىلعانىنا 10 جىل بولسا, «دارىن» مەكتەپتەرىنىڭ اشىلعانىنا 20 جىل بولىپ وتىر. ءبىر سوزبەن ايتقاندا, بيىل ءبىلىم سالاسى ءۇشىن مەرەيلى جىل دەۋگە بولادى.
سول سياقتى, اعىمداعى جىل جامبىل وبلىسىندا دا ءبىلىم سالاسىندا تابىستى بولدى. جاڭا وقۋ جىلىندا 9 مەكتەپ پايدالانۋعا بەرىلدى. وسى ۋاقىتقا دەيىن تاراز قالاسىنداعى «بايتەرەك» ىقشاماۋدانىندا مەكتەپتىڭ جوقتىعى ۇلكەن ماسەلە رەتىندە تالاي رەت كوتەرىلگەن بولاتىن. ەندى مىنە, اتالعان ىقشاماۋداننان جاڭا مەكتەپ بوي كوتەردى. سونىمەن قاتار وبلىس ورتالىعىنان №24 مەكتەپ پەن شاھار قۇرامىنداعى ءشولدالا يىنىنەن تاعى ءبىر جاڭا مەكتەپ پايدالانۋعا بەرىلدى. تالاس اۋدانىنىڭ قاسقابۇلاق اۋىلىنان دا قاسقابۇلاق ورتا مەكتەبى, مەركى اۋدانىنىڭ تەسكەنتوعان اۋىلىنان №23 ورتا مەكتەپتىڭ جاڭا عيماراتتارى سالىندى. قورداي اۋدانىنىڭ كوكتوبە اۋىلىنان №40 مەكتەپ پەن سوعاندى اۋىلىنان №33 مەكتەپ حالىق يگىلىگىنە بەرىلدى. ال جۋالى اۋدانىنىڭ قىزىلارىق اۋىلىنان ى.التىنسارين اتىنداعى №17 ورتا مەكتەپ پەن بايزاق اۋدانىنىڭ بايزاق اۋىلىنان №4 مەكتەپ عيماراتى سالىنىپ, جەرگىلىكتى حالىقتىڭ كوڭىلىنە كەرەمەت كۇي سىيلادى. جامبىل وڭىرىندەگى مەكتەپتەردىڭ اشىلۋ سالتاناتىنا وبلىس اكىمى اسقار يسابەك ۇلى قاتىسىپ, جاڭا بۋىن جاستاردىڭ ءبىلىم الۋىنا بارلىق جاعدايدىڭ جاسالعانىن, سوندىقتان دا تەك ساپالى ءبىلىم الىپ, بولاشاققا بەت تۇزەۋ كەرەكتىگىن ايتتى.
ءبىلىم ارقىلى بىلىك قالىپتاسادى. بۇگىنگى جاستاردىڭ, ەرتەڭگى ەل ازاماتتارىنىڭ بويىنداعى پاراساتتىلىق پەن كەمەلدىك مەكتەپ قابىرعاسىندا جۇرگەندە قالىپتاساتىنى ءسوزسىز. سوندىقتان دا مەملەكەت تاراپىنان كورسەتىلىپ وتىرعان ءتيىستى قولداۋ مەن قامقورلىقتى كەلەشەككە تارتىلىپ وتىرعان ينۆەستيتسيا دەۋگە بولادى.
– وبلىستا ءبىلىم بەرۋ جۇيەسىن دامىتۋعا ەرەكشە نازار اۋدارىلۋدا. اتالعان سالانى قارجىلاندىرۋ ماقساتىندا اعىمداعى جىلى 106,1 ميلليارد تەڭگە ءبولىندى. بۇل كورسەتكىش وتكەن جىلمەن سالىستىرعاندا 8,0 پروتسەنتكە ارتىق. ونىڭ 7,4 ميلليارد تەڭگەسى ءبىلىم بەرۋ نىساندارىنىڭ قۇرىلىسى مەن كۇردەلى جوندەۋگە ارنالعان. ناتيجەسىندە اپاتتى جاعدايداعى 3, ءۇش اۋىسىمدا جۇمىس ىستەيتىن 3 جانە وقۋشى ورنى تاپشىلىعى بار 3 مەكتەپتىڭ ماسەلەسى شەشىلىپ وتىر, – دەيدى وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا.
جامبىل وڭىرىندە جاڭا وقۋ جىلىندا 447 مەكتەپ جۇمىس ىستەپ تۇر. ال بيىل 14 ءبىلىم بەرۋ مەكەمەلەرىنىڭ قۇرىلىسى جۇرگىزىلگەن بولسا, جاڭا وقۋ جىلىندا 9 مەكتەپ پايدالانۋعا بەرىلدى. ال قالعان 5 ءبىلىم وشاعى كەلەسى جىلى پايدالانۋعا بەرىلەدى دەپ جوسپارلانۋدا.
حاميت ەسامان,
«ەگەمەن قازاقستان»
جامبىل وبلىسى