قازاقستان قۇراماسى XVIII جازعى ازيا ويىندارىنان ەلگە ورالدى. كەشە تۇندە استانا قالاسىنىڭ اۋەجايىنان «جاس وتان» جاستار قاناتىنىڭ بەلسەندىلەرى بايداركادا جانە كانوەدە ەسكەك ەسۋ جارىسىنان التىن مەدالدى قانجىعاسىنا بايلاعان ەرلەر, كۇمىستى جەڭىپ العان ايەلدەر قۇراماسى مەن سامبوشىلاردى كۇتىپ الدى.
بايداركامەن 500 مەترگە جۇزۋدەن ءبىرىنشى بولىپ كەلگەن يليا گولەندوۆ, الەكسەي دەرگۋنوۆ, سەرگەي توكارنيتسكي جانە ەۆگەني الەكسەەۆ تورتتىگى, ال ايەلدەر قۇراماسىنان زويا انانچەنكو, سامبودان التىن مەدالعا يە بولعان باعلان يبراگيم مەن قولا جۇلدەگەرلەر بەيىمبەت كانجانوۆ, الىبەك زەكەنوۆتى ەلوردادا العاشقى بولىپ ءبىر توپ قولداۋشىلارى, جاقىندارى مەن بەلسەندى جاستار قۇتتىقتادى.
2018 جىلدىڭ 18 تامىز – 2 قىركۇيەك كۇندەرى يندونەزيا استاناسى دجاكارتادا مەن سۋماترا ارالىنىڭ ەڭ ۇلكەن قالاسى پالەمبانگتە XVIII جازعى ازيا ويىندارى ءوتتى. قازاقستان ۇلتتىق قۇراماسى ساپىنان 440 سپورتشى 37 ديستسيپلينا بويىنشا وليمپيادالىق 25 سپورت تۇرىنەن جارىسقا ءتۇستى. 2018 جىلعى ازيا ويىندارىندا قازاقستان ۇلتتىق قۇراماسىنىڭ سپورتشىلارى 15 التىن, 17 كۇمىس, 44 قولا مەدالدار جەڭىپ الىپ, جالپى 76 مەدالمەن ازيا ويىندارىن 9 ورىنمەن اياقتادى.