كەشە قازاقستان رەسپۋبليكاسى پارلامەنتى سەناتىنىڭ توراعاسى قايرات ءمامي سانكت-پەتەربۋرگ قالاسىنداعى تاۆريا سارايىندا وتكەن ەۋرازەق پارلامەنتارالىق اسسامبلەياسىنىڭ ون ءۇشىنشى وتىرىسىنا قاتىسىپ, وندا ەۋرازەق پاا-نىڭ توراعالىعىنا سايلاندى.
پارلامەنتاريلەر الدىندا سويلەگەن سوزىندە قايرات ءمامي ىقپالداسۋدىڭ جاڭا مىندەتتەرىن جۇزەگە اسىرۋ ماقساتىندا ونى زاڭنامالىق تۇرعىدان قامتاماسىز ەتۋ ماسەلەسىنە نازار اۋدارۋ قاجەتتىگىنە توقتالدى. «قازىرگى ۋاقىتتا قازاقستان, بەلارۋس, رەسەي اراسىنداعى كەدەن وداعى تابىستى جۇمىس ىستەپ تۇر. 2012 جىلدىڭ 1 قاڭتارىنان باستاپ ءبىرتۇتاس ەكونوميكالىق كەڭىستىك, ال 2015 جىلدان ەۋرازيالىق ەكونوميكالىق وداق جۇمىس ىستەي باستايدى», – دەگەن ق. ءمامي وسى رەتتە قاي ەلدىڭ دە ۇلتتىق زاڭنامالارىن ۇيلەستىرۋدىڭ جانە ەۋرازيالىق وداقتىڭ قۇقىقتىق نەگىزىن قالىپتاستىرۋدىڭ ماڭىزدىلىعىن قاپەرگە سالدى. ءارى قاراي توراعا: «ءبىزدىڭ جۇمىسىمىز ءبىر-بىرىمىزگە دەگەن سىيلاستىق پەن ءوزارا تۇسىنىستىك اياسىندا, تەڭ قۇقىقتىلىق پەن تەپە-تەڭدىك قاعيداتىن ساقتاي وتىرىپ ءجۇرگىزىلۋى ءتيىس», – دەدى.
وتىرىستا ەۋرازيالىق ەكونوميكالىق قوعامداستىق سوتىنىڭ سۋديالارى تاعايىندالدى. الداعى جىلدىڭ 1 قاڭتارىنان باستاپ جۇمىسىن باستايتىن جاڭا سوت ورگانىنا قازاقستان تاراپىنان مۇسابەك الىمبەكوۆ پەن جولىمبەت بايىشەۆ باراتىن بولدى.
سەنات توراعاسى ەۋرازەق پاا وتىرىسىنا كەلگەن وسى ساپارىندا تمد-عا قاتىسۋشى مەملەكەتتەردىڭ پارلامەنتارالىق اسسامبلەيالارى كەڭەسىنىڭ باس حاتشىسى ميحايل كروتوۆپەن كەزدەستى. ونىڭ بارىسىندا ق.ءمامي رەسەي فەدەراتسياسى فەدەرالدى جينالىسى مەملەكەتتىك دۋماسىنا دەپۋتاتتار سايلاۋىنا مونيتورينگ جۇرگىزۋدەگى تمد پاا بايقاۋشىلار ميسسياسىنىڭ جەمىستى جۇمىسىن اتاپ ءوتىپ, ەندى وسى ميسسيانىڭ الداعى جىلدىڭ قاڭتار ايىندا ءبىزدىڭ ەلىمىزدە بولاتىن پارلامەنت ءماجىلىسى دەپۋتاتتارىنىڭ سايلاۋىندا بايقاۋشىلىق قىزمەتكە بەلسەندى قاتىساتىنىنا سەنىم ءبىلدىردى. «اسسامبلەيانىڭ تاجىريبەسى جانە دوستاستىق ەلدەرىندەگى وسىنداي شارالارعا حاتشىلىقتىڭ قاتىسۋى پارلامەنت ءماجىلىسى سايلاۋىنا ۇيىمداسقان تۇردەگى مونيتورينگ ءجۇرگىزۋگە جاردەمدەسەتىن بولادى», – دەگەن توراعا قازاقستانداعى الداعى سايلاۋ اشىق, ەركىن جانە ءادىلەتتى بولاتىنىنا سەنىمدى ەكەنىن ءبىلدىردى.
كەزدەسۋ بارىسىندا ميحايل كروتوۆ تمد پاا كەڭەسىنىڭ ءتورايىمى ۆالەنتينا ماتۆيەنكونىڭ قولداۋىمەن اسسامبلەيا كەڭەسىنىڭ مەرەيتويلىق وتىرىسىن ءبىزدىڭ ەلىمىزدە وتكىزۋ جوسپارلانىپ وتىرعانىن جەتكىزدى. «اسسامبلەيانىڭ قۇرىلعان جەرىن ەسكەرە وتىرىپ, فورۋمدى قازاقستاندا وتكىزۋدىڭ ەرەكشە ءمانى بار», – دەدى باس حاتشى م كروتوۆ. سونىمەن, تمد-لىق پارلامەنتاريلەر مەرەيتويلىق وتىرىسقا كاتىسۋ ءۇشىن الداعى 2012 جىلدىڭ ناۋرىز ايىندا ەلىمىزگە كەلەتىن بولادى.
ەلىمىزدىڭ زاڭ شىعارۋ ورگانىنىڭ جوعارعى پالاتاسىنىڭ توراعاسى قايرات ءمامي سۇحبات كەزىندە دوستاستىققا مۇشە مەملەكەتتەردىڭ قاتىناستارىن ودان ءارى نىعايتۋ ماسەلەلەرىندە پارلامەنتارالىق بايلانىستاردىڭ ءرولىنە ەرەكشە ءمان بەرە سويلەدى. جانە دە توراعا وسى رەتتە تاعى ءبىر ماسەلەگە نازار اۋداردى. ول – تمد ەلدەرىندەگى پارلامەنتشىلەردىڭ حالىقارالىق بىرلەستىكتەر اياسىندا ءوزارا بەلسەندى ءىس-قيمىل تانىتۋلارى قاجەتتىگى. «ءبىز پارلامەنتتىك ۇيىمدارداعى كوميسسيا قۇرامدارىنىڭ ءمۇمكىندىگىن تولىق دارەجەدە پايدالانۋعا ءتيىسپىز», – دەپ اتاپ ءوتتى وسى ورايدا توراعا.
«تاۆريا» سارايىندا سونداي-اق ەۋرازەق پاا-نىڭ تۇراقتى كوميسسيالارىنىڭ بىرلەسكەن وتىرىستارى بولدى. ولاردىڭ كۇن ءتارتىبىنە بىرنەشە ماسەلە قويىلدى. وندا قۇقىقتىق, كەدەندىك ۇيلەستىرۋ مەن شەكارالىق ساياسات, ساۋدا جانە حالىقارالىق ىقپالداستىق, اگروونەركاسىپتىك ساياسات, تابيعاتتى پايدالانۋ, ەكولوگيا سىندى قاداۋ-قاداۋ, قاي ەلدىڭ دە دامۋىنا اسەر ەتەتىن, اقىلداسا وتىرىپ, كەڭەسەتىن, ويلاردى ورتاعا سالاتىن ءماسليحاتتار ءوتتى.
ال مۇنداعى ايتىلعان ويلار مەن جالپى ساپار بارىسىنان جازىلعان ماتەريالدى الداعى ءنومىرلەردىڭ بىرىنەن وقيتىن بولاسىزدار.
انار تولەۋحانقىزى, «ەگەمەن قازاقستان» – سانكت-پەتەربۋرگتەن.