التى بوكسشىمىز ەليستادا جۇدىرىقتاسادى

ەليستاداعى دودادا قازاقستاننىڭ التى ستۋدەنتى باق سىنايدى. سولاردىڭ اراسىنان داستان ساداۋقاسوۆتىڭ ءتول شاكىرتى بەكبولات قۇرامىسوۆتى بولە-جارا اتاۋعا بولادى. 69 كيلو سالماق دارەجەسىندە كۇش سىناسىپ جۇرگەن اتىراۋ وبلىسىنىڭ تۇلەگى وسىدان ەكى جىل بۇرىن ستۋدەنتتەر اراسىندا تايلاندتا وتكەن الەم چەمپيوناتىندا كۇمىس مەدالدى يەلەنىپ, تاجىكستانداعى ازيا بىرىنشىلىگىندە قولاعا قول سوزدى. شىمكەنتتەگى ەل چەمپيوناتىندا ول ءۇشىنشى ورىنعا تابان تىرەپ, دۇنيەجۇزىلىك بوكس سەرياسى دوداسىندا «استانا ارلاندارى» ساپىندا ۇلكەن تاجىريبە مەكتەبىنەن ءوتتى.

بەكبولاتتان بولەك, 60 كيلو سالماقتاعى ەرجان ورداباەۆتىڭ دا الەۋەتى جوعارى باعالانۋدا. تانىمال باپكەر سارسەنباي تورعاەۆتىڭ قول استىندا جاتتىعاتىن بۇل بىلعارى قولعاپ شەبەرى وسىدان بىرەر جىل بۇرىن قازاقستان چەمپيونى اتانىپ, مۇنايلى ەلدەر اراسىندا ءداستۇرلى تۇردە ءوتىپ تۇراتىن الەم كۋبوگى جولىنداعى جارىستىڭ جەڭىمپازى اتاندى. سونداي-اق, ايتۋلى دودادا ابىلاي قۋاندىقوۆ (52 كيلو), ەراسىل شوقانوۆ (56 كيلو), اماندىق ماناشيەۆ (75 كيلو) جانە ايات مارجىقباەۆ (81 كيلو) سىندى بوكسشىلار شارشى الاڭعا شىعادى.

2016 جىلى تايلاندتىڭ چيانگ-ماي قالاسىندا وتكەن الەم چەمپيوناتىنا ەل قۇراماسىن ءوزىم باستاپ اپارعان ەدىم. سول كەزدە وتە جاقسى ونەر كورسەتىپ, التى ورەنىمىز جەڭىس تۇعىرىنا كوتەرىلدى. اتاپ ايتساق, ديدار وتەلباەۆ, ءالي احمەدوۆ جانە نۇرسۇلتان امانجولوۆ التىن السا, بەكبولات قۇرامىسوۆ كۇمىسپەن كۇپتەلدى. ال ەرتۋعان زەينۋلينوۆ پەن راحات مارجىقباەۆ قولاعا قول جەتكىزدى. بيىل ول ناتيجەنى قايتالاۋ قيىن بولادى. سەبەبى, كوماندا قايتا جاساقتالدى. بۇرىنعى مىقتىلاردىڭ ورنىن دارىندى جاستار باستى. ولاردىڭ دەنى ءالى دە وسىنداي ءىرى دۇرمەكتەردە جەڭىستىڭ ءدامىن تاتىپ كورمەگەن. دەسەك تە ەليستادا كەمىندە ءبىر التىنعا قول جەتكىزىپ, بىرنەشە جۇلدە الۋ ءۇشىن جانىمىزدى سالىپ ايقاسامىز, – دەيدى قازاقستاننىڭ ستۋدەنتتەر قۇراماسىنىڭ اعا جاتتىقتىرۋشىسى داستان سادۋاقاسوۆ.

ەستەرىڭىزگە سالا كەتەيىك, ستۋدەنتتەر اراسىنداعى الەم چەمپيوناتى 2004 جىلدان بەرى ۇزدىكسىز ۇيىمداستىرىلىپ كەلەدى. انتاليادا وتكەن العاشقى جارىستان جەرلەستەرىمىز قۇر الاقان ورالعان. ەسەسىنە 2016 جىلى الماتىدا جالاۋى جەلبىرەگەن دودادا 6 التىن, 2 كۇمىس جانە 3 قولانى قورجىنعا سالدىق. سول كەزدەگى كوماندالىق باس جۇلدە بىزگە بۇيىردى. 2008 جىلى قازاندا 1 التىن, 5 كۇمىس جانە 2 قولانى يەلەندىك. 2010 جىلى ۇلان باتىردا 1 التىن, 4 كۇمىس جانە 4 قولانى ەنشىلەدىك. 2012 جىلى باكۋدە 4 قولا مەدالدى قاناعات تۇتتىق. 2014 جىلى ياكۋتسكىدە 2 التىن, 3 كۇمىس جانە 2 قولا جۇلدەنى ولجالادىق.

وسىندان ەكى جىل بۇرىن تاي ەلىندە جالاۋى جەلبىرگەن دۇنيەجۇزىلىك دودادا 3 التىن, 1 كۇمىس جانە 2 قولانى قانجىعاسىنا بايلاعان قازاق ەلىنىڭ ستۋدەنتتەرى كوماندالىق ەسەپتە ەكىنشى ورىنعا جايعاسقان ەدى. سول جارىستا جەرلەستەرىمز تەك رەسەيدەن عانا قالىپ قويدى.   

عالىم سۇلەيمەن,

«ەگەمەن قازاقستان»

الماتى